ಕಜಕಿಸ್ತಾನ, ಉಜ್ಬೇಕಿಸ್ತಾನ, ಅಜರ್ಬೈಜಾನ್, ಜಾರ್ಜಿಯಾ, ಪರ್ಷಿಯಾ, ಈಜಿಪ್ಟ್, ಇಟಲಿ ಹಾಗೂ ಭಾರತ ಮುಂತಾದ ದೇಶಗಳ ಅನೇಕಾನೇಕ ನಗರಗಳು ಈ ರೇಷ್ಮೆ ರಸ್ತೆಯ ಭಾಗವಾಗಿರುವುದು ವಿಶೇಷ. ಇತಿಹಾಸದ ನಾನಾ ಹಂತಗಳಲ್ಲಿ ಕಾಣಸಿಗುವ ಹ್ಯೂಯೆನ್ ತ್ಸಾಂಗ್, ಫಾಹಿಯಾನ್, ಮಾರ್ಕೆ ಪೋಲೊ, ಅಲೆಕ್ಸಾಂಡರ್, ನಾದಿರ್ ಶಾ, ಬಾಬರ್, ತೈಮೂರ್ ಮುಂತಾದ ಪಾತ್ರಗಳು ಈ ರಸ್ತೆಯ ವಿವರಗಳಲ್ಲಿ ಜೀವ ತಳೆಯುತ್ತವೆ. ಬುಖಾರಾ, ಬಾಕು, ಅಲೆಕ್ಸಾಂಡ್ರಿಯಾ, ತಿಬಿಲೀಸಿ, ಮಸ್ಕೇಟಾ, ರೋಮ್ ವೆನಿಸ್, ಪೆಟ್ರಾ, ಸಮರಕಂಡ, ಟೆಹರಾನ್, ಇಸ್ತಾಂಬುಲ್ ಮುಂತಾದ ನಗರಗಳು ಈ ರಸ್ತೆಯ ಜೊತೆಗೆ ಬೆಸೆದುಕೊಂಡಿವೆ. ಈ ನಗರಗಳ ಮುಖ್ಯ ಮಾರುಕಟ್ಟೆಗಳು, ರೇಷ್ಮೆ ರಸ್ತೆ ಕಾಲದ ಅವಶೇಷಗಳು, ವಾಸ್ತುಶಿಲ್ಪ, ಉದ್ಯಾನ ರಚನೆ... ಇವೆಲ್ಲ ಇತಿಹಾಸದ ಕುತೂಹಲಿಗಳಿಗೆ ಅಧ್ಯಯನದ ವಸ್ತು.
