‘ನಾವೇನು ಸರ್ಕಾರದ ಬಿಟ್ಟಿ ಭಾಗ್ಯ ನಂಬಿ ಕೂತಿಲ್ಲ. ಈ ಸರ್ಕಾರ ಇರೋವರೆಗೆ ದುಡ್ಡು ಕೊಡ್ತಾರೆ. ಬೇರೆಯವರು ಬಂದ್ರೆ ಹಣ ಸಿಗುತ್ತಾ?. ವಾರಕ್ಕೆ ಎರಡು ಕಾರ್ಯಕ್ರಮ ಸಿಕ್ಕರೆ ಸಾಕು. ಮನೆ, ತೋಟದ ಕೆಲಸ ಮುಗಿಸಿ 3 ಗಂಟೆ ಹೋಗಿ ಬಂದ್ರೆ ಸಾವಿರ ರೂ. ದುಡ್ಡು 2 ಟೈಮ್ ಊಟ ಸಿಗುತ್ತೆ, ಕೆಲಸ ಮಾಡಿ ಬಂದ್ರೆ ಒಳ್ಳೆಯ ವ್ಯಾಯಾಮ ಆಗುತ್ತೆ. ಇಷ್ಟು ಸಾಕಲ್ವಾ?’ ಶೃಂಗೇರಿ ಸನಿಹದ ಮಾಗಲು ಗ್ರಾಮದ ಭಾಗ್ಯ ಈ ಮಾತನ್ನು ಹೇಳುವಾಗ ಅವರಿಗೆ ಸಂಕೋಚ ಇರಲಿಲ್ಲ. ಮರ್ಯಾದೆಯಿಂದ ದುಡಿದು ತಿನ್ನೋಕೆ ನಾಚಿಕೆ ಏಕೆ ಆಗ್ಬೇಕು ಎಂಬ ಅವರ ಪ್ರಶ್ನೆ ಕೂಡ ಸರಿ ಅಲ್ವಾ? ಇದು ಭಾಗ್ಯ ಅವರ ಒಬ್ಬರ ಮಾತಲ್ಲ, ಚಿಕ್ಕಮಗಳೂರಿನ ಶೃಂಗೇರಿ, ಕಳಸ, ಜೈಪುರ, ಎನ್ಆರ್ ಪುರ, ಶಿವಮೊಗ್ಗ ಜಿಲ್ಲೆಯ ಸಾಗರ, ಹೊಸನಗರ ಅಷ್ಟೇ ಏಕೆ ರಾಜ್ಯದ ಬಹುತೇಕ ಕಡೆ ಸಾವಿರಾರು ಮಹಿಳೆಯರಿಗೆ ‘ಅನ್ನ’ಪೂರ್ಣೆ ಹೊಸ ಭರವಸೆಯ ಬದುಕು ಕಟ್ಟಿಕೊಟ್ಟಿದ್ದಾಳೆ. ಕೇಟರಿಂಗ್, ಹೋಟೆಲ್ ನಡೆಸುವ ಮೂಲಕ ಸಾವಿರಾರು ಮಹಿಳೆಯರು ಕರ್ನಾಟಕ ಏಕೆ? ದೇಶಾದ್ಯಂತ ಬದುಕು ಕಟ್ಟಿಕೊಂಡಿರುವ ಹಲವು ನಿದರ್ಶನಗಳಿವೆ. ಇದು ಹಣ, ಅನುಕೂಲ ಇದ್ದವರಿಗೆ ಆಯ್ತು. ತೋಟ, ಹೊಲ, ಗದ್ದೆ, ಮನೆಯಲ್ಲಿ ಹಿರಿಯರು, ಮಕ್ಕಳನ್ನು ನೋಡಿಕೊಳ್ಳುವ ಜವಾಬ್ದಾರಿ ಇದ್ದವರಿಗೆ ಹೋಟೆಲ್, ಕೇಟರಿಂಗ್ ಕಾಯಕ ದೂರದ ಮಾತು. ಇಂತವರಿಗೆ ಅಡುಗೆ ಬಡಿಸುವ, ತಾಂಬೂಲ ನೀಡುವ ಪಾರ್ಟ್ ಟೈಮ್ ಜಾಬ್ ಕೈಹಿಡಿದಿದೆ.
