‘ಛತ್ರಪತಿ’ ತೆಲುಗು ಚಿತ್ರದ ಬಾಲಿವುಡ್ ಅವತರಣಿಕೆಯಲ್ಲಿ ನಟಿಸಲು ಸಜ್ಜಾಗುತ್ತಿರುವ ಪಲ್ಲವಿ, ಕನ್ನಡದಲ್ಲೂ ನಟಿಸುತ್ತಾರೆಂಬ ವದಂತಿಗಳಿವೆ. ಆದರೆ, ಒಂದಂತೂ ನಿಜ. ಬಂದ ಅವಕಾಶಗಳನ್ನೆಲ್ಲ ಆಕೆ ಒಪ್ಪಿಕೊಳ್ಳುವುದಿಲ್ಲ. ಎಲ್ಲ ಪ್ರಮುಖ ಹೀರೋಗಳ ಜತೆ ನಟಿಸಿಬಿಡಬೇಕು ಎಂಬ ಹಪಾಹಪಿಯಾಗಲೀ, ಹೆಚ್ಚು ಚಿತ್ರಗಳಲ್ಲಿ ಕಾಣಿಸಿಕೊಳ್ಳಬೇಕು ಎಂಬ ಧಾವಂತವಾಗಲೀ ಅವರಿಗಿಲ್ಲ. ಆದರೆ, ನಟಿಸಿದ ಚಿತ್ರಗಳಲ್ಲಿ, ಪಾತ್ರಗಳಲ್ಲಿ ಪಲ್ಲವಿಯ ಛಾಪು ಇರಲೇಬೇಕು. ಉದ್ದುದ್ದ ಡೈಲಾಗ್ ಹೇಳುವುದಿರಲಿ, ಸಂಭಾಷಣೆಯೇ ಇಲ್ಲದೆ ಕೇವಲ ಕಣ್ಣಿನಲ್ಲಿ, ಮುಖಭಾವದಲ್ಲಿ, ಮೌನದಲ್ಲಿ, ಶೋಕದಲ್ಲಿ, ಮಂದಹಾಸದಲ್ಲಿ ನೋಡುಗರನ್ನು ಹಿಡಿದಿಡುವ ಅದ್ಭುತ ಶಕ್ತಿ, ಛಾತಿ ಅವರಲ್ಲಿದೆ. ಯಾವ ಭಾಷೆಯ ಚಿತ್ರ ಮಾಡಿದರೂ, ಆ ಭಾಷೆಯ ಸೊಗಡು ಅರಿತುಕೊಂಡು ತಾನೇ ಡಬ್ಬಿಂಗ್ ಮಾಡಬೇಕೆನ್ನುವ ಹಟ ಅವರ ಪಾತ್ರಗಳ ತೂಕ ಹೆಚ್ಚಿಸಿದೆ. ಭಾವಸೂಕ್ಷ್ಮಗಳ ಮನೋಜ್ಞ ಭೂಮಿಕೆಗೆ ಜೀವ ತುಂಬಿದ ‘ದಿಯಾ’ದಂಥ ತಮಿಳು ಚಿತ್ರವಿರಲಿ, ಲವಲವಿಕೆಯ ಪಾತ್ರದಲ್ಲಿ ದೀಪಾವಳಿಯ ಬೆಳಕು ಮೂಡಿಸುವ ‘ಫಿದಾ’ದಂಥ ತೆಲುಗು ಚಿತ್ರವಿರಲಿ, ಹಾಸ್ಯ, ಅಭಿನಯ, ನೃತ್ಯ ಮೇಳೈಸಿದ ‘ಮಾರಿ-2’ದಂಥ ಜನಪ್ರಿಯ ಚಿತ್ರವಿರಲಿ, ಪಲ್ಲವಿಗೆ ಲೀಲಾಜಾಲ.
