ಅಷ್ಟಲ್ಲದೆ ‘ಶ್ರೀವಿಷ್ಣುಪುರಾಣ, ಶ್ರೀಮದ್ಭಾಗವತ, ಅಮರಕೋಶ, ವಾಕ್ಯಪದೀಯ, ರಾಘವಾಂಕನ ಹರಿಶ್ಚಂದ್ರಚರಿತೆ, ಹದಿಬದೆಯ ಧರ್ಮ’ ಮೊದಲಾದವು ಅವರ ಅನುವಾದಿತ ಕೃತಿಗಳಲ್ಲಿ ಪ್ರಮುಖವಾದವು. ಸಂಸ್ಕೃತದಲ್ಲಿ ‘ಭಾಷಾಂತರಪಾಠಃ, ಸಂಸ್ಕೃತಂ ನಾಮ ದೈವೀವಾಕ್, ಶ್ರೀಶಂಕರಚರಿತಾಮೃತಮ್ ಕುಸುಮಾಂಜಲಿಃ, ಶ್ರೀಬಾಹುಬಲಿವಿಜಯಂ, ಏಕಚಕ್ರಂ’ ಮೊದಲಾದ ಅನೇಕ ಪುಸ್ತಕಗಳನ್ನೂ ಕಾವ್ಯನಾಟಕಗಳನ್ನೂ ಬರೆದಿದ್ದಾರೆ. ‘ಹೊಸಗನ್ನಡ ವ್ಯಾಕರಣ, ಲೌಕಿಕನ್ಯಾಯಗಳು, ವ್ಯಾಕರಣಶಾಸ್ತ್ರದ ಪರಿವಾರ, ವಾಲ್ಮೀಕಿಮುನಿಗಳ ಹಾಸ್ಯಪ್ರವೃತ್ತಿ’ ಮೊದಲಾದವು ಅವರ ಲೋಕಪ್ರಿಯವಾದ ಕನ್ನಡದ ಸ್ವತಂತ್ರ ಕೃತಿಗಳು. ಡಿವಿಜಿಯವರ ಪ್ರಸಿದ್ಧವಾದ ‘ಮರುಳಮುನಿಯನ ಕಗ್ಗ’ವನ್ನು ಸಂಪಾದಿಸಿ ಕನ್ನಡಲೋಕಕ್ಕೆ ದೊರಕಿಸಿಕೊಟ್ಟಿದ್ದೇ ರಂಗನಾಥಶರ್ಮರು. ಅವರ ಎಂಬತ್ತರ ವಯಸ್ಸಿನಲ್ಲಿ ಒಮ್ಮೆ ‘ಬಳ್ಳಿಗಳು ಮರವನ್ನು ಪ್ರದಕ್ಷಿಣಾಕಾರವಾಗಿಯೇ ಸುತ್ತಿಕೊಂಡು ಬೆಳೆಯುತ್ತವೆ’ ಎಂಬುದನ್ನು ಗಮನಿಸಿ ಅದನ್ನು ಖಚಿತಪಡಿಸಿಕೊಳ್ಳಲು ಮಲ್ಲಿಗೆ ಬಳ್ಳಿಯೊಂದನ್ನು ಅಪ್ರದಕ್ಷಿಣಾಕಾರವಾಗಿ ಕಟ್ಟಿಟ್ಟರೂ ಮುಂದೆ ಅದೂ ಪ್ರದಕ್ಷಿಣಾತ್ಮಕವಾಗಿಯೇ ಬೆಳೆದುದ್ದನ್ನು ಗಮನಿಸಿದ್ದರಂತೆ. ಅವರನ್ನು ಕುರಿತು ‘...ರಂಗನಾಥಶರ್ಮರಷ್ಟು ಅಧಿಕಪ್ರಮಾಣದಲ್ಲಿ ಮತ್ತು ಶ್ರೇಷ್ಠ ಮಟ್ಟದಲ್ಲಿ ಋಷಿಋಣಸಂದಾಯ ಮಾಡಿದವರು ಇಡೀ ದೇಶದಲ್ಲಿ ಬೆರಳೆಣಿಕೆಯಷ್ಟು ದೊರೆತಾರು. ಅಧ್ಯಯನ ಅಧ್ಯಾಪನಗಳಲ್ಲಿಯೂ ಲೇಖನ ಪ್ರವಚನಗಳಲ್ಲಿಯೂ ಅವರು ತೋರಿದ ನಿತಾಂತ ಶ್ರದ್ಧೆಯಂತೂ ಅನುಪಮವಾದುದು, ವಿರಳವಾದುದು. ಪಂಡಿತ ಸಮುದಾಯದಲ್ಲಿ ಬರವಣಿಗೆಯ ಅಭ್ಯಾಸವನ್ನು ರೂಢಿಸಿಕೊಂಡ ವಿರಳರಲ್ಲೊಬ್ಬರು ಶರ್ಮರು...’ ಎಂದು ನಾಡೋಜ ಎಸ್.ಆರ್.ರಾಮಸ್ವಾಮಿಯವರು ಬರೆದಿದ್ದಾರೆ. ‘ಹಳಗನ್ನಡವೂ ಸೇರಿದಂತೆ ಕನ್ನಡ ಸಾಹಿತ್ಯದ ಅತ್ಯುತ್ತಮವರ್ಗದ ಎಲ್ಲ ವಾಙ್ಮಯವನ್ನೂ ಬಲ್ಲ ಬಲ್ಲಿದರು ಇವರು. ಕನ್ನಡವ್ಯಾಕರಣಕ್ಕೂ ಪರಮಾಚಾರ್ಯರು. ತಮ್ಮ ಹೆಚ್ಚಿನ ಸಾಹಿತ್ಯಕೃಷಿಯನ್ನೆಲ್ಲ ಸಂಸ್ಕೃತ-ಕನ್ನಡ ಸಂಗಮವೆಂಬಂತೆ ರೂಪಿಸಿ ಅಭಿಜಾತ ಶಾಸ್ತ್ರ ಕಾವ್ಯಗಳ ಅನುವಾದ ಮತ್ತು ವ್ಯಾಖ್ಯಾನ ಪರಂಪರೆಯ ಪ್ರಶಸ್ತಪಂಕ್ತಿಗೇ ಪಾವನರೆಂಬಂತೆ ನಿಂತವರು’’ ಎಂದು ಶತಾವಧಾನಿ ಗಣೇಶ್ ಅವರು ಹೇಳುತ್ತಾರೆ. ಇಂಥ ಮೇರು ವಿದ್ವಾಂಸ ರಂಗನಾಥಶರ್ಮರ ಮೂರು ಕೃತಿಗಳು ಹಾಗೂ ಅವರ ಸಾಹಿತ್ಯಸಂಪದದ ಅಂತರ್ಜಾಲಾವೃತ್ತಿಯ ಲೋಕಾರ್ಪಣೆ ಇಂದು (ಫೆ. 9) ಬೆಂಗಳೂರಿನಲ್ಲಿ ನಡೆಯಲಿದೆ. ವೇದಿಕೆ ಕಾರ್ಯಕ್ರಮದಲ್ಲಿ ನಾಡೋಜ ಡಾ. ಎಸ್.ಆರ್. ರಾಮಸ್ವಾಮಿ, ಪ್ರೊ. ಮಲ್ಲೇಪುರಂ ಜಿ. ವೆಂಕಟೇಶ್, ಡಾ. ಎಸ್.ಆರ್. ಲೀಲಾ, ಡಾ. ಆರ್. ಗಣೇಶ್, ಪ್ರೊ. ಸಿ.ಎಸ್. ಯೋಗಾನಂದ , ಶಶಿಕಿರಣ್ ಬಿ.ಎನ್. ಪಾಲ್ಗೊಳ್ಳಲಿದ್ದಾರೆ.
