ಕೊನೆಯದಾಗಿ Dissection. ಇದಕ್ಕೆ ‘ಛೇದನ’ ಎಂಬ ಪದವನ್ನು ಸೂಚಿಸಿ ನೂರಕ್ಕೂ ಹೆಚ್ಚು ಪ್ರವೇಶಿಕೆಗಳು ಬಂದಿವೆ. ಜೀವಶಾಸ್ತ್ರ ಪಠ್ಯಪುಸ್ತಕಗಳ ಕನ್ನಡ ಆವೃತ್ತಿಯಲ್ಲಿ ಇದು ಬಳಕೆಯಾಗಿದೆ ಎಂದು ಕೆಲವರು ತಿಳಿಸಿದ್ದಾರೆ. ಹತ್ತನೆಯವರೆಗೆ ಕನ್ನಡ ಮಾಧ್ಯಮದಲ್ಲಿ ಕಲಿತ ನನ್ನಂಥವರಿಗೆ ಜೀವಶಾಸ್ತ್ರದಲ್ಲಿ ಛೇದನ ಅಷ್ಟೇಅಲ್ಲ, ‘ಅಡ್ಡ ಕೊಯ್ತ’, ‘ಉದ್ದ ಕೊಯ್ತ’ಗಳು, ಗಣಿತದಲ್ಲಿ ಗಣಪದ್ಧತಿಯಲ್ಲಿ ‘ಛೇದನ ಗಣ’, ‘ವೆನ್ನನ ನಕ್ಷೆ’ ಸಹ ನೆನಪಿರುತ್ತವೆ. ಸ್ವಾರಸ್ಯವೇನೆಂದರೆ Dissection ಮೂಲತಃ ಇದ್ದದ್ದು- ಅಂಗಾಂಶ ಪರೀಕ್ಷೆಗಾಗಿ ಪ್ರಾಣಿ ಅಥವಾ ಸಸ್ಯವನ್ನು ತುಂಡರಿಸುವ ಪ್ರಕ್ರಿಯೆ ಎಂಬರ್ಥದಲ್ಲೇ. ಕ್ರಮೇಣ, ಸಸ್ಯ ಅಥವಾ ಪ್ರಾಣಿಯೇ ಆಗಬೇಕಿಲ್ಲ, ಯಾವುದೇ ವಸ್ತು ಅಥವಾ ವಿಷಯದ ಕೂಲಂಕಷ ಅರಿಕೆಗಾಗಿ ಪ್ರತ್ಯೇಕ ಭಾಗಗಳಾಗಿಸುವುದನ್ನೂ Dissection ಎನ್ನಲಾಯಿತು. ಈ ದೃಷ್ಟಿಯಿಂದ ‘ತುಂಡರಿಕೆ’ (ಭಾಗ್ಯಶ್ರೀ ಕೆ.ಸಿ, ಮಧುರಾ ಮಂಗಳೂರು, ಸಂಯಮ ಭಟ್, ರಾಜೇಂದ್ರ ದೇಶಪಾಂಡೆ, ಸತ್ಯಮಾಧವ ಲಿಂಗದಹಳ್ಳಿ, ಅನಸೂಯಾ ಜಗದೀಶ್, ಶಾಂತಿನಿ ಮಂಜುನಾಥ್, ಎನ್.ಎಚ್.ದೇಶಪಾಂಡೆ ಮುಂತಾದವರು) ಪದ ಗಮನಾರ್ಹವಾಗಿದೆ. ಅದೇ ತರ್ಕದಿಂದ ‘ಕುಯ್ದರಿಕೆ’ (ಪ್ರಕಾಶ್ ಬಿ), ‘ಸೀಳುಪರೀಕ್ಷೆ’ (ರಂ.ಗು.ಶ್ರೀನಿವಾಸ), ಮತ್ತು ‘ಛೇದಾಧ್ಯಯನ’ (ಎ.ಬಿ.ಪ್ರಕಾಶ್) ಸಹ. ಬೆಂಗಳೂರಿನಲ್ಲಿ ವೈದ್ಯರಾಗಿರುವ ಡಾ.ಕಿರಣ ಪೇಟಕರ ಇಲ್ಲೊಂದು ಭಾಷಾಸೂಕ್ಷ್ಮದ ಬಗ್ಗೆಯೂ ಬೆಳಕು ಚೆಲ್ಲಿದ್ದಾರೆ. ಏನೆಂದರೆ ಇಂಗ್ಲಿಷ್ನ Dissection ಪದವನ್ನೇ ಸೀಳಿ ನೋಡಿದರೆ Dis ಮತ್ತು section ಎಂಬೆರಡು ಭಾಗಗಳಿವೆ. ಈಜಿಠ ಉಪಸರ್ಗ ಸಾಮಾನ್ಯವಾಗಿ ಅಲ್ಲದ್ದು/ಇಲ್ಲದ್ದು ಎಂಬ ನೇತ್ಯಾತ್ಮಕ ವಿಶೇಷಣವಾಗಿ ಬಳಕೆ. ಹಾಗಾದರೆ Dissection ಅಂದರೆ ವಿಭಜಿಸಿದ್ದೋ ಅಥವಾ ವಿಭಜನೆಯಿಲ್ಲದ್ದು? ಅಂದಹಾಗೆ ಡಾ.ಕಿರಣ ಕನ್ನಡಪ್ರಿಯ ವೈದ್ಯಮಿತ್ರರೊಡನೆ ‘ವಿಘಟನೆ’ ಪದ ಬಳಸುತ್ತಾರಂತೆ.
