ಹೀಗೆ ಶಿವ ಮತ್ತು ಮೋಹಿನಿಯ (ವಿಷ್ಣುವಿನ ನಾರಿ ರೂಪ) ಅಂಶದಿಂದ ಹುಟ್ಟಿದವನು ಅಯ್ಯಪ್ಪ ಸ್ವಾಮಿ. ಹಾಗಾಗಿ ಅವನು ಶಿವ ಮತ್ತು ವಿಷ್ಣುವಿನ ದೈವಿಕ ಮಗ. ಹಿಂದು ಧರ್ಮದಲ್ಲಿ ಪೂಜನೀಯವಾಗಿರುವ ಭಗವಾನ್ ವಿಷ್ಣುವಿನ ಮಗನಿಗೆ ಶಿವನು ತಂದೆ. ಅಯ್ಯಪ್ಪ ಹುಟ್ಟಿದ ಬಳಿಕ ಆತನ ಕೊರಳಿಗೆ ಬಂಗಾರದ ಮಣಿಯನ್ನು ಕಟ್ಟುತ್ತಾರೆ ಹಾಗೂ ಆತನನ್ನು ಪಂಪಾನದಿ ತೀರದಲ್ಲಿ ಬಿಡುತ್ತಾರೆ. ಮಕ್ಕಳಿಲ್ಲದ ರಾಜನೊಬ್ಬ ಈ ನದಿ ಪಕ್ಕದಲ್ಲಿ ಸಾಗುತ್ತಿದ್ದಾಗ ಮಗುವಿನ ಅಳು ಕೇಳಿಸುತ್ತದೆ. ಹುಡುಕುತ್ತಾ ಹೋಗಿ ಮಗುವನ್ನು ಎತ್ತಿಕೊಂಡು ಅರಮನೆಗೆ ಬರುತ್ತಾನೆ. ತನ್ನ ಸ್ವಂತ ಮಗನಂತೆ ಸಾಕುತ್ತಾನೆ. ಕೆಲವು ವರ್ಷಗಳ ನಂತರ ರಾಣಿ ಗರ್ಭ ಧರಿಸಿ ಮಗುವಿಗೆ ಜನ್ಮ ನೀಡುತ್ತಾಳೆ. ಆದರೆ, ರಾಜ ಮಾತ್ರ ಮಣಿಕಂಠನೇ ತನ್ನ ಉತ್ತರಾಧಿಕಾರಿ ಆಗಬೇಕೆಂದು ಬಯಸುತ್ತಾನೆ. ರಾಣಿ ತನ್ನ ಮಗನೇ ರಾಜನಾಗಬೇಕೆಂದು ಹಠ ಹಿಡಿಯುತ್ತಾಳೆ. ಮಣಿಕಂಠನನ್ನು ಕೊಲ್ಲಲು ಸಂಚು ರೂಪಿಸುತ್ತಾಳೆ. ಅದರ ಪ್ರಕಾರ, ರಾಣಿ ತನಗೆ ಅನಾರೋಗ್ಯವೆಂದು ನಟಿಸಬೇಕು, ಹುಲಿಯ ಹಾಲಿನಿಂದ ಮಾತ್ರ ರಾಣಿ ಗುಣಮುಖವಾಗಲು ಸಾಧ್ಯ ಎಂದು ವೈದ್ಯರು ಹೇಳಬೇಕು, ಮಣಿಕಂಠನು ಹುಲಿಯ ಹಾಲನ್ನು ತರಲು ಕಾಡಿಗೆ ಹೋಗಬೇಕು... ಇದು ಸಂಚು. ಎಲ್ಲವೂ ಹಾಗೆಯೇ ನಡೆಯುತ್ತದೆ. ಹುಲಿಯು ಮಣಿಕಂಠನನ್ನು ಮುಗಿಸಿಬಿಡುತ್ತದೆ ಎಂಬುದು ರಾಣಿಯ ಲೆಕ್ಕಾಚಾರವಾಗಿರುತ್ತದೆ. ಆದರೆ ಮಣಿಕಂಠನು ಹುಲಿ ಹಾಲನ್ನು ತರಲು ಕಾಡಿಗೆ ಹೋಗುವುದಕ್ಕೆ ಸಂತೋಷದಿಂದಲೇ ಸಿದ್ಧನಾಗುತ್ತಾನೆ.
