ಆತನ ಸಂಭ್ರಮಕ್ಕೆ ಪಾರವೇ ಇರಲಿಲ್ಲ. ಅದಕ್ಕೂ ಮಿಗಿಲಾಗಿ ಆಶ್ಚರ್ಯ ಮತ್ತು ಕುತೂಹಲದೊಂದಿಗೆ ಕೇಳಿದರು- ‘ಹೇಗೆ ಸಿಕ್ಕಿತು!’ ಅಂತ. ಹುಡುಗರು ವಿವರಿಸಿದರು, ‘ನಾವು ನಾಲ್ಕು ಜನ ಮನೆಯ ನಾಲ್ಕು ಮೂಲೆಗಳಲ್ಲಿ 10 ನಿಮಿಷ ನಿಶ್ಶಬ್ದವಾಗಿ, ಧ್ಯಾನಕ್ಕೆ ಕುಳಿತೆವು. ಆಗ ಮನೆ ತುಂಬ ಮೌನ ಆವರಿಸಿತು. ಕೆಲವು ನಿಮಿಷಗಳ ನಂತರ ಟಿಕ್, ಟಿಕ್ ಎಂಬ ಶಬ್ದ ಕೇಳತೊಡಗಿತು. ಶಬ್ದ ಬಂದ ಕಡೆ ಹುಡುಕಿದೆವು, ಗಡಿಯಾರ ಸಿಕ್ಕಿತು’. ಹೌದು, ಆ ಹುಡುಗರ ರೀತಿ, ನಾವು ಶಾಂತವಾಗಿದ್ದು ಆಲೋಚಿಸಿದರೆ ನಮ್ಮ ಎಷ್ಟೋ ಸಮಸ್ಯೆಗಳಿಗೆ ಸುಲಭವಾಗಿ ಪರಿಹಾರ ಕಂಡುಕೊಳ್ಳಬಹುದು. ಆದರೆ ಜೀವನದಲ್ಲಿ ಬರುವ ಸಮಸ್ಯೆಗಳಿಗೆ, ಬೇಗನೆ ಪ್ರತಿಕ್ರಿಯಿಸಿ ಅದನ್ನು ಇನ್ನಷ್ಟು ಕ್ಲಿಷ್ಟಗೊಳಿಸುತ್ತೇವೆ. ತಾಳ್ಮೆಯಿಂದಿದ್ದು, ಮನಸ್ಸಿನ ಶಾಂತತೆ ಕಾಪಾಡಿಕೊಂಡು ಶ್ರದ್ಧೆಯಿಂದ ಕೆಲಸ ಮಾಡಿದರೆ, ನಮ್ಮ ಆಂತರಿಕ ಶಕ್ತಿ, ಆತ್ಮವಿಶ್ವಾಸ ವೃದ್ಧಿಯಾಗಿ, ಯಶಸ್ವಿಯಾಗುತ್ತೇವೆ.
