ಮೊಟ್ಟೆಯಿಂದ ಚಿಟ್ಟೆಯಾಗುವ ಬಗೆ: ಚಿಟ್ಟೆಗಳ ಜೀವನ ಚಕ್ರವು ಒಟ್ಟು 4 ಹಂತಗಳಲ್ಲಿ ಸಾಗುತ್ತವೆ. ಅವು ಮೊಟ್ಟೆ, ಲಾರ್ವಾ (ಅಥವಾ ಕ್ಯಾಟರ್ಪಿಲ್ಲರ್/ಕಂಬಳಿಹುಳು), ಪ್ಯೂಪಾ ಮತ್ತು ವಯಸ್ಕ. ಮೊಟ್ಟೆಗಳು ಸಾಮಾನ್ಯವಾಗಿ ಎಲೆಗಳ ಕೆಳಭಾಗದಲ್ಲಿ ಅಥವಾ ಕೆಲವು ಸಸ್ಯದ ಕಾಂಡಗಳ ಮೇಲೆ ಬಹಳ ಚಿಕ್ಕದಾಗಿ ಕಾಣಿಸಿಕೊಳ್ಳುತ್ತವೆ. ಒಮ್ಮೆ ಮೊಟ್ಟೆಯೊಳಗೆ ಅಭಿವೃದ್ಧಿ ಹೊಂದಿ, ಮರಿಹುಳಗಳು ಮೊಟ್ಟೆಯಿಂದ ಹೊರಬಂದು, ಲಾರ್ವಾ ಹಂತಕ್ಕೆ ಕಾಲಿಡುತ್ತವೆ. ಇವುಗಳನ್ನೇ ನಾವು ಕಂಬಳಿಹುಳಗಳ ರೂಪದಲ್ಲಿ ಕಾಣುತ್ತೇವೆ. ಈ ಹಂತದಲ್ಲಿ ಇದು ಒಂದು ರೀತಿ ಹೊಟ್ಟೆಬಾಕನಂತೆ ತನ್ನದೇ ಚಿಪ್ಪು ಹಾಗೂ ಸಸ್ಯಗಳ ಎಲೆಗಳನ್ನು ತಿಂದು ಅಗತ್ಯವಾದ ಪೋಷಕಾಂಶಗಳನ್ನು ಪಡೆಯುತ್ತದೆ. ನಂತರದ ಪ್ಯೂಪಾ ಹಂತದಲ್ಲಿ ಒಂದು ರೀತಿಯ ನಾಟಕೀಯ ರೂಪಾಂತರಗೊಳ್ಳುತ್ತದೆ. ಇದು ವಿಶ್ರಾಂತಿಯ ಹಂತವಾಗಿದ್ದು, ಈ ಸಮಯದಲ್ಲಿ ಆಹಾರವನ್ನು ಪಡೆಯದೆಯೇ, ಚಲಿಸಲೂ ಸಾಧ್ಯವಿಲ್ಲದೆಯೇ ವಿಶ್ರಾಂತ ಸ್ಥಿತಿಯಲ್ಲಿರುತ್ತವೆ. ಕೊನೆಯ ಹಂತವಾದ ವಯಸ್ಕ ಹಂತದಲ್ಲಿ ಊದಿಕೊಂಡ ಹೊಟ್ಟೆ ಮತ್ತು ಸುಕ್ಕುಗಟ್ಟಿದ ರೆಕ್ಕೆಗಳೊಂದಿಗೆ ಪ್ಯೂಪಾ ಹೊರಪೊರೆಯಿಂದ ಹೊರಬರುತ್ತದೆ. ಅದರ ವಯಸ್ಕ ಜೀವನದ ಮೊದಲ ಕೆಲವು ಗಂಟೆಗಳ ಕಾಲ ಚಿಟ್ಟೆಯಾಗಿ ಹೊರಹೊಮ್ಮಲು ಹಲವು ನೈಸರ್ಗಿಕ ಮತ್ತು ರಾಸಾಯನಿಕ ಪ್ರಕ್ರಿಯೆಗಳನ್ನು ದಾಟಿ, ರೆಕ್ಕೆಗಳನ್ನು ಸಂಪೂರ್ಣವಾಗಿ ಒಣಗಿಸಿ, ವಿಸ್ತರಿಸಿದ ನಂತರ ವಯಸ್ಕ ಚಿಟ್ಟೆಯಾಗಿ ರೂಪುಗೊಳ್ಳುತ್ತದೆ.
