ಮಳೆಯಾಶ್ರಿತ ಕೃಷಿ: ಸಮಸ್ಯೆಯ ಅಗಾಧತೆ ಇರುವುದು ಪ್ರಮುಖವಾಗಿ ಮಳೆಯಾಶ್ರಿತ ಕೃಷಿ ಕ್ಷೇತ್ರದಲ್ಲಿ. ಕಾರಣ, ರಾಜ್ಯದ 6 ಕೋಟಿ ಜನಸಂಖ್ಯೆಯಲ್ಲಿ ಕೃಷಿಕರು ಮತ್ತು ಕೃಷಿ ಕಾರ್ವಿುಕರ ಸಂಖ್ಯೆ 2.4 ಕೋಟಿ (ಶೇಕಡ 40). ಇಷ್ಟು ಬೃಹತ್ ಸಂಖ್ಯೆಯ ಜನರು ವಿವಿಧ ಕೃಷಿಕಸುಬುಗಳಲ್ಲಿ ತೊಡಗಿದ್ದು, ಕಾರಣಾಂತರಗಳಿಂದ ಅವರು ಕೃಷಿಯಿಂದ ವಿಮುಖರಾದರೆ ಇತರ ಯಾವುದೇ ಕ್ಷೇತ್ರದಲ್ಲಿ ಅವರಿಗೆ ಉದ್ಯೋಗ ಒದಗಿಸುವುದು ಸಾಧ್ಯವಿಲ್ಲ. ರಾಜ್ಯದಲ್ಲಿ ಒಟ್ಟು 72 ಲಕ್ಷ ಕೃಷಿ ಹಿಡುವಳಿಗಳಿದ್ದು ಅವುಗಳಲ್ಲಿ ಶೇ.92ರಷ್ಟು ಹಿಡುವಳಿಗಳು 4 ಹೆಕ್ಟೇರಿಗಿಂತ ಚಿಕ್ಕವು (ಸಣ್ಣ ಮತ್ತು ಅತಿ ಸಣ್ಣ ಹಿಡುವಳಿಗಳು). ಒಟ್ಟು ಕೃಷಿಕ್ಷೇತ್ರದ ಶೇ.70 ರಷ್ಟರಲ್ಲಿ ಮುಂಗಾರು ಬೆಳೆ ಬೆಳೆಯಲಾಗುತ್ತದೆ. ರಾಜ್ಯದ ಶೇ.40ರಷ್ಟಿರುವ ರೈತ ಹಾಗೂ ಕೃಷಿಕಾರ್ವಿುಕರು, ಅದರಲ್ಲೂ ಶೇ.70ರಷ್ಟಿರುವ ಮಳೆಯಾಧಾರಿತ ಕೃಷಿಕರು, ರಾಜ್ಯ ಮತ್ತು ರಾಷ್ಟ್ರದ ಜನತೆಗೆ ಆಹಾರ ಒದಗಿಸುವ ಬೃಹತ್ ಜವಾಬ್ದಾರಿ ಹೊಂದಿದ್ದಾರೆ. ಕರೊನಾ ಮಹಾಮಾರಿಯ ಕಾರಣದಿಂದಾಗಿ ಕೈಯಲ್ಲಿ ಹಣವಿಲ್ಲದ ಹೆಚ್ಚಿನ ಸಣ್ಣ ಹಿಡುವಳಿದಾರರು, ಅದರಲ್ಲೂ ವಿಶೇಷವಾಗಿ ಮಳೆಯಾಧಾರಿತ ಕೃಷಿಯನ್ನು ಅವಲಂಬಿಸಿರುವವರು ಕೃಷಿ ಮಾಡುವ ಬದಲಾಗಿ ನಗರಗಳಿಗೆ ವಲಸೆ ಹೋಗುವ ಎಲ್ಲ ಸಾಧ್ಯತೆಗಳಿವೆ. ಇದರಿಂದಾಗಿ ನೇರವಾಗಿ ಆಹಾರ ಮತ್ತು ಪೋಷಕಾಂಶದ ಕೊರತೆ ಎಲ್ಲರನ್ನೂ ಕಾಡಲಿದೆ. ವಿಪರ್ಯಾಸವೆಂದರೆ, ಆಹಾರಧಾನ್ಯಗಳ (ಏಕದಳ ಮತ್ತು ದ್ವಿದಳ ಧಾನ್ಯಗಳು) ಕ್ಷೇತ್ರ ನಿರಂತರವಾಗಿ ಕಡಿಮೆಯಾಗುತ್ತಿದೆ. ಇದೀಗ, ಆಹಾರಭದ್ರತೆಯ ಸಮಸ್ಯೆ ಹೋಗಲಾಡಿಸಲು ಮತ್ತು ಮಳೆಯನ್ನೇ ನಂಬಿ ಕೃಷಿ ಮಾಡುವ ಹೆಚ್ಚಿನ ಸಂಖ್ಯೆಯ ರೈತರು ಹೆಚ್ಚಿನ ಕ್ಷೇತ್ರವನ್ನು ಪಾಳು ಬಿಡುವುದನ್ನು ತಪ್ಪಿಸಬೇಕಾದರೆ ತುರ್ತಾಗಿ ಅತ್ಯಂತ ಕನಿಷ್ಠ ಮಳೆಯಲ್ಲೂ ಇಳುವರಿ ನೀಡಬಲ್ಲ ಬೆಳೆಗಳಾದ ಸಿರಿಧಾನ್ಯಗಳು, ರಾಗಿ, ಜೋಳ, ಸಜ್ಜೆ ಮುಂತಾದುವನ್ನು ಬರುವ ಮುಂಗಾರಿನಲ್ಲಿ ಬಿತ್ತುವಂತಾಗಬೇಕು.
