ಎಳ್ಳು ಎಲ್ಲರೂ ಬಳಸಬಹುದಾದ ಆರೋಗ್ಯವರ್ಧಕ

ಎಳ್ಳನ್ನು ನಿಯಮಿತವಾಗಿ ಸೇವಿಸುವುದರಿಂದ ಜಠರಾಗ್ನಿ ಕೂಡ ವರ್ಧಿಸುತ್ತದೆ. ಹಾಗಾಗಿ ಎಷ್ಟೋ ರೋಗಗಳನ್ನು ಬರದಂತೆ ತಡೆಯುವ ಶಕ್ತಿ ಇದಕ್ಕಿದೆ. ಗಾಯಗಳು ಬೇಗ ಗುಣವಾಗುವಂತೆ ಮಾಡುವ ಶಕ್ತಿ ಎಳ್ಳಿಗಿದೆ. ಬೇಕೆಂದರೆ ಇದು ಧಾತುಗಳ ಶಕ್ತಿಯನ್ನು ಹೆಚ್ಚಿಸುವುದಲ್ಲದೇ ರಕ್ತ ಸಂಚಾರ ಸಲೀಸಾಗಿ ಆಗುವಂತೆ ಮಾಡುತ್ತದೆ. ಕೆಟ್ಟ ಕೊಲೆಸ್ಟ್ರಾಲನ್ನು ಕಡಿಮೆ ಮಾಡುತ್ತದೆ ಎಂಬುದನ್ನು ಆಧುನಿಕ ವಿಜ್ಞಾನ ಕೂಡ ಸಂಶೋಧನೆಗಳ ಮೂಲಕ ಒಪ್ಪಿಕೊಂಡಿದೆ. ಅಷ್ಟೇ ಅಲ್ಲದೇ ದೇಹದ ಬಲವನ್ನು ಹೆಚ್ಚಿಸುವ, ಚರ್ಮದ ಆರೋಗ್ಯವನ್ನು ವರ್ಧಿಸುವ, ಲೈಂಗಿಕ ಶಕ್ತಿಯನ್ನು ಹೆಚ್ಚಿಸುವ ಗುಣ ಕೂಡ ಎಳ್ಳಿಗೆ ಇದೆ ಎಂದು ಆಯುರ್ವೆದ ಹೇಳುತ್ತದೆ. ಎಳ್ಳುಗಳಲ್ಲಿ ಕರಿಎಳ್ಳು ಹೆಚ್ಚು ಶ್ರೇಷ್ಠವಾದದ್ದು. ಬಿಳಿ ಎಳ್ಳನ್ನೂ ಬಳಸಬಹುದು.

ಸಂಕ್ರಾಂತಿಯ ದಿನ ಎಳ್ಳಿನ ಜೊತೆಗೆ ಬೆಲ್ಲ ಕೂಡ ಬೇಕು. ಆದರೆ ಬೆಲ್ಲವೆಂದರೆ ಸಾವಯವ ಬೆಲ್ಲ ಮಾತ್ರ ಎಂಬುದನ್ನು ನೆನಪಿಟ್ಟುಕೊಳ್ಳಬೇಕು. ಸಾಮಾನ್ಯವಾಗಿ ಅಂಗಡಿಗಳಲ್ಲಿ ಸಿಗುವ ಬಿಳಿ ಅಥವಾ ಹಳದಿ ಬಣ್ಣದ ಬೆಲ್ಲವು ಹಲವು ರೀತಿಯ ರಾಸಾಯನಿಕಗಳನ್ನು ಒಳಗೊಂಡಿರುತ್ತದೆ. ಹಾಗಾಗಿ ಅಂತಹ ಬೆಲ್ಲವನ್ನು ನಾವು ಸೇವಿಸಿದರೆ ಆರೋಗ್ಯದ ಬದಲಿಗೆ ರೋಗವೇ ಬರುತ್ತದೆ. ಈಗ ಉತ್ತಮ ಗುಣಮಟ್ಟದ ನಿಜವಾದ ಸಾವಯವ ಬೆಲ್ಲದ ಗುಣಗಳನ್ನು ತಿಳಿದುಕೊಳ್ಳೋಣ. ಬೆಲ್ಲಕ್ಕೆ ದೇಹದ ಸ್ನಿಗ್ಧತೆಯನ್ನು ಹೆಚ್ಚಿಸುವ, ವಾತ ದೋಷವನ್ನು ಕಡಿಮೆ ಮಾಡುವ, ಧಾತುಗಳ ಬಲವನ್ನು ಹೆಚ್ಚಿಸುವ ಗುಣವಿದೆ ಎಂದು ಹೇಳಲಾಗಿದೆ. ಆದರೆ ಕ್ರಿಮಿಗಳನ್ನು ಹೆಚ್ಚಿಸುವ ಕೆಟ್ಟ ಗುಣವೂ ಇದೆ ಎಂಬುದನ್ನು ನೆನಪಿಟ್ಟುಕೊಳ್ಳಬೇಕು. ಆಯುರ್ವೆದ ಗ್ರಂಥಗಳಲ್ಲಿ ಹಳೆಯ ಬೆಲ್ಲಕ್ಕೆ ಬಹಳ ಮಹತ್ವವನ್ನು ಕೊಟ್ಟಿದ್ದಾರೆ. ಈ ಹಳೆಯ ಬೆಲ್ಲವನ್ನು ಸೇವಿಸುವುದರಿಂದ ಅಗ್ನಿಬಲ ಹೆಚ್ಚಿ, ಸರಿಯಾಗಿ ಮಲವಿಸರ್ಜನೆಯಾಗಿ ಜೀರ್ಣಾಂಗ ವ್ಯೂಹ ಶುದ್ಧವಾಗುತ್ತದೆ ಎಂದು ಹೇಳುತ್ತಾರೆ. ಹೃದಯಕ್ಕೆ ಇದು ಬಲವನ್ನು ಕೊಡುತ್ತದೆ. ಮೂರು ದೋಷಗಳನ್ನು ನಿಯಂತ್ರಿಸುತ್ತದೆ.

ಬೆಲ್ಲದಲ್ಲಿ ಕ್ಯಾಲ್ಸಿಯಂ, ಕಬ್ಬಿಣ, ಮ್ಯಾಗ್ನಿಸಿಯಂ, ಪೊಟಾಶಿಯಂ, ಸೆಲಿನಿಯಂನಂತಹ ಪೋಷಕಾಂಶಗಳು ಹೇರಳವಾಗಿ ಸಿಗುತ್ತವೆ. ಈ ಎಲ್ಲ ಕಾರಣಗಳಿಂದ ನಾವು ಈ ಸಂಕ್ರಾಂತಿಯಿಂದ ಸಕ್ಕರೆಯ ಬದಲಿಗೆ ಸಾವಯವ ಬೆಲ್ಲವನ್ನು ಬಳಸೋಣ. ಎಳ್ಳು, ಬೆಲ್ಲ ಮತ್ತು ವಿವಿಧ ರೀತಿಯ ನಟ್ ಗಳನ್ನು ಬಳಸಿ ಎಳ್ಳುಂಡೆ ಮಾಡಿ ನಾವೆಲ್ಲಾ ಸದಾ ಸವಿಯೋಣ. ಮಧುಮೇಹಿಗಳು ಕೂಡ ತಮ್ಮ ರಕ್ತದಲ್ಲಿನ ಸಕ್ಕರೆಯ ಅಂಶವನ್ನು ಸರಿಯಾಗಿ ನಿಯಂತ್ರಣದಲ್ಲಿ ಇಟ್ಟುಕೊಂಡು ಉಳಿದ ಕಾಬೋಹೈಡ್ರೇಟ್ ಆಹಾರಗಳನ್ನು ತ್ಯಜಿಸಿ ಈ ಎಳ್ಳುಂಡೆಯನ್ನು ಸವಿಯಬಹುದು.

https://www.vijayavani.net/woman-finds-luggage-4-years-after-losing-it/

https://www.vijayavani.net/man-stabbed-relatives-for-telling-to-him-that-take-care-of-wife/