ವಿಶೇಷ ಕಥಾಹಂದರದ ಸಿನಿಮಾದಲ್ಲಿ ಪಾತ್ರ ನಿಭಾಯಿಸಿದ್ದಕ್ಕೆ ಖುಷಿ ವ್ಯಕ್ತಪಡಿಸುವ ಅಮಿತಾ, ‘ವೃತ್ತಿ ಬದುಕಿಗೆ ಈ ಸಿನಿಮಾ ಮೂಲಕ ಟರ್ನಿಂಗ್ ಪಾಯಿಂಟ್ ಸಿಗಲಿದೆ. ನಾನು ಇಲ್ಲಿಯವರೆಗೆ ಮೂರು ಚಿತ್ರಗಳಲ್ಲಿ ನಟಿಸಿದ್ದೇನೆ. ಆದರೆ, ಇದು ಬಹಳ ವಿಭಿನ್ನ ಮತ್ತು ಬೇರೆ ರೀತಿಯ ಅನುಭವ ನೀಡಿದ ಚಿತ್ರವಾಗಿದೆ. ಈ ಪಾತ್ರದ ತಯಾರಿಗಾಗಿ ಮೈಸೂರಿನ ರಂಗಾಯಣದಲ್ಲಿ ರಿಹರ್ಸಲ್ ಮಾಡಿದ್ದೆವು. ನಿರ್ದೇಶಕ ರಘು ನೈಜ ಘಟನೆಯನ್ನು ಇಟ್ಟುಕೊಂಡು ಸಿನಿಮಾ ಮಾಡಿದ್ದಾರೆ. ಪ್ರೇಕ್ಷಕರಿಗೆ ಬೇರೆಯದ್ದೇ ಅನುಭವ ನೀಡುವ ಸಿನಿಮಾ ಇದಾಗಲಿದೆ’ ಎಂಬುದು ಅಮಿತಾ ಕುಲಾಲ್ ಮಾತು. ಈ ಹಿಂದೆ ‘ಪಲ್ಲಟ’ ಸಿನಿಮಾ ನಿರ್ದೇಶನ ಮಾಡಿದ್ದ ರಘುಗೆ ‘ಗಿಫ್ಟ್ಬಾಕ್ಸ್’ ಎರಡನೇ ಚಿತ್ರ. ನಾಯಕ, ನಾಯಕಿಯಷ್ಟೇ ಒಂದು ಗಿಫ್ಟ್ಬಾಕ್ಸ್ ಸಹ ಚಿತ್ರದಲ್ಲಿ ಪ್ರಧಾನ ಪಾತ್ರ ನಿರ್ವಹಿಸಿದೆಯಂತೆ. ‘ಮಾನವ ಕಳ್ಳ ಸಾಗಾಟ ಜಾಲದಲ್ಲಿ ಬರೀ ಹೆಣ್ಣುಮಕ್ಕಳೇ ಅಲ್ಲ, ಪುರುಷರು ಸಹ ಸಿಕ್ಕಿ ಹಾಕಿಕೊಳ್ಳುತ್ತಾರೆ. ಆ ಜಾಲದಲ್ಲಿ ಸಿಲುಕಿದ ಅಮಾಯಕನೊಬ್ಬ ಅದರಿಂದ ಹೊರಬರಲು ಪಡುವ ಕಷ್ಟಗಳೇನು ಎಂಬುದೇ ಈ ‘ಗಿಫ್ಟ್ ಬಾಕ್ಸ್’ ಎಂದು ಸಿನಿಮಾದಲ್ಲಿ ಹೇಳಹೊರಟಿರುವ ಕಥೆಯನ್ನು ವಿವರಿಸುತ್ತಾರೆ ನಿರ್ದೇಶಕರು. ಅಂದಹಾಗೆ, ಮೈಸೂರಿನಲ್ಲಿ ನಡೆದ ನೈಜ ಘಟನೆಯನ್ನು ಇಟ್ಟುಕೊಂಡು ಸಿನಿಮಾ ಮಾಡಿದ್ದಾರೆ ರಘು. ಸ್ನೇಹಿತರ ಜತೆಗೂಡಿ ಬಂಡವಾಳ ಹೂಡಿ ನಿರ್ವಪಕರೂ ಆಗಿದ್ದಾರೆ.
