ರಾಷ್ಟ್ರವಾದದ ಪ್ರಖರ ಬೆಳಕು: ಮಾರ್ಗರೆಟ್ ಭಾರತಕ್ಕೆ ಬಂದ ಎರಡೇ ತಿಂಗಳಲ್ಲಿ ಸ್ವಾಮೀಜಿ ಆಕೆಗೆ ದೀಕ್ಷೆ ನೀಡಿ ನಿವೇದಿತೆಯಾಗಿಸಿದರು. ನಿವೇದಿತಾ ಹಿಂದೂ ಸಮಾಜದ ಜಾಗೃತಿಗೆ ಅನಿವಾರ್ಯವಿದ್ದ ಎಲ್ಲ ಕ್ಷೇತ್ರಗಳ ಸುಧಾರಣೆಯಲ್ಲಿ ತೊಡಗಿಸಿಕೊಂಡಳು. ಹಿಂದೂ ಯುವಕರಲ್ಲಿ ಕ್ಷಾತ್ರತೇಜವನ್ನು, ದೇಶಪ್ರೇಮವನ್ನು, ಭಾರತೀಯ ಸನಾತನ ಪರಂಪರೆ, ಇತಿಹಾಸ, ಜ್ಞಾನಗಳ ಬಗ್ಗೆ ಅಭಿಮಾನವನ್ನು ತುಂಬಿದಳು. ಶಿಕ್ಷಣ ಸ್ವದೇಶೀಕರಣ, ಕಲೆ-ಸಾಹಿತ್ಯಾದಿ ಕ್ಷೇತ್ರಗಳಲ್ಲಿ ಭಾರತೀಯತೆಯ ಅನುಸಂಧಾನವನ್ನು ಸ್ಪುಟವಾಗಿ ಪ್ರತಿಪಾದಿಸಿದಳು. ಭಾರತದ ಸ್ವಾತಂತ್ರ್ಯ ಹೋರಾಟದಲ್ಲಿ ಮುಂಚೂಣಿಯಲ್ಲಿದ್ದು, ಆ ಪೀಳಿಗೆಯ ಅನೇಕ ಜನರನ್ನು ಹೋರಾಟಕ್ಕೆ ಅಣಿಗೊಳಿಸಿದಳು. ಹೀಗೆ ನಿವೇದಿತಾ ಭಾರತದ ಹೆಮ್ಮೆಯ ಪುತ್ರಿಯಾಗಿ, ವಿವೇಕಾನಂದರ ನೆಚ್ಚಿನ ಶಿಷ್ಯೆಯಾಗಿ ಬದುಕಿ, ಭಾರತಕ್ಕೆ ನಿವೇದನೆಗೊಂಡ ಶ್ರೇಷ್ಠ ಕುಸುಮವಾದಳು.
