ಕುಡುಕ ಗಂಡ, ತುತ್ತು ಅನ್ನಕ್ಕೂ ಪರದಾಡುವ ಮಕ್ಕಳು, ಕುಡಿದು ಬಂದು ಹೊಡೆದು, ಬಡಿದು ಹಿಂಸಿಸುವ ಗಂಡ... ಇಂಥ ಸಂಸಾರಗಳೇ ಈ ಭಾಗಗಳಲ್ಲಿ ಹೆಚ್ಚು. ಅಂಥ ಸಂದರ್ಭಗಳಲ್ಲಿ ಗಾರೆ ಕೆಲಸಕ್ಕೋ, ಮನೆ ಕೆಲಸಕ್ಕೋ ಅಥವಾ ಇನ್ನಾವುದೇ ಕಚೇರಿಗಳಲ್ಲಿ ಚಿಕ್ಕಪುಟ್ಟ ಕೆಲಸ ಮಾಡಲು ಹೋದಾಗ ಅಲ್ಲಿಯೂ ಇವರ ಮೇಲೆ ಲೈಂಗಿಕ ದೌರ್ಜನ್ಯಗಳು ನಡೆಯುತ್ತವೆ. ಕೂಲಿ ಕೆಲಸಕ್ಕೆ ದುಡ್ಡು ಕೊಡಬೇಕೆಂದರೆ, ತಮ್ಮ ಜತೆ ಲೈಂಗಿಕ ಸಂಪರ್ಕ ನಡೆಸಬೇಕು ಎಂದು ಕೇಳುವ ಪುರುಷರ ನಡುವೆ ನಲುಗುವ ಮಹಿಳೆಯರೂ ಸ್ವ ಇಚ್ಛೆಯಿಂದ ಲೈಂಗಿಕ ಕಾರ್ಯಕರ್ತೆಯರಾಗಿ ದುಡಿಯುತ್ತಿದ್ದಾರೆ. ಇಂಥ ಮಹಿಳೆಯರಿಗೆ ಕೌನ್ಸೆಲಿಂಗ್ ಮಾಡಿ, ಅವರಿಗೆ ಎಲ್ಲಾ ರೀತಿಯ ಸಹಾಯ ಮಾಡುವ ನಿಟ್ಟಿನಲ್ಲಿ 2000ನೇ ಸಾಲಿನಲ್ಲಿ ಧಾರವಾಡದಲ್ಲಿ ‘ಸಾಧನಾ ಮಾನವ ಹಕ್ಕುಗಳ ಸಂಸ್ಥೆ’ ಹುಟ್ಟುಹಾಕಲಾಗಿದೆ. ನಮ್ಮ ಕೈಲಾದಷ್ಟು ಸಹಾಯ ನಾವು ಮಾಡಬಹುದು. ಆದರೆ ಇದಕ್ಕೆ ಸಂಬಂಧಿತ ಅಧಿಕಾರಿಗಳ ಸಹಾಯವೂ ಅಷ್ಟೇ ಮುಖ್ಯವಲ್ಲವೆ? ಒಳ್ಳೆಯ ಅಧಿಕಾರಿಗಳು ಬಂದಾಗ, ಮಹಿಳೆಯರ ರಕ್ಷಣೆ ಮಾಡುವುದು, ತಪ್ಪಿತಸ್ಥರಿಗೆ ಶಿಕ್ಷೆಯಾಗುವಂತೆ ಮಾಡಿದ್ದಿದೆ.
