‘ಒಂಟಿ ಸೀನು ಅಪಶಕುನ. ಜಂಟಿ ಸೀನು ಶುಭಶಕುನ. ಪ್ಲೆಂಟಿ ಸೀನು ಅನುಮಾನ. ಇರಬಹುದೆ ಕರೊನಾ?’ ಎಂಬುದು ಇನ್ನೊಂದು ವಾಟ್ಸಾಪ್ ಜೋಕು. ನಿರಂತರವಾಗಿ ಸೀನುವುದು ಕರೊನಾದ ಲಕ್ಷಣಗಳಲ್ಲಿ ಒಂದು ಎಂಬುದನ್ನು ಈ ಜೋಕು ಪರಿಣಾಮಕಾರಿಯಾಗಿ ಹೇಳುತ್ತದಲ್ಲವೆ? ‘ಕಳಬೇಡ ಕೊಲಬೇಡ ಹುಸಿಯ ನುಡಿಯಲು ಬೇಡ’ ಎಂಬ ಬಸವಣ್ಣನವರ ಪ್ರಸಿದ್ಧ ವಚನವನ್ನು ಅನುಕರಿಸಿ ರಚಿಸಿದ ‘ಕೆಮ್ಮಬೇಡ, ಸೀನಬೇಡ, ಹತ್ತಿರ ಬರಬೇಡ, ಅನ್ಯರಿಗೆ ಉಗುಳು ಸಿಡಿಸಬೇಡ, ಇದೇ ಕರೊನಾ ವೈರಸ್ ತಡೆಯುವ ಪರಿ’ ಎನ್ನುವ ಚುಟುಕವೂ ಸಾಮಾಜಿಕ ಮಾಧ್ಯಮದಲ್ಲಿ ಹರಿದಾಡುತ್ತಿದೆ. ಜನಪ್ರಿಯ ಚಿತ್ರಗೀತೆಗಳ ಧಾಟಿಯಲ್ಲಿ ಹಾಡಿದ ಕರೊನಾ ಕುರಿತ ಕೆಲವು ಅಣಕವಾಡುಗಳು ವೈರಲ್ ಆಗಿವೆ. ಕರೊನಾ ಬಗ್ಗೆ ಬರುತ್ತಿರುವ ಕವನ, ಜೋಕು, ವ್ಯಂಗ್ಯಚಿತ್ರಗಳ ಉದ್ದೇಶ ಕೇವಲ ರಂಜನೆಗೆ ಸೀಮಿತವಾಗದೆ ಜನಜಾಗೃತಿ ಮೂಡಿಸುವಂತಿದ್ದರೆ ಅವುಗಳು ಸ್ವಾಗತಾರ್ಹ. ಏಕೆಂದರೆ ಅವು ಜನರು ಧೃತಿಗೆಡದೆ, ಖಿನ್ನತೆಗೆ ಜಾರದೆ ಕರೊನಾದಂಥ ಕಠಿಣ ಸನ್ನಿವೇಶವನ್ನು ಎದುರಿಸಲು ನೆರವಾಗುತ್ತವೆ. ಸಂತೋಷದ ಸಂಗತಿಯೆಂದರೆ ನನ್ನ ಹಾಗೆ ಅನೇಕರು ಕರೊನಾ ಕುರಿತು ಕವನ ಬರೆಯುತ್ತಿದ್ದಾರೆ. ಇದು ಹೀಗೇ ಮುಂದುವರಿದರೆ ‘ತಿಣಿಕಿದನು ಫಣಿರಾಯ ರಾಮಾಯಣದ ಕವಿಗಳ ಭಾರದಲಿ’ ಎಂಬಂತೆ
