ದೇಹದಲ್ಲಿ 13 ಪ್ರಮುಖ ಸ್ರೋತಸ್ಗಳ ಸರಣಿ ವ್ಯವಸ್ಥೆ ಇದೆ. ಉಸಿರಾಟಕ್ಕೆ ಸಂಬಂಧಿಸಿದ ಪ್ರಾಣವಹ ಸ್ರೋತಸ್, ನೀರಿನ ಸಮತೋಲನ ಕಾಪಾಡುವ ಉದಕವಹ ಸ್ರೋತಸ್, ಜೀರ್ಣವ್ಯೂಹದ ಅನ್ನವಹ ಸ್ರೋತಸ್, ಹೃದಯ ಸಂಬಂಧಿ ಹಾಗೂ ದುಗ್ಧರಸ ಪರಿಚಲನೆಯ ರಸವಹ ಸ್ರೋತಸ್, ರಕ್ತಾಂಶಗಳ ಕಾರ್ಯ ನಿರ್ವಹಿಸುವ ರಕ್ತವಹ ಸ್ರೋತಸ್, ಮಾಂಸಧಾತುವನ್ನು ಪೋಷಿಸುವ ಮಾಂಸವಹ ಸ್ರೋತಸ್, ಮೇದೋಧಾತುವನ್ನು ಸಮಪ್ರಮಾಣದಲ್ಲಿಟ್ಟು ಕಾರ್ಯವೆಸಗುವಂತೆ ಮಾಡುವ ಮೇದೋವಹ ಸ್ರೋತಸ್, ಮೂಳೆಗಳ ಸಮರ್ಪಕ ಕ್ಷಮತೆಗೆ ನೆರವಾಗುವ ಅಸ್ಥಿವಹ ಸ್ರೋತಸ್, ಮೂಳೆಗಳ ಒಳಭಾಗದಲ್ಲಿರುವ ಅಸ್ಥಿಮಜ್ಜೆಯ ದಕ್ಷತೆಗೆ ಪೂರಕವಾಗಿರುವ ಮಜ್ಜಾವಹ ಸ್ರೋತಸ್, ಸಂತಾನೋತ್ಪತ್ತಿ ವ್ಯವಸ್ಥೆಯ ಅಂಗಗಳ ಕಾರ್ಯಕ್ಷಮತೆ ನಿರ್ವಹಿಸುವ ಶುಕ್ರವಹ ಸ್ರೋತಸ್, ಮೂತ್ರ ಉತ್ಪತ್ತಿಯಿಂದ ವಿಸರ್ಜನೆಯ ತನಕದ ವ್ಯವಸ್ಥೆ ಸುಸ್ಥಿತಿಯಲ್ಲಿಡುವ ಮೂತ್ರವಹ ಸ್ರೋತಸ್, ಮಲ ನಿರ್ವಹಣೆಗೆ ಅನುಕೂಲ ಎಸಗುವ ಮಲವಹ ಸ್ರೋತಸ್, ಬೆವರು ಸರಿಯಾದ ರೀತಿಯಲ್ಲಿ ಪ್ರವರ್ತಿಸಲು ನೆರವಾಗುವ ಸ್ವೇದವಹ ಸ್ರೋತಸ್- ಇವು ಶರೀರದ ಸಮಗ್ರ ಕ್ರಿಯೆಗಳಿಗೆ ಆಧಾರವಾಗಿ ಕಾರ್ಯನಿರ್ವಹಿಸುತ್ತವೆ. ಇವಲ್ಲದೆ ಮನೋರೋಗ ವಿವರಿಸುವಾಗ ಮನೋವಹ ಸ್ರೋತಸ್ನ ಉಲ್ಲೇಖ ಚರಕಸಂಹಿತೆಯಲ್ಲೂ, ಮೂರ್ಛಾ ರೋಗ ನಿರೂಪಣೆ ಮಾಡುವಾಗ ಸಂಜ್ಞಾವಹ ಸ್ರೋತಸ್ನ ಪ್ರಸ್ತಾಪ ಸುಶ್ರುತ ಸಂಹಿತೆಯಲ್ಲೂ ಕಾಣಸಿಗುತ್ತದೆ.
