ರಾಜ್ಯಶಾಸ್ತ್ರದ ಕುರಿತು ಸಾರ್ವಕಾಲಿಕ ಸಿದ್ಧಾಂತಗಳನ್ನು ನೀಡಿದ ಆಚಾರ್ಯ ಚಾಣಕ್ಯ, ‘ವ್ಯಕ್ತಿ ತನ್ನ ಕಾರ್ಯಗಳಿಂದ ಶ್ರೇಷ್ಠನೆನಿಸಿಕೊಳ್ಳುತ್ತಾನೆಯೇ ಹುಟ್ಟಿನಿಂದ ಅಲ್ಲ’ ಎನ್ನುವ ಮೂಲಕ, ಮಾನವ ಸಾಧನೆಗೆ ಹೆಣಗಬೇಕು, ತುಡಿಯಬೇಕು ಎನ್ನುವ ಸಂದೇಶ ನೀಡುತ್ತಾನೆ, ‘ಒಬ್ಬ ವ್ಯಕ್ತಿ ಒಂದು ಆದರ್ಶಕ್ಕಾಗಿ ಸಾಯಬಹುದು. ಆದರೆ ಆತನ ಸಾವಿನ ನಂತರ ಆ ಆದರ್ಶವು ಸಾವಿರಾರು ಜನರೆದೆಯಲ್ಲಿ ಮರುಹುಟ್ಟು ಪಡೆಯುತ್ತದೆ’ ಎನ್ನುತ್ತಾರೆ ಸುಭಾಷ್ ಚಂದ್ರ ಬೋಸ್. ಖುದ್ದು ಬೋಸ್ ಅವರೇ ಇದಕ್ಕೊಂದು ಮಹಾನಿದರ್ಶನವಾಗಿದ್ದರು. ಹೀಗೆಂದೇ, ಭಗತ್ ಸಿಂಗ್ರಂಥವರ ಹೆಸರು ಈಗಲೂ ನಮ್ಮನ್ನು ಪ್ರಭಾವಿತಗೊಳಿಸುತ್ತದೆ; ಆದರ್ಶ ಸಾಧನೆಗೋಸ್ಕರ ಅವರು ತೋರಿದ ಧೈರ್ಯ, ಮಾಡಿದ ತ್ಯಾಗ ಸದಾ ನಮ್ಮ ಮನಸಲ್ಲಿ ನೆಲೆಸಿರುತ್ತದೆ. ಇತಿಹಾಸದಲ್ಲಿ ಇಂಥ ಸಾವಿರ ಸಾವಿರ ಹೆಸರುಗಳಿವೆ. ‘ನನ್ನ ಕೆಚ್ಚು, ಧೈರ್ಯವನ್ನು ಸಾಬೀತುಪಡಿಸುವ ಮುನ್ನವೇ ಸಾವೇನಾದರೂ ಬಂದುನಿಂತರೆ ಆ ಸಾವನ್ನೇ ಸಾಯಿಸಿಬಿಡುತ್ತೇನೆ’ ಎಂದು ಗುಡುಗಿದ್ದರು ಕ್ಯಾಪ್ಟನ್ ಮನೋಜ್ ಕುಮಾರ್ ಪಾಂಡೆ. ಹೇಳಿದಂತೆ ನಡೆದುಕೊಂಡ ಇವರು, ಕಾರ್ಗಿಲ್ ಸಮರ ಕಾಲದಲ್ಲಿ ಕೆಚ್ಚೆದೆ ಪ್ರದರ್ಶಿಸಿ, ಹುತಾತ್ಮರಾದರು. ಆಗ ಅವರ ವಯಸ್ಸು ಕೇವಲ 24! ಈ ಕಲಿತನಕ್ಕೆ ಸಲಾಂ ಎನ್ನದೆ ಇರಲು ಸಾಧ್ಯವೇ?
