ವೃತ್ತಿ ಶಿಕ್ಷಣದ ವಿಚಾರ ಬಂದಾಗ ಬಹುತೇಕ ವಿದ್ಯಾರ್ಥಿಗಳು ಮತ್ತು ಪಾಲಕರ ಆಯ್ಕೆ ಇಂಜಿನಿಯರಿಂಗ್ ಮತ್ತು ಮೆಡಿಕಲ್ ಕ್ಷೇತ್ರ. ಆದರೆ ಐಐಟಿ ಮತ್ತು ಇತರೆ ಪ್ರತಿಷ್ಠಿತ ಮೆಡಿಕಲ್ ಕಾಲೇಜುಗಳಲ್ಲಿ ಪ್ರವೇಶ ಪಡೆಯುವುದು ಸುಲಭವಲ್ಲ. ವಿಶೇಷವಾಗಿ ಗ್ರಾಮೀಣ ಮತ್ತು ಬಡವರಲ್ಲಿ ಪ್ರತಿಭೆ ಇದ್ದರೂ ಇವೆಲ್ಲ ಗಗನ ಕುಸುಮ. ಇಂತಹ ಸ್ಥಿತಿಯಲ್ಲಿ ಕರ್ನಾಟಕದ ಬಡ ಮಧ್ಯಮವರ್ಗದ ಪ್ರತಿಭಾವಂತರು ಐಐಟಿ / ವೈದ್ಯಕೀಯ ಶಿಕ್ಷಣ ಪಡೆಯುವುದಕ್ಕೆ ಅನುಕೂಲ ಕಲ್ಪಿಸಿದ್ದು ರಾಷ್ಟ್ರೋತ್ಥಾನ ಪರಿಷತ್. ಇದಕ್ಕಾಗಿ ತಪಸ್ / ಸಾಧನಾ ಎಂಬ ಎರಡು ಪ್ರಕಲ್ಪಗಳನ್ನು ಅದು ಪರಿಚಯಿಸಿದೆ. ಇವು ಸಂಪೂರ್ಣ ಉಚಿತ ಯೋಜನೆಗಳು. ಇವುಗಳ ಮೂಲಕ ಮಕ್ಕಳಿಗೆ ಕೇವಲ ಪಠ್ಯಕ್ರಮದ ಶಿಕ್ಷಣ ಮಾತ್ರವಲ್ಲದೆ, ಜೀವನಕ್ಕೆ ಅಗತ್ಯವಾದ ಸಂಸ್ಕಾರವನ್ನು ಕೂಡ ಪರಿಷತ್ ಕಲಿಸುತ್ತಿದೆ. ಗ್ರಾಮೀಣ ಪ್ರದೇಶದ 10ನೇ ಓದುತ್ತಿರುವ ಬಡ ಪ್ರತಿಭಾವಂತ ಮಕ್ಕಳನ್ನು ಪ್ರವೇಶ ಪರೀಕ್ಷೆ ಮೂಲಕ ಆಯ್ಕೆ ಮಾಡಿ ಎರಡು ವರ್ಷಗಳ ಪಿ.ಯು. ಶಿಕ್ಷಣದೊಂದಿಗೆ ಐಐಟಿ-ಜೆಇಇ / ನೀಟ್ ಪ್ರವೇಶ ಪರೀಕ್ಷೆಗೆ ತರಬೇತಿ ನೀಡಿ ಅವರ ಭವಿಷ್ಯ ರೂಪಿಸುವಲ್ಲಿ ರಾಷ್ಟ್ರೆೊತ್ಥಾನ ಪರಿಷತ್ನ ಈ ಉಪಕ್ರಮಗಳು ವಿಶೇಷ ಪಾತ್ರ ನಿರ್ವಹಿಸುತ್ತಿವೆ. ರಾಜ್ಯದ ಆರ್ಥಿಕ ದುರ್ಬಲ ವರ್ಗದ 10ನೇ ತರಗತಿಯಲ್ಲಿ ಓದುತ್ತಿರುವ ಪ್ರತಿಭಾವಂತ ಗಂಡು ಹಾಗೂ ಹೆಣ್ಣು ಮಕ್ಕಳನ್ನು ಆಯ್ಕೆ ಮಾಡಿ ಅವರಿಗೆ ಉಚಿತ ಪಿ.ಯು.ಸಿ. ಶಿಕ್ಷಣದ ಜತೆಗೆ IIT-JEE (ಗಂಡು ಮಕ್ಕಳಿಗೆ) NEET, CET, KVPY(ಹೆಣ್ಣು ಮಕ್ಕಳಿಗೆ) ಸ್ಪರ್ಧಾತ್ಮಕ ಪರೀಕ್ಷೆಗೆ ತರಬೇತಿಗೊಳಿಸುವುದು. ಈ ಶಿಕ್ಷಣ ಸಂಪೂರ್ಣ ಉಚಿತವಾಗಿದ್ದು ವಸತಿ, ಭೋಜನ, ಕಾಲೇಜು ಶುಲ್ಕ, ಅಧ್ಯಯನ ಸಾಮಗ್ರಿ, ತರಬೇತಿ ಎಲ್ಲವನ್ನೂ ತಪಸ್ / ಸಾಧನಾ ವಹಿಸಿಕೊಳ್ಳುತ್ತದೆ. ರಾಜ್ಯದ ಪ್ರತಿಷ್ಠಿತ ತರಬೇತಿ ಸಂಸ್ಥೆಯಾದ ಬೇಸ್ ಈ ಮಕ್ಕಳಿಗೆ IIT-JEE ಗೆ ಪ್ರಶಿಕ್ಷಣ ನೀಡಲಿದೆ. ಸಮಾಜದ ಈ ರೀತಿಯ ಮಕ್ಕಳೂ ಸಹ ದೇಶದ ಪ್ರತಿಷ್ಠಿತ ಶಿಕ್ಷಣ ಸಂಸ್ಥೆಗಳಲ್ಲಿ ಶಿಕ್ಷಣ ಪಡೆಯಬಹುದು, ಜ್ಞಾನ ಯಾರ ಸ್ವತ್ತೂ ಅಲ್ಲ, ಬಡವರ ಜ್ಞಾನಕ್ಕೂ ಬೆಲೆಯಿದೆ. ಬಡವರೂ ಸಹ ಹಣ ಇರುವ ಜನರಂತೆಯೇ ಶಿಕ್ಷಣ ಪಡೆಯಬಹುದು ಎಂಬುದನ್ನು ಈ ಪ್ರಕಲ್ಪಗಳು ಸಮಾಜಕ್ಕೆ ತೋರಿಸಿವೆ.
