ಆದರೆ, ಏರ್ ಇಂಡಿಯಾ ಟಾಟಾ ಸಮೂಹದ ಪಾಲಾಗಿರುವುದು, ಸರ್ಕಾರಿ ಸ್ವಾಮ್ಯದ ಕಂಪನಿಗಳ ಖಾಸಗೀಕರಣಕ್ಕೆ ಮೋದಿ ಸರ್ಕಾರ ರತ್ನಗಂಬಳಿ ಹಾಸಿರುವುದರ ಮತ್ತೊಂದು ನಿದರ್ಶನ ಎಂಬ ಟೀಕೆಗಳೂ ಕೇಳಿಬಂದಿವೆ. ಇದಕ್ಕೆ ಅದಾನಿ ಮತ್ತೊಂದು ಮಗದೊಂದು ಉದಾಹರಣೆಗಳನ್ನು ವಿಪಕ್ಷಗಳ ನಾಯಕರು ನೀಡುತ್ತಿದ್ದಾರೆ. ಸರ್ಕಾರದ ಪಾಲುದಾರಿಕೆ ಇದ್ದರೆ ಸಾರ್ವಜನಿಕ ವಲಯದ ಉದ್ದಿಮೆಗಳನ್ನು ಖಾಸಗಿ ವಲಯದವರು ಖರೀದಿಸಲು ಮುಂದೆ ಬರುವುದಿಲ್ಲ ಎಂಬುದು ಏರ್ ಇಂಡಿಯಾ ವ್ಯವಹಾರದ ವೇಳೆ ಸರ್ಕಾರಕ್ಕೆ ಮನದಟ್ಟಾಗಿತ್ತು. ಹಾಗೆಂದೇ ನೂರಕ್ಕೆ ನೂರು ಪಾಲನ್ನು ಮಾರಾಟಕ್ಕಿಟ್ಟಿತು. ಭಾರತ್ ಪೆಟ್ರೋಲಿಯಂ ಮತ್ತು ಶಿಪ್ಪಿಂಗ್ ಕಾರ್ಪೆರೇಷನ್ ಆಫ್ ಇಂಡಿಯಾ ಮುಂತಾದವನ್ನು ಸಹ ಕೇಂದ್ರ ಸರ್ಕಾರ ಪರಭಾರೆಗೆ ಇಟ್ಟಿದೆ. ಇದಲ್ಲದೆ, ಬಿಪಿಸಿಎಲ್, ಪವನ್ ಹನ್ಸ್, ಸೆಂಟ್ರಲ್ ಎಲೆಕ್ಟ್ರಾನಿಕ್ಸ್, ನೀಲಾಚಲ್ ಇಸ್ಪಾತ್ ನಿಗಮ ಮುಂತಾದವು ಸಹ ಮಾರಾಟಕ್ಕೆ ಕ್ಯೂನಲ್ಲಿ ನಿಂತಿವೆ. ಖರೀದಿದಾರರು ಯಾವಾಗ ಬರುತ್ತಾರೋ ನೋಡಬೇಕು. ಹೀಗಾಗಿಯೇ ಸರ್ಕಾರಿ ಉದ್ಯಮಗಳ ಖಾಸಗೀಕರಣದ ಪರ-ವಿರೋಧ ಚರ್ಚೆಗಳು ಮತ್ತೆ ದೊಡ್ಡಮಟ್ಟದಲ್ಲಿ ನಡೆಯುತ್ತಿವೆ. ಇದರ ನಡುವೆಯೇ, ‘ಇದರಿಂದ ಏನು ತೊಂದರೆ ಇದೇರೀ? ಹೇಗೂ ಈ ಏರ್ ಇಂಡಿಯಾ ನಷ್ಟದಲ್ಲಿತ್ತು. ಸರ್ಕಾರದಿಂದ ನಡೆಸಲು ಸಾಧ್ಯವೇ ಇರಲಿಲ್ಲ. ಟಾಟಾದಂಥ ಕಂಪನಿಯ ಪಾಲಾಗಿದ್ದು ಒಳ್ಳೆಯದೇ ಆಯ್ತು ಬಿಡಿ. ಇಲ್ಲವಾದಲ್ಲಿ ಏರ್ ಇಂಡಿಯಾ ಮುಚ್ಚಿದ್ದರೂ ಅಚ್ಚರಿ ಇರಲಿಲ್ಲ. ಅದೂ ಅಲ್ಲದೆ, ಟಾಟಾ ಭಾರತೀಯ ಕಂಪನಿಯೇ ತಾನೇ? ವಿದೇಶದ್ದೇನೂ ಅಲ್ಲವಲ್ಲ?’ ಎಂದೂ ಕೆಲವರು ಪ್ರತಿಪಾದಿಸುತ್ತಾರೆ. ಇದೇನೇ ಇದ್ದರೂ, ಟಾಟಾ ಸಮೂಹ ಮತ್ತೊಂದು ನೆಗೆತಕ್ಕಂತೂ ಸಜ್ಜಾಗಿದೆ. ಟಾಟಾ ಚೇರ್ಮನ್ ಎಮರ್ಟಿಸ್ ರತನ್ ಟಾಟಾ ಮತ್ತು ಟಾಟಾ ಸಮೂಹದ ಅಧ್ಯಕ್ಷ ಎನ್.ಚಂದ್ರಶೇಖರನ್ ಅವರೆದುರು (ಕಾಪೋರೇಟ್ ವಲಯದಲ್ಲಿ ‘ಚಂದ್ರ’ ಹೆಸರಿನಿಂದ ಪರಿಚಿತರು) ಈಗ ಆಗಸದಷ್ಟೇ ಸವಾಲು ನಿಂತಿದೆ. ಈ ಜೋಡಿ ಸವಾಲಿಗೆ ಹೆದರುವವರಲ್ಲ. ಈ ಮಾತಿಗೆ ಪ್ರಬಲ ಪುರಾವೆಗಳಿವೆ. ಸೈರಸ್ ಮಿಸ್ತ್ರಿ ನೇಮಕದ ತರುವಾಯ ಅವರ ಕೆಲ ನಿರ್ಣಯಗಳು ಮತ್ತು ಕಾರ್ಯಶೈಲಿ ಬಗ್ಗೆ ಟಾಟಾ ಆಡಳಿತ ಮಂಡಳಿಯಲ್ಲಿ ಭಿನ್ನಾಭಿಪ್ರಾಯ ಉಂಟಾಗಿ, ಅವರನ್ನು ಅಧ್ಯಕ್ಷ ಸ್ಥಾನದಿಂದ ತೆಗೆದ ನಂತರದಲ್ಲಿ ಟಾಟಾ ಸಮೂಹ ಇಕ್ಕಟ್ಟಿಗೆ ಸಿಲುಕಿತ್ತು. ಆ ಹಂತದಲ್ಲಿ ರತನ್ ಟಾಟಾ ಅವರೇ ಕೆಲ ಕಾಲ ಜವಾಬ್ದಾರಿ ನಿಭಾಯಿಸಿದರೂ ಅದು ಕಾಯಂ ಪರಿಹಾರ ಆಗುವಂತಿರಲಿಲ್ಲ. ಆಗ ಅಳೆದುಸುರಿದು ಆಲೋಚಿಸಿ, ಟಾಟಾ ಸಮೂಹದ ಭಾಗವೇ ಆಗಿರುವ ಟಾಟಾ ಕನ್ಸಲ್ಟನ್ಸಿ ಸರ್ವಿಸಸ್ನ ಚುಕ್ಕಾಣಿ ಹಿಡಿದಿದ್ದ ಎನ್.ಚಂದ್ರಶೇಖರನ್ ಅವರನ್ನು ಟಾಟಾ ಸಮೂಹದ ನೇತೃತ್ವ ವಹಿಸಲು ಕರೆತರಲಾಯಿತು. ನಂತರದಲ್ಲಿ ಟಾಟಾ ಸಮೂಹದ ಕಾರ್ಯ ಎಂದಿನಂತೆ ಸಾಗಿತು. ಟಿಸಿಎಸ್ ಭಾರತದ ನಂಬರ್ ಒನ್ ಐಟಿ ಕಂಪನಿಯಾಗುವಲ್ಲಿ ಚಂದ್ರಶೇಖರನ್ ಯೋಗದಾನ ಮಹತ್ವದ್ದು. ಅಲ್ಲದೆ ರತನ್ ಟಾಟಾಗೆ ಅತ್ಯಂತ ವಿಶ್ವಾಸಿಕ ಕೂಡ.
