ಕ್ಯಾಲಿಗ್ರಫಿ ಇದು ಗ್ರೀಕ್ ಮೂಲದ ಪದ. ಇದರರ್ಥ ಸುಂದರ ಕೈಬರಹ. ವಿಶಿಷ್ಟ ರೀತಿಯ ಪೆನ್ನಿನಿಂದ ಅರಳುವ ಕಲೆಯೇ ಕ್ಯಾಲಿಗ್ರಫಿ. ಹ್ಯಾಂಡ್ರೈಟಿಂಗ್ ಮತ್ತು ಕ್ಯಾಲಿಗ್ರಫಿಗಳ ನಡುವೆ ವ್ಯತ್ಯಾಸವಿದೆ. ಕ್ಯಾಲಿಗ್ರಫಿಯನ್ನು ಕನ್ನಡದಲ್ಲಿ ‘ಚಿತ್ತಾರ ಕೈಬರಹ’ ಅಥವಾ ‘ಅಕ್ಷರ ವಿನ್ಯಾಸ’ ಎನ್ನುತ್ತಾರೆ. ಇಂಗ್ಲಿಷ್ನಲ್ಲಿ ‘ಪೆನ್ವುನ್ಷಿಸ್’ ಅಥವಾ ‘ಪೆನ್ಆರ್ಟ್’ ಎಂದೂ ಕರೆಯುತ್ತಾರೆ. ಇಂತಹ ಬರಹಗಳನ್ನು ಪತ್ರಿಕೆ, ಮ್ಯಾಗಝಿನ್, ಮದುವೆ ಆಹ್ವಾನ ಪತ್ರಿಕೆ, ಗ್ರೀಟಿಂಗ್ ಕಾರ್ಡ್, ಸಿನಿಮಾ ಪೋಸ್ಟರ್, ಅಂಗಡಿಗಳ ಬೋರ್ಡ್, ಪುಸ್ತಕದ ಮುಖಪುಟದಲ್ಲಿ ನೋಡಬಹುದು. ಅವುಗಳಲ್ಲಿ ಕೆಲವು ಬಾರಿ ಒಂದು ಪದವನ್ನು ಒಂದು ಅಥವಾ ಎರಡು ಅಕ್ಷರಗಳನ್ನು ಮಾತ್ರ ವಿಶೇಷ ರೀತಿಯಲ್ಲಿ ಅಲಂಕಾರಿಕವಾಗಿ ವಿನ್ಯಾಸಗೊಳಿಸಿರುತ್ತಾರೆ. ಕೈಯಲ್ಲಿ ಬರೆದಿದ್ದನ್ನು ಸ್ಕ್ಯಾನ್ ಮಾಡಿ ಬಳಿಕ ಮುದ್ರಿಸುತ್ತಾರೆ. ಈಗಂತೂ ಕಂಪ್ಯೂಟರ್ನಲ್ಲೇ ವಿವಿಧ ಫಾಂಟ್ ಮತ್ತು ಶೈಲಿಯ ಅಕ್ಷರಗಳು ಸಿಗುತ್ತವೆ. ಇದರಿಂದಾಗಿ ಕ್ಯಾಲಿಗ್ರಫಿಗೆ ತುಸು ಹಿನ್ನಡೆ ಆಗಿದೆ ಎಂದು ಹೇಳಲಾಗುತ್ತದೆಯಾದರೂ ಸಂದರ್ಭಕ್ಕೆ ತಕ್ಕಂತೆ ಕೈಯಿಂದ ಬರೆಯುವುದಕ್ಕೂ, ಎಲ್ಲ ಸಂದರ್ಭಗಳಿಗೂ ಹೊಂದುವಂತಹ ಫಾಂಟ್ಗಳಿಗೂ ಒಂದೇ ರೀತಿಯ ಫಾಂಟ್ಗಳಿಗೂ ವ್ಯತ್ಯಾಸ ಇದ್ದೇ ಇದೆ. ವಿದ್ಯಾರ್ಥಿಗಳು ಪ್ರಾಜೆಕ್ಟ್ ಮಾಡಿ ಒಪ್ಪಿಸುವಾಗ ಶೀರ್ಷಿಕೆ ಬರೆಯಲು ಕೂಡ ಕ್ಯಾಲಿಗ್ರಫಿ ಬರಹಗಳನ್ನು ಉಪಯೋಗಿಸಬಹುದು. ಬರ್ತ್ ಡೇ, ಟೀಚರ್ಸ್ ಡೇ ಮುಂತಾದ ಸಂದರ್ಭಗಳಲ್ಲಿ ಗ್ರೀಟಿಂಗ್ ಕಾರ್ಡ್ಗಳನ್ನು ಕೈಯಲ್ಲಿ ತಾವೇ ಸ್ವತಃ ತಯಾರಿಸಬಹುದು. ಇತರರಿಗೂ ತಯಾರಿಸಿ ಕೊಡಬಹುದು. ಇನ್ವಿಟೇಶನ್ ಕಾರ್ಡ್ ತಯಾರಿಸಿ, ಸ್ಕ್ಯಾನ್ ಮಾಡಿ ಮುದ್ರಿಸಿ ಹಂಚಬಹುದು ಅಥವಾ ಕಲರ್ ಝೆರಾಕ್ಸ್ ಮೂಲಕ ಪ್ರತಿಗಳನ್ನು ತಯಾರಿಸಬಹುದು. ಕೆಲವು ಕನ್ನಡ ಪತ್ರಿಕೆ ಅಥವಾ ಮ್ಯಾಗಝಿನ್ಗಳಲ್ಲಿ ಕ್ಯಾಲಿಗ್ರಾಫರ್ಗಳು ಇರುತ್ತಾರೆ. ಸಿನಿಮಾ ಪೋಸ್ಟರ್ ತಯಾರಿಸುವಾಗಲೂ ಕ್ಯಾಲಿಗ್ರಾಫರ್ ಬೇಕಾಗುತ್ತಾರೆ. ಕನ್ನಡ ಅಕ್ಷರಗಳನ್ನು ಒಂದೇ ಎಳೆತದಲ್ಲಿ (ಸ್ವೀಪ್) ಬರೆಯಲಾಗುವುದಿಲ್ಲ. ಆದ್ದರಿಂದ ಸ್ವಲ್ಪ ಸ್ವಲ್ಪ ಭಾಗವನ್ನೇ ಬರೆಯಬೇಕಾಗುತ್ತದೆ. ಇದು ನಮಗೆ ತಾಳ್ಮೆಯನ್ನೂ ಕಲಿಸುತ್ತದೆ.
