ಸ್ಯಾಟಲೈಟ್ ಇಂಟರ್​ನೆಟ್; ಹೊಸ ತಲೆಮಾರಿನ ಮೂಲಸೌಕರ್ಯ

| ಉಮೇಶ್ ಕುಮಾರ್ ಎಸ್. ಬೆಂಗಳೂರು

ಬದುಕಿನ ಅವಿಭಾಜ್ಯ ಅಂಗಗಳು ಯಾವುದು ಎಂದರೆ ‘ಗಾಳಿ, ಬೆಳಕು, ನೀರು....’ ಹೇಳುತ್ತಿದ್ದ ಕಾಲ ಒಂದಿತ್ತು. ಡಿಜಿಟಲ್ ಯುಗದಲ್ಲಿ ಜನರ ಬದುಕನ್ನು ವಿಶೇಷವಾಗಿ ಯುವ ತಲೆಮಾರಿನ ಬದುಕನ್ನು ಗಮನಿಸಿದರೆ, ಮೊಬೈಲ್, ಲ್ಯಾಪ್​ಟಾಪ್, ಟ್ಯಾಬ್​ಗಳು ಮೈಗಂಟಿಕೊಂಡೇ ಇರುತ್ತವೆ. ಇಂಟರ್​ನೆಟ್ ಇವುಗಳಿಗಷ್ಟೇ ಅಲ್ಲ, ಜನರಿಗೂ ಉಸಿರಿನಂತಾಗಿಬಿಟ್ಟಿದೆ. ಏಳೆಂಟು ಬಗೆಯ ಇಂಟರ್​ನೆಟ್ ಸೇವೆಯಲ್ಲಿ ಈಗ ಜಗತ್ತಿನ ಗಮನಸೆಳೆಯುತ್ತಿರುವುದು ಸ್ಯಾಟಲೈಟ್ ಇಂಟರ್​ನೆಟ್.

 ಡಿಜಿಟಲ್ ಜಗತ್ತು ಬಹಳ ವೇಗವಾಗಿ ಬೆಳೆಯುತ್ತಿದೆ. ಇಂಟರ್​ನೆಟ್ ಬಳಕೆದಾರರ ಸಂಖ್ಯೆಯೂ ಅದೇ ವೇಗದಲ್ಲಿ ವೃದ್ಧಿಯಾಗುತ್ತಿದೆ. ಡಿಜಿಟಲ್ ಜಗತ್ತು ಪ್ರವೇಶಿಸಿದವರು ಗೊತ್ತಿದ್ದೊ ಗೊತ್ತಿಲ್ಲದೆಯೋ ಅಪ್ಡೇಟ್ ಆಗುತ್ತಿದ್ದಾರೆ. ಮೆಟಾವರ್ಸ್ ಎಂಬ ಪರ್ಯಾಯ ಪ್ರಪಂಚದ ಬಗ್ಗೆ ಫೇಸ್​ಬುಕ್, ಮೈಕ್ರೋಸಾಫ್ಟ್ ಮತ್ತು ಇತರೆ ಕಂಪನಿಗಳು ಇತ್ತೀಚೆಗಷ್ಟೆ ಗಮನಸೆಳೆದಿದ್ದವು. ಇಂತಹ ಡಿಜಿಟಲ್ ಜಗತ್ತಿನ ಉಸಿರು ಇಂಟರ್​ನೆಟ್. ಇದು ಇಲ್ಲದೆ ಇಲ್ಲಿ ಯಾವುದೇ ವಹಿವಾಟು ಇರಲ್ಲ. ಜಗತ್ತಿನ ಇಂಟರ್​ನೆಟ್ ಬಳಕೆದಾರರ ಸಂಖ್ಯೆ ಗಮನಿಸಿದರೆ ಶೇಕಡ 70ರಷ್ಟು ಬಳಕೆದಾರರು ಯುವಜನರು. ಸಾಮಾಜಿಕ ಜಾಲತಾಣಗಳನ್ನೊಮ್ಮೆ ಇಣುಕಿ ನೋಡಿದರೆ ಇಂಟರ್​ನೆಟ್ ಸೇವೆ ಸರಿಯಾಗಿ ಲಭ್ಯವಿಲ್ಲದಿರುವ ಬಗ್ಗೆ ಒಂದಿಲ್ಲೊಂದು ದೂರು ದುಮ್ಮಾನಗಳು ಗೋಚರಿಸುತ್ತವೆ. ಪರಿಹಾರ ಏನು? ಎಂದು ಕೇಳಿದರೆ, ಡಯಲ್ ಅಪ್ ಇಂಟರ್​ನೆಟ್ ಸೇವೆಯಿಂದ ಹಿಡಿದು ಇತ್ತೀಚಿನ ಸ್ಯಾಟಲೈಟ್ ಇಂಟರ್​ನೆಟ್ ತನಕ ಇಂಟರ್​ನೆಟ್ ಸೇವೆ ಬೆಳೆದು ಬಂದ ದಾರಿಯೇ ಪರಿಹಾರ ಸೂಚಕವಾಗಿ ಕಣ್ಣಿಗೆ ಗೋಚರಿಸುತ್ತದೆ. ಬದಲಾಗುತ್ತಿರುವ ಡಿಜಿಟಲ್ ಜಗತ್ತಿನಲ್ಲಿ ಸ್ಯಾಟಲೈಟ್ ಇಂಟರ್​ನೆಟ್ ಹೆಚ್ಚಿನ ಗಮನ ಸೆಳೆಯುತ್ತಿದೆ. ಜಗತ್ತಿನ ಅತ್ಯಂತ ಶ್ರೀಮಂತ ಉದ್ಯಮಿ ಎಲಾನ್ ಮಸ್ಕ್ ಈಗಾಗಲೇ ಸ್ಯಾಟಲೈಟ್ ಇಂಟರ್​ನೆಟ್​ನ ‘ಬೀಟಾ’ ಸೇವೆ ಒದಗಿಸುತ್ತಿದ್ದಾರೆ. ಅಮೆಜಾನ್ ಸಂಸ್ಥಾಪಕ ಜೆಫ್ ಬೆಜೋಸ್ ಕೂಡ ಈ ಸೇವೆ ಒದಗಿಸಲು ಸಿದ್ಧತೆ ನಡೆಸಿದ್ದಾರೆ. ಭಾರ್ತಿ ಏರ್​ಟೆಲ್ ಸೇರಿ ಇತರೆ ಕೆಲವು ಕಂಪನಿಗಳು ಕೂಡ ಸ್ಯಾಟಲೈಟ್ ಇಂಟರ್​ನೆಟ್ ಸೇವೆ ಒದಗಿಸಲು ಮುಂದಾಗಿವೆ.

ಭಾರತದಲ್ಲಿ ಮುಂದಿನ ವರ್ಷ ಸೇವೆ?: ಇಂಟರ್​ನೆಟ್ ಮೂಲಸೌಕರ್ಯದ ಕೊರತೆ ಕಾರಣ ನಗರ ಮತ್ತು ಗ್ರಾಮಗಳ ನಡುವೆ ಡಿಜಿಟಲ್ ಕಂದಕ ಏರ್ಪಟ್ಟಿದೆ ಎಂಬ ವಾದ ಇತ್ತೀಚೆಗೆ ಸರ್ವೆಸಾಮಾನ್ಯ. ಇದನ್ನು ನೀಗಿಸುವ ನಿಟ್ಟಿನಲ್ಲಿ ಭಾರತ ಸರ್ಕಾರ ಕ್ರಮಗಳನ್ನು ತೆಗೆದುಕೊಂಡಿದೆ. ಇನ್ನೊಂದೆಡೆ, ಸರ್ಕಾರ ಅನುಮತಿ ನೀಡಿದರೆ ಮುಂದಿನ ವರ್ಷ ಅಂತ್ಯದೊಳಗೆ ಸ್ಯಾಟಲೈಟ್ ಇಂಟರ್​ನೆಟ್ ಸೇವೆ ಭಾರತದಲ್ಲಿ ಒದಗಿಸುವುದಾಗಿ ಎಲಾನ್ ಮಸ್ಕ್ ಅವರ ಎಸ್​ಎಸ್​ಸಿಪಿಎಲ್ -ಸ್ಟಾರ್​ಲಿಂಕ್ ಕಂಪನಿ ಘೋಷಿಸಿದೆ. ಇದರಂತೆ, ಭಾರತ ಸರ್ಕಾರದ ಅನುಮತಿ ಸಿಕ್ಕರೆ 2022ರ ಡಿಸೆಂಬರ್ ವೇಳೆಗೆ 2 ಲಕ್ಷ ಟರ್ವಿುನಲ್​ನೊಂದಿಗೆ ಉಪಗ್ರಹ ಇಂಟರ್​ನೆಟ್ ಸಕ್ರಿಯವಾಗಲಿದೆ.

ಹೇಗೆ ಕೆಲಸ ಮಾಡುತ್ತೆ?: ಎಲಾನ್ ಮಸ್ಕ್ ಅವರ ಸ್ಟಾರ್ ಲಿಂಕ್ ಉಪಗ್ರಹ ಗಳು ಲೇಸರ್​ಗಳನ್ನು ಬಳಸುತ್ತವೆ. ಸಂವಹನ ಜಾಲವು ಡೇಟಾವನ್ನು ಕಳುಹಿಸುವ ಮತ್ತು ಸ್ವೀಕರಿಸುವ ಕೆಲಸ ಮಾಡುತ್ತದೆ. ಈ ಡೇಟಾ ವನ್ನು ಬಳಕೆದಾರರು ತಮ್ಮಲ್ಲಿರುವ ಉಪಕರಣಗಳ ಬಳಕೆಗೆ ಸ್ಯಾಟಲೈಟ್ ಡಿಶ್, ಮಾಡೆಮ್ಳ ಮೂಲಕ ಸ್ವೀಕರಿಸಿ ಬಳಸಬಹುದು. ಇದಕ್ಕಾಗಿ ಎನ್​ಒಸಿ ಅಥವಾ ನೆಟ್​ವಕ್ ಆಪರೇಶನ್ ಸೆಂಟರ್​ಗಳನ್ನು ಕಂಪನಿ ಸ್ಥಾಪಿಸುತ್ತಿದೆ.

ಉಪಕರಣಗಳು ಏನು ಬೇಕು?: ಸ್ಯಾಟಲೈಟ್ ಇಂಟರ್​ನೆಟ್ ಪಡೆಯಬೇಕಾದರೆ ಸ್ಯಾಟಲೈಟ್ ಡಿಶ್, ಮಾಡೆಮ್​ರೂಟರ್ ಅಗತ್ಯವಿದೆ. ಸ್ಟಾರ್​ಲಿಂಕ್ ಕಂಪನಿಯು ಇವುಗಳ ಕಿಟ್ ಅನ್ನು ಮಾರಾಟ ಮಾಡುತ್ತಿದೆ.

ದರ ಎಷ್ಟು?: ಭಾರತದಲ್ಲಿ ಈಗಾಗಲೇ 5,000ಕ್ಕೂ ಹೆಚ್ಚು ಜನ ಇಂಟರ್​ನೆಟ್ ಸೇವೆ ಬೇಕೆಂದು ಪ್ರೀ-ಆರ್ಡರ್ ಮಾಡಿದ್ದಾರೆ. ಕಂಪನಿ ಪ್ರತಿ ಗ್ರಾಹಕರಿಂದ 7,350 ರೂಪಾಯಿ (99 ಅಮೆರಿಕನ್ ಡಾಲರ್) ಅನ್ನು ಠೇವಣಿಯಾಗಿ ಪಡೆದುಕೊಳ್ಳುತ್ತಿದೆ. ಪ್ರಾಯೋಗಿಕ ಹಂತದಲ್ಲಿ ಡೇಟಾ ಸ್ಪೀಡ್ ಸೆಕೆಂಡ್​ಗೆ 50ರಿಂದ 150 ಮೆಗಾಬಿಟ್ ಇರಲಿದೆ ಎಂದು ಎಂದು ಕಂಪನಿಯ ಭಾರತದ ಕಂಟ್ರಿ ಡೈರೆಕ್ಟರ್ ಸಂಜಯ್ ಭಾರ್ಗವ ತಿಳಿಸಿದ್ದಾರೆ.

ಎಷ್ಟು ಪ್ರಯೋಜನಕಾರಿ?: ಗ್ರಾಮೀಣ ಭಾರತದ ಹಿಂದುಳಿದ ಪ್ರದೇಶಗಳಲ್ಲಿ ಇಂದಿಗೂ ಮೊಬೈಲ್ ನೆಟವರ್ಕ್ ಬಿಡಿ, ಸಾಮಾನ್ಯ ದೂರವಾಣಿಯೇ ಸರಿಯಾಗಿ ಕೆಲಸ ಮಾಡಲ್ಲ. ಇಂತಹ ಸನ್ನಿವೇಶದಲ್ಲಿ ‘ನಿಯತ’ ಇಂಟರ್​ನೆಟ್ ಸೇವೆ ಕನಸಿನ ಮಾತೇ ಸರಿ. ಸ್ಯಾಟಲೈಟ್ ಇಂಟರ್​ನೆಟ್ ಸೇವೆಯ ಮೂಲಕ ಗ್ರಾಮೀಣ ಭಾಗದಲ್ಲೂ 10-40 ಎಂಬಿಪಿಎಸ್ ವೇಗದ ಇಂಟರ್​ನೆಟ್ ಪಡೆಯಬಹುದು. ಇದರ ಗರಿಷ್ಠ ವೇಗ 300 ಎಂಬಿಪಿಎಸ್ ಎಂದು ಅಂದಾಜಿಸಲಾಗಿದೆ.

ಮಳೆಗಾಳಿ ಇದ್ರೆ ಏನು ಕಥೆ?: ಉಪಗ್ರಹ ಚಾನೆಲ್​ಗಳಂತೆಯೇ ತೀವ್ರ ಮಳೆ, ಗಾಳಿ ಮುಂತಾದ ಹವಾಮಾನ ವೈಪರೀತ್ಯ ಇದ್ದರೆ ಸ್ಯಾಟಲೈಟ್ ಡಿಶ್ ಸರಿಯಾಗಿ ಕೆಲಸ ಮಾಡಲ್ಲ. ಇಂಟರ್​ನೆಟ್ ಸೇವೆಯಲ್ಲಿ ಅಡಚಣೆ ಉಂಟಾಗಬಹುದು ಎಂದು ಸ್ಟಾರ್​ಲಿಂಕ್ ಕಂಪನಿ ಸ್ಪಷ್ಟಪಡಿಸಿದೆ.

ಉಪಗ್ರಹ ಟಿವಿ ಚಾನೆಲ್​ನಂತೆ: ಉಪಗ್ರಹ ಆಧಾರಿತ ಟಿವಿ ಚಾನೆಲ್​ಗಳಂತೆಯೇ ಸ್ಯಾಟಲೈಟ್ ಇಂಟರ್​ನೆಟ್​ಗೂ ಮನೆಯ ಮೇಲೆ ಛಾವಣಿಯಲ್ಲಿ ಸ್ಯಾಟಲೈಟ್ ಡಿಶ್ ಬೇಕು. ಇದನ್ನು ಸ್ಥಾಪಿಸಿದರೆ ಮಾತ್ರವೇ ಉಪಗ್ರಹದಿಂದ ಬಾಹ್ಯಾಕಾಶದಿಂದ ಇಂಟರ್​ನೆಟ್ ಪಡೆಯಲು ಸಾಧ್ಯ. ಇದಕ್ಕೆ ಪ್ರತ್ಯೇಕ ಕೇಬಲ್ ಏನೂ ಬೇಕಾಗಿಲ್ಲ. ಬಾಹ್ಯಾಕಾಶದ ಕಕ್ಷೆಯಲ್ಲಿ ಇಂಟರ್​ನೆಟ್ ಒದಗಿಸುವ ಉಪಗ್ರಹಗಳು ಸಂಚರಿಸುವ ಕಾರಣ ಅದರಿಂದ ಸಂಕೇತಗಳ ರೂಪದಲ್ಲಿ ಇಂಟರ್​ನೆಟ್ ಡಿಶ್​ಗೆ ‘ನೇರ’ ರವಾನೆಯಾಗುತ್ತದೆ.

https://www.vijayavani.net/puneet-rajkumar-announces-national-level-siddashree-award/

https://www.vijayavani.net/five-relatives-of-sushant-singh-rajput-killed-in-road-accident/