ಶಶಾಂಕಾಸನ, ಪವನ ಮುಕ್ತಾಸನ, ಉತ್ತಾನಪಾದಾಸನ, ಸೂರ್ಯ ನಮಸ್ಕಾರಗಳು ಹೆಚ್ಚು ಲಾಭದಾಯಕ. ಕಪಾಲಭಾತಿ, ಅನುಲೋಮ ವಿಲೋಮ, ಭಸ್ತ್ರಿಕಾ, ಮೂಲಬಂಧದಂತಹ ಪ್ರಾಣಾಯಾಮಗಳು ಮಲಬದ್ಧತೆಯಲ್ಲಿ ತುಂಬಾ ಸಹಕಾರಿ. ಹತ್ತರಿಂದ ಹದಿನೈದು ಒಣದ್ರಾಕ್ಷಿಗಳನ್ನು ಬೆಳಿಗ್ಗೆ ನೆನೆಸಿ ಸಂಜೆಯ ಸಮಯದಲ್ಲಿ ಅದನ್ನು ತಿಂದು ಬಿಸಿನೀರು ಕುಡಿಯುವುದು ಒಳ್ಳೆಯದು. ಬೊಜ್ಜು, ಮಧುಮೇಹದ ಸಮಸ್ಯೆಗಳಿರುವವರು ಅರ್ಧದಿಂದ ಒಂದು ಚಮಚದಷ್ಟು ತ್ರಿಫಲಾ ಚೂರ್ಣವನ್ನು ರಾತ್ರಿ ಮಲಗುವಾಗ ಬಿಸಿನೀರಿನಲ್ಲಿ ಸೇವಿಸಬಹುದು. ಒಣ ಅಥವಾ ತೆಳ್ಳಗಿನ ದೇಹವನ್ನು ಹೊಂದಿರುವವರು ಸಂಜೆ ಸೂರ್ಯೋದಯದ ಮೊದಲು ಒಂದು ಕಪ್ ಬಿಸಿನೀರಿಗೆ ಒಂದು ಚಮಚ ತುಪ್ಪ, ನಾಲ್ಕು ಚಿಟಿಕೆ ಜ್ಯೇಷ್ಠಮಧುವಿನ ಪುಡಿ ಹಾಕಿ ತೆಗೆದುಕೊಳ್ಳಬೇಕು. ಒಂದು ತಾಸಿನ ನಂತರ ಲಘು ಭೋಜನ ಮಾಡಬೇಕು. ಅತ್ಯಂತ ಗಟ್ಟಿಯಾದ, ಕಾಳು ಕಾಳಾದ ಮಲವಿಸರ್ಜನೆಯಾಗುತ್ತಿದ್ದರೆ ಸಂಜೆ ಒಂದು ಲೋಟ ಹಾಲಿಗೆ ಒಂದು ಚಮಚ ಗುಲ್ಕಂದ್ ಹಾಕಿ ಸೇವಿಸಬೇಕು. ನಿಯಮಿತವಾಗಿ ಸ್ವಲ್ಪ ಪ್ರಮಾಣದಲ್ಲಿ ಲೋಳೇಸರ (ಅಲೊವೆರಾ) ವನ್ನು ಸೇವಿಸುವುದೂ ಈ ಸಮಸ್ಯೆಯಲ್ಲಿ ಹಿತಕಾರಿ. ವಾರಕ್ಕೊಮ್ಮೆ ಅಥವಾ ಹದಿನೈದು ದಿನಕ್ಕೊಮ್ಮೆ ಬೆಳಿಗ್ಗೆ ಖಾಲಿಹೊಟ್ಟೆಯಲ್ಲಿ ಬಿಸಿಹಾಲು ಅಥವಾ ಬಿಸಿನೀರಿನ ಜೊತೆ ಇಪ್ಪತ್ತರಿಂದ ಇಪ್ಪತೆôದು ಮಿ.ಲೀ. ಹರಳೆಣ್ಣೆಯನ್ನು ಹಾಕಿ ಕುಡಿದರೆ (ಮಲಬದ್ಧತೆ ಇರುವವರಿಗೆ) ಎರಡರಿಂದ ನಾಲ್ಕು ಬಾರಿ ತೆಳ್ಳಗಿನ ಮಲವಿಸರ್ಜನೆ ಆಗಿ ಕರುಳು ಶುದ್ಧವಾಗುತ್ತದೆ. ನಿತ್ಯ ಇದರ ಸೇವನೆ ಮಾಡುವುದಾದರೆ ವೈದ್ಯರ ಜೊತೆ ಸಮಾಲೋಚನೆ ಮಾಡಿಕೊಳ್ಳಬೇಕು. ಒಟ್ಟಿನಲ್ಲಿ ಒಳ್ಳೆಯ ದಿನಚರಿ, ಅಗತ್ಯವಾದಾಗ ಸರಿಯಾದ ಔಷಧಗಳ ಸೇವನೆಗಳಿಂದ ಮಲಬದ್ಧತೆಯನ್ನು ಸಂಪೂರ್ಣವಾಗಿ ಗುಣಪಡಿಸಿಕೊಳ್ಳಬಹುದು.
