ಪಶ್ಚಿಮದಲ್ಲಿ ಅಟ್ಲಾಂಟಿಕ್ ಸಾಗರದಿಂದ ಪೂರ್ವದಲ್ಲಿ ಪರ್ಷಿಯನ್ ಖಾರಿಯವರೆಗೆ ಕರ್ಕಾಟಕ ಸಂಕ್ರಾಂತಿ ವೃತ್ತದ ಇಕ್ಕೆಲಗಳಲ್ಲಿ ಹರಡಿರುವ ವಿಶಾಲ ಅರಬ್ ಜಗತ್ತಿನ ಸಮಕಾಲೀನ ಇತಿಹಾಸದಲ್ಲಿ 2011ನೇ ಇಸವಿ ಮುಖ್ಯವಾದುದು. ಅರಸುಮನೆತನಗಳ, ಸೇನೆಯ, ಸರ್ವಾಧಿಕಾರಿಗಳ ದಬ್ಬಾಳಿಕೆಯಲ್ಲಿ, ನಕಲಿ ಪ್ರಜಾಪ್ರಭುತ್ವವಾದಿಗಳ ಆಟಾಟೋಪದಲ್ಲಿ ನಲುಗುತ್ತಿರುವ ಇಡೀ ಅರಬ್ ಜಗತ್ತು ವ್ಯಾಪಕ ರಾಜಕೀಯ ಪ್ರತಿಭಟನೆ, ಚಳವಳಿ, ದೊಂಬಿ, ದಂಗೆ, ರಕ್ತಪಾತಗಳನ್ನು ಕಂಡ ವರ್ಷ ಅದು. ಟ್ಯುನೇಶಿಯಾ, ಈಜಿಪ್ಟ್, ಲಿಬಿಯಾ, ಮಾರಿಟಾನಿಯಾ, ಸುಡಾನ್, ಲೆಬನಾನ್, ಜೋರ್ಡಾನ್, ಸಿರಿಯಾ, ಸೌದಿ ಅರೇಬಿಯಾ, ಬಹ್ರೇನ್, ಯೆಮೆನ್, ಒಮಾನ್ಗಳ ಜನತೆ ಹೆಚ್ಚಿನ ವೈಯಕ್ತಿಕ ಸ್ವಾತಂತ್ರ್ಯಕ್ಕಾಗಿ, ಆಡಳಿತದಲ್ಲಿ ತಮ್ಮ ಪಾತ್ರಕ್ಕಾಗಿ ಬೇಡಿಕೆಯಿತ್ತು ನಡೆಸಿದ ಆ ಆಂದೋಲನಗಳನ್ನು ಜಗತ್ತು ‘ಅರಬ್ ವಸಂತ’ವೆಂದು ಕೊಂಡಾಡಿ ಅಲ್ಲೆಲ್ಲ ಪ್ರಜಾಪ್ರಭುತ್ವ, ಅದೂ ನಿಜವಾದದ್ದು, ನೆಲೆಗೊಳ್ಳುತ್ತದೆಂದು ಆಶಿಸಿತ್ತು. ಒಂದು ಅಂದಾಜಿನ ಪ್ರಕಾರ ಸುಮಾರು 60,000ಕ್ಕೂ ಹೆಚ್ಚಿನ ಜೀವಗಳನ್ನು ಬಲಿತೆಗೆದುಕೊಂಡ ಆ ವರ್ಷ ಇಂದು ನಮಗೆ ಹೇಗೆ ಕಾಣುತ್ತದೆ? ಅಲ್ಲಿಂದೀಚಿಗಿನ ಒಂದು ದಶಕದಲ್ಲಿ ಅರಬ್ಬರು ಪಡೆದುಕೊಂಡದ್ದೇನು, ಕಳೆದುಕೊಂಡದ್ದೇನು ಎಂದು ಲೆಕ್ಕ ಹಾಕಿದರೆ ತಕ್ಕಡಿಯಲ್ಲಿ ಪಡೆದುಕೊಂಡಿರುವ ತಟ್ಟೆ ಎವರೆಸ್ಟ್ಗೇರಿದರೆ ಕಳೆದುಕೊಂಡ ತಟ್ಟೆ ಮಾರಿಯಾನಾ ಟ್ರೆಂಚ್ಗಿಳಿಯುತ್ತದೆ. ಬನ್ನಿ, ಈ ಎತ್ತರ, ಆ ಆಳದ ನಡುವೆ ಒಂದಿಷ್ಟು ಕಾಲಾಡಿಸಿಕೊಂಡು ಬರೋಣ.
