ಜೀವನ ನಿರ್ವಹಣೆಗೆ ಹಣ ಸಂಪಾದನೆ ಮಾಡಲು ಬಯಸುವ ಬಡ, ಮಧ್ಯಮ ವರ್ಗದವರಿಗೆ ಮಹಾನಗರಗಳ ಆಸೆ ತೋರಿಸಿ, ಅಲ್ಲಿ ಒಳ್ಳೆಯ ಸಂಪಾದನೆ ಮಾಡಬಹುದು ಎಂದು ನಂಬಿಸಿ ಮೋಸ ಮಾಡುವುದು ಒಂದೆಡೆಯಾದರೆ, ಸಿನಿಮಾ, ಕಿರುತೆರೆ, ಮಾಡೆಲಿಂಗ್, ಜಾಹೀರಾತು ಎಂದೆಲ್ಲಾ ಬಣ್ಣದ ಲೋಕದ ಕನಸು ಕಾಣುತ್ತಿರುವ ಯುವತಿಯರಿಗೆ ಒಳ್ಳೆಯ ಅವಕಾಶ ನೀಡುವ ಆಮಿಷ ತೋರಿಸಲಾಗುತ್ತದೆ. ಯಾವುದಾದರೂ ಸೆಲೆಬ್ರಿಟಿಗಳ ಜತೆ ಎಂದಿಗೋ ತೆಗೆಸಿಕೊಂಡಿರುವ ಫೋಟೋಗಳನ್ನು, ಅವರ ವಿಸಿಟಿಂಗ್ ಕಾರ್ಡ್ ಗಳನ್ನು ತೋರಿಸಿ ಅವರು ತಮಗೆ ತೀರಾ ಪರಿಚಯದವರು ಎಂಬ ಮಾತಿಗೆ ಹೆಣ್ಣುಮಕ್ಕಳನ್ನು ಮೋಡಿ ಮಾಡಲಾಗುತ್ತದೆ. ಒಮ್ಮೆ ಅವರ ಮಾತು ನಂಬಿ ಅವರ ಜತೆ ನಡೆದರೆ ಮುಗಿಯಿತು, ಮತ್ತೆ ಹಿಂದಿರುಗುವ ಪ್ರಶ್ನೆಯೇ ಇಲ್ಲ!
