ಪ್ರಾಯಃ ಧ್ರುವನಿಗೆ ತನ್ನ ತಂದೆಯ ತೊಡೆಯ ಮೇಲೆ ಕುಳಿತುಕೊಳ್ಳಲು ಸುರುಚಿ ಅವಕಾಶ ಕೊಟ್ಟಿದ್ದರೆ ಅಷ್ಟೇ ಕ್ಷಣಿಕವಾದ ಲಾಭವಾಗುತ್ತಿತ್ತು. ಅವನಿಗಾದ ಅವಮಾನ, ಸಂಕಟ, ಅಸಹಾಯಕತೆ ಅವನನ್ನು ಜೀವನದ ಮಹಾಧ್ಯೇಯದ ಕಡೆಗೆ ದಿಟ್ಟ ಹೆಜ್ಜೆಗಳನ್ನು ಇಡುವಂತೆ ಮಾಡಿತು. ಮಿತಾಹಾರ, ಜಲಾಹಾರ, ಕೇವಲ ವಾಯುಸೇವನೆ, ಕಡೆಯಲ್ಲಿ ನಿರಾಹಾರ, ಒಂಟಿಕಾಲಿನ ತಪಸ್ಸು ಹೀಗೆ ಒಂದೊಂದೂ ಅಕಲ್ಪನೀಯ! ಎಂತಹ ದುಸ್ತರವಾದ ತಪಸ್ಸಿನ ನಿಯಮಗಳನ್ನು ಧೀರನಾಗಿ ಪಾಲಿಸಿದ! ಕಡೆಯಲ್ಲಿ ನಾರಾಯಣನ ಪರಮಾನುಗ್ರಹ! ಇಲ್ಲಿ ಶ್ರೀರಂಗ ಮಹಾಗುರುಗಳ ಈ ಮಾತು ಸ್ಮರಣೀಯ- ‘ಸಂಕಲ್ಪವು ಸುದೃಢವಾಗಿ ಶಕ್ತಿಯುತವಾಗಿದ್ದರೆ ಆ ಸಂಕಲ್ಪವನ್ನು ಹರಿಸಿಬಿಟ್ಟರೂ ಪರವಾಗಿಲ್ಲ, ಆ ಸಂಕಲ್ಪವೇ ಕೆಲಸ ಮಾಡಿಕೊಳ್ಳುತ್ತೆ. ದಾರ ಸುತ್ತಿ ಬುಗುರಿಯನ್ನು ಆಡಿಸಿಬಿಟ್ಟರೆ ದಾರದ ಸಂಬಂಧ ತಪ್ಪಿದರೂ ಬುಗುರಿ ಆಡುತ್ತಲೇ ಇರುತ್ತೆ. ಸಂಕಲ್ಪ ಹರಿದುದಕ್ಕೆ ಅಷ್ಟು ದೂರ ಕೆಲಸವುಂಟು. ಆದ್ದರಿಂದ ದೃಢಸಂಕಲ್ಪವಿರಲಿ.’ ನಮ್ಮ ಇಂದಿನ ವಿಷಮ ಪರಿಸ್ಥಿತಿಯನ್ನು ಮತ್ತು ಮುಂದೆ ಜೀವನದಲ್ಲಿ ಬರುವ ಕಷ್ಟಗಳೆಲ್ಲವನ್ನೂ ದಾಟುವುದಕ್ಕೆ ಬೇಕಾದದ್ದು ಸಂಕಲ್ಪ ಶಕ್ತಿ. ನಮಗೆ, ನಮ್ಮ ಮಕ್ಕಳಿಗೆಲ್ಲ ಧ್ರುವಕುಮಾರನ ಕಥೆ ಪ್ರೇರಣಾದಾಯಿ.
