ದೇವನಿಗೆ ತಲುಪಲು ದಾರಿಯೊಂದಿದ್ದರೆ ಅದು ಮಾನವನೇ ಹೊರತು ಯಾಂತ್ರಿಕ ಜಪ ತಪಗಳು ಅಲ್ಲ ಎಂಬುದನ್ನು ಜಗತ್ತಿಗೆ ಸಾರಿದ ಧರ್ಮ ಇಸ್ಲಾಂ. ಬೆಲೆ ಬಾಳುವ ವಸ್ತ್ರ ಧರಿಸಿ, ಸದಾ ಸುಗಂಧ ಸೂಸುವ, ಸುಂದರ ಮೈಕಟ್ಟಿನ ಬಿಲಿಯಾಧಿಪತಿಯ ಜತೆ ಬಡವನೂ ಇಸ್ಲಾಂ ಪ್ರಕಾರ ಭುಜಕ್ಕೆ ಭುಜ ತಾಗಿಸಿ ನಮಾಜಿನ ಸಾಲಿನಲ್ಲಿ ನಿಲ್ಲಬೇಕು. ಅಲ್ಲಿ ಅಂತರ ಪಾಲಿಸಿ ದೂರ ನಿಂತು ಬಿಟ್ಟರೆ ಸೈತಾನನ ಮಧ್ಯಪ್ರವೇಶ ಆಗುತ್ತದೆ ಎಂದು ಜಗತ್ತಿನಲ್ಲೇ ಅಪರೂಪದ ತತ್ವವನ್ನು ಸಾರುವ ಮೂಲಕ, ಕರಾಳ ಉಚ್ಛನೀಚತ್ವದ ಅಡಿಬೇರನ್ನೇ ಅಲುಗಾಡಿಸಿದ್ದು ಇಸ್ಲಾಮ್ ಸಮಾನತೆಯ ಸಂದೇಶವಾಗಿದೆ. ಎಾತಿ, ದೇಶ, ಭಾಷೆ, ವರ್ಗ, ವರ್ಣದ ಎಲ್ಲೆ ಮೀರಿ ಜಾಗತಿಕ ನೆಲೆಯಲ್ಲಿ ಸಮಾನತೆ ಪ್ರದರ್ಶಿಸುವ ಅವಕಾಶವನ್ನು ಹಜ್ ಎಂಬ ಅಂತಾರಾಷ್ಟ್ರೀಯ ಸಮ್ಮೇಳನದ ಮೂಲಕ ಪ್ರಾಯೋಗಿಕವಾಗಿ ಸ್ಥಾಪಿಸಲಾಯಿತು. ಝುಕಾತ್ ಮತ್ತು ದಾನಕ್ಕೆ ಒತ್ತು ಕೊಡುವ ಮೂಲಕ ಆರ್ಥಿಕ ಸಮತೋಲನ ಕಾಯ್ದುಕೊಳ್ಳುವ, ಬಡವರ ಕಣ್ಣೀರು ಒರೆಸುವ ಪ್ರಯತ್ನ ಮಾಡಲಾಯಿತು.
