ಹೆಸರಿಗೆ ಪ್ರತಿಷ್ಠಿತ ಕಂಪನಿಯಾಗಿದ್ದರೂ ಪ್ರತಿಭೆಗೆ ತಕ್ಕ ಪ್ರೋತ್ಸಾಹ ಸಿಗದಿದ್ದಾಗ, ಏನಾದರೂ ಸಾಧಿಸಲೇಬೆಕೆಂದು ಹಠತೊಟ್ಟ ಯುವಕನೊಬ್ಬ ಇದೀಗ ಸ್ವಾವಲಂಭಿಯಾಗಿ ದ್ವಿಚಕ್ರ ವಾಹನ ಹಾಗೂ ಕೃಷಿ ಯಂತ್ರೋಪಕರಣಗಳನ್ನು ಸ್ವತಃ ತಯಾರಿಸುವ ಕಾರ್ಯದಲ್ಲಿ ನಿರತನಾಗಿದ್ದಾನೆ. ಕೊಡಗು ಜಿಲ್ಲೆ ಮಡಿಕೇರಿ ತಾಲೂಕಿನ ಬಿಳಿಗೇರಿಯ ಎನ್.ಕೆ.ಆಕಾಶ್ ಈ ಸಾಧಕ. ತನ್ನ ಮನೆಯ ಅಂಗಳದಲ್ಲೇ ಗ್ಯಾರೇಜ್ ಮಾಡಿಕೊಂಡಿದ್ದು, ಮಿನಿ ಬೈಕ್, ಕೃಷಿಕರಿಗೆ ಉಪಯೋಗವಾಗುವ ಹಲವು ಯಂತ್ರೋಪಕರಣಗಳನ್ನು ತಯಾರಿಸಿ ಯಶಸ್ವಿಯಾಗಿದ್ದಾರೆ. ಚಿಕ್ಕ ವಯಸ್ಸಿನಿಂದಲೂ ಮೆಕ್ಯಾನಿಕಲ್ನಲ್ಲಿ ಅತೀವ ಆಸಕ್ತಿ ಹೊಂದಿದ್ದ ಆಕಾಶ್, ಸಣ್ಣಪುಟ್ಟ ಬೈಕ್ಗಳನ್ನು ತಯಾರಿಸಿದ್ದರು. ಬೇರೆ ಬೇರೆ ಕಂಪನಿಗಳ ಬೈಕ್ ಹಾಗೂ ಕಾರುಗಳನ್ನು ನೋಡುವಾಗ ತನಗೂ ಈ ರೀತಿ ಮಾಡಬೇಕೆಂಬ ಉತ್ಸಾಹ ಬಂತು. ಕ್ಯಾಂಪಸ್ ಸೆಲೆಕ್ಷನ್ನಲ್ಲಿ ಆಯ್ಕೆಯಾಗಿ ಟಾಟಾ ಮೋಟಾರ್ಸ್, ಮಾರುತಿ, ಬೋಶ್, ಟಿವಿಎಸ್ ಸೇರಿ ಹಲವು ಪ್ರತಿಷ್ಠಿತ ಸಂಸ್ಥೆಗಳಲ್ಲಿ ಕೆಲಸ ಮಾಡಿ ಅನುಭವ ಪಡೆದುಕೊಂಡು ಇದೀಗ ಸ್ವಂತ ಉದ್ಯಮ ಆರಂಭಿಸಲು ನಿರ್ಧಾರ ತೆಗೆದುಕೊಂಡಿದ್ದಾರೆ. ಆಕಾಶ್ ಮನೆಯ ಅಂಗಳದ ಶೆಡ್ನಲ್ಲಿ ಬೈಕ್ ಹಾಗೂ ಕೃಷಿ ಯಂತ್ರೋಪಕರಣಗಳನ್ನು ತಯಾರಿಸುವಲ್ಲಿ ನಿರತರಾಗಿದ್ದಾರೆ. ಮೋಟಾರ್ ಸ್ಕೂೕಟರ್ಗಳಲ್ಲಿ ಹೆಸರಾಗಿರುವ ಗೋಕಾರ್ಟ್ ಅನ್ನು ತಾವೇ ತಯಾರಿಸುವ ಮೂಲಕ ಗಮನ ಸೆಳೆದಿದ್ದಾರೆ. ಆರಂಭದಲ್ಲಿ ಪೆಡಲ್ ಮಾಡುವ ವಾಹನವನ್ನು ನಿರ್ವಿುಸಿದ್ದರು. ತನ್ನ ಅಜ್ಜ ಮಹಾಭಲೇಶ್ವರ ಭಟ್, ಈ ವಾಹನ ಅಂಗಳದಲ್ಲಿ ಮಾತ್ರ ಓಡಿಸಲು ಸಾಧ್ಯ. ರಸ್ತೆಗೆ ಹೋಗಲು ಸಾಧ್ಯವೇ ಎಂದು ಪ್ರಶ್ನಿಸಿದ್ದರು. ಇದರಿಂದ ಆಕಾಶ್ ಹೊಸ ಪ್ರಯೋಗಗಳನ್ನು ಮಾಡಲು ತೊಡಗಿಸಿಕೊಂಡರು. ಮಿನಿ ಬೈಕ್, ಕೃಷಿ ಯಂತ್ರೋಪಕರಣಗಳನ್ನೂ ಮಾಡಿ ಸಾಧನೆ ಮಾಡಿದರು. ಮುಂದಿನ ದಿನಗಳಲ್ಲಿ ಹಲವು ಮಾದರಿಯ ವಾಹನಗಳು ಹಾಗೂ ಕೃಷಿ ಯಂತ್ರೋಪಕರಣಗಳನ್ನು ನಿರ್ವಿುಸಬೇಕೆಂಬ ಉದ್ದೇಶವನ್ನು ಆಕಾಶ್ ಹೊಂದಿದ್ದಾರೆ. ಈವರೆಗೆ ಆರು ಬೈಕ್ಗಳನ್ನು ನಿರ್ವಿುಸಿದ್ದು, ಹೋಂಸ್ಟೇ, ರೆಸಾರ್ಟ್ಗಳಲ್ಲಿ ಮನರಂಜನೆಗಾಗಿ ಓಡಿಸುವ ವಾಹನಗಳನ್ನು ತಯಾರಿಸಿದ್ದಾರೆ.
