ಕೂರ್ವವತಾರದಲ್ಲಿನ ಸಮುದ್ರಮಂಥನವನ್ನು ಜ್ಞಾನಮಂಥನ ಎಂದು ಅರ್ಥೈಸಿಕೊಳ್ಳಬೇಕು ಎಂದರು. ಅರ್ಥವಾಗದೆ ನಾನು ಪ್ರಶ್ನಾರ್ಥಕವಾಗಿ ಅವರೆಡೆ ನೋಡಿದೆ. ಆಗಿನ ಕಾಲದ ಋಷಿಗಳಿಗೆ ಯಾವ ಯಾವ ವಿಷಯಗಳಲ್ಲಿ ಪರಿಣತಿ ಇತ್ತೆಂದು ಸೂಚಿಸುತ್ತದೆ ಎಂದರು. ಉದಾಹರಣೆಗೆ ಚಂದ್ರನ ಬಗ್ಗೆ ಅಧ್ಯಯನ, ಹಸುವಿನ ಹಾಲಿನ ಉಪಯೋಗಗಳು, ಪಾರಿಜಾತ ಹೂವಿನ ಗಿಡದ ಔಷಧೀಯ ಗುಣಗಳು, ವಜ್ರ ಹರಳು ಕೌಸ್ತುಭ ಮಣಿಯ ಗಣಿಗಾರಿಕೆ, ಅಪ್ಸರೆಯರ ಮೂಲಕ ನೃತ್ಯ ಶಾಸ್ತ್ರದ ಆವಿಷ್ಕಾರ, ಲಕ್ಷ್ಮಿಯ ಮೂಲಕ ದುಡ್ಡಿನ ವ್ಯವಹಾರ, ವಿಷದ ಬಗೆಗಿನ ಅರಿವು, ಮದ್ಯ, ಆನೆ ಕುದುರೆಗಳನ್ನು ಪಳಗಿಸುವಿಕೆ, ಅತ್ಯಂತ ಶ್ರೇಷ್ಠವಾದ ಧನ್ವಂತರಿ ಅಂದರೆ ಔಷಧ ಬಗೆಗಿನ ಆಳವಾದ ಜ್ಞಾನ ಇವಿಷ್ಟು ಆಗಿನಕಾಲದ ಋಷಿಗಳಿಗೆ ಗೊತ್ತಿತ್ತು ಎಂದು ತಿಳಿಸಿದರು. ಹೇಗೆ ವಾಯೇಜರ್ ಎಂಬ ಬಾಹ್ಯಾಕಾಶ ನೌಕೆಯೊಳಗೆ ಭೂಮಿಯ ಮೇಲಿನ ಜೀವನ ಮತ್ತು ಸಂಸ್ಕೃತಿಯ ವೈವಿಧ್ಯವನ್ನು ಫೋನೋಗ್ರಾಫ್ನಲ್ಲಿ ಧ್ವನಿ ಹಾಗೂ ಚಿತ್ರದ ಮೂಲಕ ರೆಕಾರ್ಡ್ ಮಾಡಿ ಸಂದೇಶವನ್ನು ಬಾಹ್ಯಾಕಾಶ ಇತರ ಜೀವಿಗಳಿಗೆ ತಿಳಿಯಲೆಂದು ವಿಶಿಷ್ಟವಾದ ಟೈಮ್ ಕ್ಯಾಪ್ಸುಲ್ ಸಾಗಿಸಲಾಗಿತ್ತೋ ಅದೇ ರೀತಿ ಸಮುದ್ರ ಮಂಥನವನ್ನು ನೋಡಬೇಕೆಂದರು. ಖಗೋಳ ವಿಜ್ಞಾನಿಗಳಿಗೆ ಗೊತ್ತಿರುವ ಹಾಗೆ ಭೂಮಿ ಅದರ ಕಕ್ಷೆಯಿಂದ ಹಲವು ಬಾರಿ ದೂರ ಸರಿದಿತ್ತು, ಮತ್ತೆ ಕಕ್ಷೆಗೆ ಬಂದು ಸೇರಿತ್ತು. ವರಾಹ ಅವತಾರದಲ್ಲಿ ಇರುವುದು ಇದೇ ಖಗೋಳ ಘಟನೆ ಎಂದರು.
