ಹಾಗೆಯೇ ನಿತ್ಯವೂ ಭಗವಂತನನ್ನು ಸ್ಮರಿಸು ವುದರಿಂದ ದೈನಂದಿನ ಚಟುವಟಿಕೆಗಳಲ್ಲಿ ಚೈತನ್ಯ ಹೆಚ್ಚುತ್ತದೆ. ಹೊಸ ಹುರುಪಿನಿಂದ ಕೆಲಸ ಕಾರ್ಯಗಳೆಲ್ಲವೂ ಸರಾಗವಾಗಿ ಸಾಗುತ್ತದೆ. ಭಗವಂತನ ಪ್ರಾರ್ಥನೆ, ಭಜನೆಗಳು ಆಂತರಿಕ ಬೆಳವಣಿಗೆಗೆ ದಾರಿ ಮಾಡಿಕೊಡುತ್ತದೆ. ಚಿಂತೆಯನ್ನು ದೂರ ಮಾಡಿ ಚಿಂತನೆ, ಧ್ಯಾನಗಳಿಗೆ ದಾರಿ ದೀಪವಾಗುತ್ತದೆ. ಸನಾತನ ಧರ್ಮದಲ್ಲಿ ಪ್ರಾರ್ಥನೆ ಅಂದರೆ ದೇವರನ್ನು ಶುದ್ಧ ಮನಸ್ಸಿನಿಂದ ಸ್ಮರಣೆ ಮಾಡುವುದು. ಮಂತ್ರಗಳು, ವೇದ ಘೊಷಗಳು, ಸಹಸ್ರನಾಮಗಳು ಹೀಗೆ ಅನೇಕ ರೀತಿಯಲ್ಲಿ ಪ್ರಾರ್ಥನೆ ಕೈಗೊಳ್ಳುತ್ತಾರೆ. ಅದರ ಜೊತೆಗೆ ಕೀರ್ತನೆ, ಭಜನೆಗಳ ಮೂಲಕವೂ ಪ್ರಾರ್ಥಿಸುವುದನ್ನು ನಾವು ಕಾಣಬಹುದಾಗಿದೆ. ಬಹುಶಃ ಇದು ಸರಳ ಹಾಗೂ ಸುಲಭ ಮಾರ್ಗವಾಗಿದ್ದು, ಭಗವಂತನ ಸಾಮೀಪ್ಯವನ್ನು ಹೊಂದಬಹುದಾಗಿದೆ. ಯಾವುದೇ ಜಾತಿ, ವರ್ಗದ ಭೇದವಿಲ್ಲದೆ ಮನೆ-ಮನೆಗಳಲ್ಲಿ, ಅಥವಾ ದೇವಸ್ಥಾನ, ಭಜನಾ ಮಂದಿರ, ಗುಡಿಗಳಲ್ಲಿ ಮಕ್ಕಳು, ಹಿರಿಯರು, ಪುರುಷರು, ಸ್ತ್ರೀಯರೆಲ್ಲರೂ ಸೇರಿಕೊಂಡು ನಡೆಸುವ ಭಜನಾ ಸಂಕೀರ್ತನೆಗಳು ಕುಟುಂಬ, ಸಮಾಜವನ್ನು ಸತ್ಪಥದತ್ತ ಕೊಂಡೊಯ್ಯುತ್ತವೆ.
