ಸುಹೃತ್ತು ಎಂದರೆ ಒಳ್ಳೆಯ ಹೃದಯದ ಸ್ನೇಹಿತ, ಎಂದರೆ ಅಧರ್ಮದ ದಾರಿ ತಡೆದು ಧರ್ಮದ ದಾರಿ ಪ್ರೋತ್ಸಾಹಿಸುವವನು, ಕಷ್ಟದಲ್ಲಿ ಸಹಾಯ ಮಾಡುವವನು, ಇತರರ ಎದುರು ಕೆಟ್ಟದಾಗಿ ಮಾತನಾಡದಿರುವವನು (ಗೊತ್ತಿದ್ದರೂ), ರಹಸ್ಯವನ್ನು ಕಾಪಾಡುವವನು, ತೊಂದರೆ ಕೊಡಲು ಪ್ರಯತ್ನಿಸುವ ಶತ್ರು, ತನಗೆ ಯಾರೂ ಯಾವುದೂ ಬೇಡವೆಂಬ ಉದಾಸೀನ, ಇಬ್ಬರಲ್ಲಿ ಭೇದವುಂಟಾದಾಗ ಇಬ್ಬರಿಗೂ ಬೇಕಾದವನಾಗಿ ಬುದ್ಧಿವಾದ ಹೇಳುವ ಮಧ್ಯಸ್ಥ, ವಿನಾಕಾರಣ ದ್ವೇಷಿಸುವವನು ರಕ್ತಸಂಬಂಧಿ, ನೆಂಟ, ಶಾಸ್ತ್ರಗಳ ರೀತಿ ಜೀವನ ನಡೆಸುವ ಸಾಧು, ಶಾಸ್ತ್ರ ವಿರುದ್ಧ ಜೀವನ ನಡೆಸುವ ಪಾಪಿ - ಇವರೆಲ್ಲರಲ್ಲಿ ಒಂದೇ ಭಾವದಿಂದ ವರ್ತಿಸುವವನು ಯೋಗಾರೂಢರಲ್ಲಿ ಶ್ರೇಷ್ಠನು. ಕಾರಣವೆಂದರೆ - ಇವನು ಸಮಬುದ್ಧಿಯಿರದ ಅವರೆಲ್ಲರ ಹೃದಯದಲ್ಲಿ ಒಬ್ಬನೇ ಪರಮಾತ್ಮನಿದ್ದಾನೆ ಎಂಬ ಆಧ್ಯಾತ್ಮಿಕ ದೃಷ್ಟಿಕೋನದಿಂದ ನೋಡುವನು. ಈ ಸಮಬುದ್ಧಿ ಅವನ ವಿಶೇಷ ಗುಣ. ಶ್ರೀ ರಾಮಕೃಷ್ಣ ಪರಮಹಂಸರು ಹೇಳುತ್ತಿದ್ದರು. ‘ನೆಲದಲ್ಲಿರುವಾಗ ಗಿಡ, ಮರ, ಗುಡ್ಡ, ಹುಲ್ಲು ಇತ್ಯಾದಿಗಳ ವ್ಯತ್ಯಾಸ ತಿಳಿಯುವುದು. ಅದನ್ನೇ ಬೆಟ್ಟದ ಮೇಲಿಂದ ನೋಡಿದಾಗ ಎಲ್ಲವೂ ಸಮವಾಗಿರುವಂತೆ ಕಾಣುವುದು’ ಎಂದು. ಹಾಗೆಯೇ ಆಧ್ಯಾತ್ಮಿಕ ಉನ್ನತಿಯನ್ನು ಸಾಧಿಸಿ, ಮನಸ್ಸನ್ನು ಬಹಳ ಮೇಲೆ ಏರಿಸಿರುವುದರಿಂದ ಎಲ್ಲರಲ್ಲಿನ ವ್ಯತ್ಯಾಸ ತಿಳಿಯುತ್ತಿದ್ದರೂ ಅವನಿಗೆ ಒಂದೇ ಏಕಾತ್ಮಭಾವದಿಂದ ಕಾಣುವರು. ಪರಮಾತ್ಮದೃಷ್ಟಿಯಿಂದ ನೋಡುವುದರಿಂದ ಅವನಲ್ಲಿ ಭೇದವಿರದು. ಇಲ್ಲಿಂದ ಮುಂದೆ ಪರಮಾತ್ಮ ಪಾತಂಜಲ ಯೋಗಸೂತ್ರದಲ್ಲಿರುವ ವಿವರಣೆಗಳನ್ನು ಭಿನ್ನವಾಗಿ, ಸುಂದರವಾಗಿ ನಿರೂಪಿಸುವನು.
