ಮನರಂಜನೆಯ ಜತೆಗೆ ಸಾಮಾಜಿಕ ಕಳಕಳಿಯ ಕಾರ್ಯಕ್ರಮಗಳ ಮೂಲಕವೇ ಕೇಳುಗರಿಗೆ ಹತ್ತಿರವಾಗಿದ್ದೇವೆ. 2014ರಲ್ಲಿ ಚೆನ್ನೈನಲ್ಲಿ ನೆರೆಹಾವಳಿ ಸಂಭವಿಸಿದಾಗ ಸತತ 22 ದಿನ ಕ್ಯಾಂಪೇನ್ ಮಾಡಿ ಶ್ರೋತೃಗಳಿಂದ ಲಕ್ಷ ಲಕ್ಷ ಫಂಡ್ ಸಂಗ್ರಹಿಸಲಾಗಿತ್ತು. ಟನ್ಗಟ್ಟಲೆ ಆಹಾರ ಪದಾರ್ಥ ಮತ್ತಿತರ ಮೂಲಭೂತ ಅವಶ್ಯಕತೆಗಳನ್ನು ಪೂರೈಸಲಾಗಿತ್ತು. ಆ ಪ್ರವಾಹ ಬಂದಿದ್ದು ಡಿಸೆಂಬರ್ನಲ್ಲಿ. ಅದು ಕ್ರಿಸ್ಮಸ್ ಸಮಯ. ಹಾಗಾಗಿ, ‘ಇನ್ನೊಬ್ಬರ ಬದುಕಲ್ಲಿ ನೀವೂ ಸಾಂತಾಕ್ಲಾಸ್ ಆಗಿ’ ಎಂಬ ಅಭಿಯಾನ ಮಾಡಿದ್ದೆವು. ಅದಕ್ಕೆ ಜನರ ಮೆಚ್ಚುಗೆ ವ್ಯಕ್ತವಾಗಿತ್ತು. ನವೆಂಬರ್ ತಿಂಗಳಲ್ಲಿ ‘ಬಿಗ್ ಕನ್ನಡಿಗ’ ಅವಾರ್ಡ್ ಕೊಡುವ ಪರಿಪಾಠವನ್ನೂ ನಾವು ನಡೆಸಿಕೊಂಡು ಬರುತ್ತಿದ್ದೇವೆ. ರಘು ದೀಕ್ಷಿತ್, ಪವನ್ಕುಮಾರ್, ಸಾಂಗ್ಲಿಯಾನ ಮುಂತಾದವರಿಗೆ ಪ್ರಶಸ್ತಿ ನೀಡಿದ್ದೇವೆ. ‘ಸೇವ್ ದಿ ಗರ್ಲ್ ಚೈಲ್ಡ್’ ವಿಶೇಷ ಅಭಿಯಾನ ಎಲ್ಲರ ಮನಮುಟ್ಟಿತ್ತು. ವರಮಹಾಲಕ್ಷ್ಮೀ ಹಬ್ಬದ ದಿನ, ಬಡತನ ರೇಖೆಗಿಂತಲೂ ಕೆಳಗಿರುವ ಕುಟುಂಬದಲ್ಲಿ ಹುಟ್ಟಿದ ಹೆಣ್ಣು ಮಕ್ಕಳಿಗೆ ಉಚಿತ ಶಿಕ್ಷಣದ ವ್ಯವಸ್ಥೆ ಕಲ್ಪಿಸಿಕೊಟ್ಟಿದ್ದು ಇನ್ನೊಂದು ವಿಶೇಷ. ಹೀಗೆ ಮನರಂಜನೆ ಜತೆಗೆ ಸಾಮಾಜಿಕ ಕಾಳಜಿಯಲ್ಲೂ ರೇಡಿಯೋ ಮುಂದಿದೆ.
