200 ವರ್ಷಗಳ ಬ್ರಿಟಿಷ್ ಭಾರತದ ಅವಧಿಯಲ್ಲಿ ಇಂಗ್ಲೀಷರು ರೈಲು ಮಾರ್ಗಗಳು, ಹಲವಾರು ಬಂದರುಗಳನ್ನು, ಸೇತುವೆಗಳನ್ನು ಹಾಗೂ ಮಹತ್ವದ ರಸ್ತೆ ನಿರ್ವಣಗಳನ್ನು ಮಾಡಿದ್ದರು. ಆದರೆ ಇದು ಭಾರತದ ಸಂಪತ್ತನ್ನು ಇಂಗ್ಲೆಂಡಿಗೆ ಸಾಗಿಸಲು ಮತ್ತು ಇಲ್ಲಿ ಬೆಳೆಯುತ್ತಿದ್ದ ಗುಣಮಟ್ಟದ ಹತ್ತಿಯನ್ನು ಲ್ಯಾಂಕ್ಶಾಯರ್ ಹಾಗೂ ಮ್ಯಾಂಚೆಸ್ಟರ್ ಜವಳಿ ಕಾರ್ಖಾನೆಗಳಿಗೆ ರಫ್ತು ಮಾಡಲು ಹಾಗೂ ಅಲ್ಲಿ ತಯಾರಾದ ಬಟ್ಟೆಗಳನ್ನು ಮರಳಿ ಆಮದು ಮಾಡುವ ಅನುಕೂಲಕ್ಕಾಗಿ ಎಂಬ ಕಾರಣಕ್ಕೆ ಅಷ್ಟೇ. ಕಾಂಗ್ರೆಸ್ ಸರ್ಕಾರದ ಅವಧಿ ಕೂಡಾ ಒಡ ಒಡಕಾದ ನೀತಿ ಧೋರಣೆಗಳು ಹಾಗೂ ತನ್ಮೂಲಕ ಯೋಜನೆಗಳ ಅನುಷ್ಠಾನ ದೇಶದ ಆರ್ಥಿಕ ವಿಕಾಸ ಪ್ರತಿಗಾಮಿಯಾಯಿತಲ್ಲದೇ ಇದು ದೇಶದ ಸಂಪತ್ತಿನ ಹಾಗೂ ಅವಕಾಶಗಳ ಹಂಚಿಕೆಯ ಸಮಾನವಲ್ಲದ ಪಾಲುದಾರಿಕೆಗೂ ಕಾರಣವಾಯಿತು. ಸಮಗ್ರತೆ ಇಲ್ಲದ ಕಾರಣ ಹೊಸ ಮೂಲಭೂತ ಸಂಪನ್ಮೂಲಗಳ ನಿರ್ಮಾಣ ಕೂಡಾ ಗೊಂದಲದ ಗೂಡಾಯಿತು. ಹೀಗಾಗಿ ನಾವು ಯೋಜನೆಗಳ ಅನುಷ್ಠಾನಗಳಲ್ಲಿ ‘ಕಾಮಗಾರಿ ಪ್ರಗತಿಯಲ್ಲಿದೆ ಸಾವಧಾನವಾಗಿ ಸಾಗಿ’ ಮುಂತಾದ ಸೂಚನಾ ಫಲಕಗಳಿಗೆ ಒಗ್ಗಿಹೋದೆವು. ಈ ‘ನಿಧಾನವಾಗಿ ಸಾಗಿ’ ಸಂದೇಶವನ್ನು ‘ಬೇಗನೆ ಸಾಗಿ’ ಯನ್ನಾಗಿಸಲು ಹಾಗೂ ಗತಿರಹಿತತೆಯನ್ನು ಗತಿಶೀಲತೆಯನ್ನಾಗಿ ಮಾಡಲು ಪ್ರಧಾನಿ ನರೇಂದ್ರ ಮೋದಿಯವರ ‘ಪ್ರಧಾನಿ ಗತಿಶಕ್ತಿ’ ಮಹಾಯೋಜನೆಯ ಐತಿಹಾಸಿಕ ಘೊಷಣೆ ಮಹತ್ವವಾದುದು. ಕಳೆದ 7 ವರ್ಷಗಳಲ್ಲಿ ಮೋದಿ ನೇತೃತ್ವದ ಸರ್ಕಾರ ದೇಶದ ಸಮಗ್ರ ಅರ್ಥವ್ಯವಸ್ಥೆ ಬಲಪಡಿಸುವ ಬುನಾದಿ ಹಾಕಿದೆ. ಜಿಎಸ್ಟಿ ವ್ಯವಸ್ಥೆಯು ಕರಾಕರಣೆಯನ್ನು ಸುರಳೀತಗೊಳಿಸಿದರೆ, ಜನ್ಧನ್, ಆಧಾರ ಹಾಗೂ ಮುದ್ರಾದಂತಹ ಯೋಜನೆಗಳಿಂದ ಫಲಾನುಭವಿಗಳ ಬ್ಯಾಂಕ್ ಖಾತೆಗೆ ಹಣ ವರ್ಗಾವಣೆ ಆಗುವಂತಾಗಿದೆ. ಪ್ರಧಾನಮಂತ್ರಿ ಗ್ರಾಮಸಡಕ್ ಯೋಜನೆ, ಉಡಾನ್, ಭಾರತಮಾಲಾ ಹಾಗೂ ಸಾಗರಮಾಲಾಗಳಂತಹ ಯೋಜನೆಗಳ ಅನುಷ್ಠಾನ ದೇಶದ ಮೂಲಭೂತ ಸೌಕರ್ಯಗಳ ಅಭೂತಪೂರ್ವ ನಿರ್ಮಾಣ ಹಾಗೂ ಔದ್ಯಮಿಕ ಶಕ್ತಿಗೆ ಹೊಸ ಚೌತನ್ಯ ನೀಡಿವೆ.
