ಬರೆಯುವುದರಿಂದ ಎಷ್ಟೊಂದು ಪ್ರಯೋಜನ...: ಓದಿಗಿಂತ ಬರೆಯುವುದು ತುಂಬಾ ಮುಖ್ಯ ಏಕೆ ಗೊತ್ತಾ? ನೀವೇ ಯೋಚನೆ ಮಾಡಿ ನೋಡಿ. ಓದುವಾಗ ಮನಸ್ಸು ಅತ್ತಿತ್ತ ಹರಿಯುವುದಿದೆ. ಕೆಲವೊಂದು ಸಬ್ಜೆಕ್ಟ್ ಗಳು ನಿಮಗೆ ಬೋರಿಂಗ್ ಇರಬಹುದು, ಇನ್ನು ಕೆಲವು ಕಷ್ಟ ಎನಿಸಬಹುದು. ಆದರೆ ಪಾಸ್ ಆಗಬೇಕಾದರೆ ಓದಲೇಬೇಕಾದ ಅನಿವಾರ್ಯತೆ ಇದೆ. ಅಂಥ ಸಮಯದಲ್ಲಿ ನೀವು ಓದುತ್ತಿದ್ದರೂ ತಲೆ ಮಾತ್ರ ಎಲ್ಲೋ ಓಡುತ್ತಿರುತ್ತದೆ. ಹೀಗಾದಲ್ಲಿ, ಓದು ನಿಮ್ಮ ಮೆದುಳಿಗೆ ರೆಜಿಸ್ಟರ್ ಆಗುವುದೇ ಇಲ್ಲ. ಪುಟ ತಿರುವು ಹಾಕಿದಾಗ, ಹಿಂದಿನ ಪುಟದಲ್ಲಿ ಏನಿತ್ತು ಎನ್ನುವುದೇ ಮರೆತುಹೋಗುತ್ತದೆ. ಇದು ನಿಮ್ಮ ಅನುಭವಕ್ಕೂ ಬಂದಿರಲಿಕ್ಕೆ ಸಾಕಲ್ಲವೆ? ಆದ್ದರಿಂದ ನಿಮಗೆ ಬೋರಿಂಗ್ ಅಥವಾ ಕಷ್ಟ ಎನಿಸುವ ಸಬ್ಜೆಕ್ಟ್ ಗಳನ್ನು ಬರೆದು ನೋಡಿ. ನೀವು ಬರೆಯುವಾಗ ಮನಸ್ಸು ಬೇರೆ ಕಡೆ ಹರಿಸಿದರೂ, ಓದಿದ್ದನ್ನು ನೆನಪು ಮಾಡಿಕೊಳ್ಳಬೇಕಾಗುವ ಕಾರಣ, ಗಮನ ಪೂರ್ತಿ ಅದರೆಡೆ ಕೇಂದ್ರೀಕೃತವಾಗಿರುತ್ತದೆ. ಒಂದು ವೇಳೆ ಬರೆಯುವ ಸಂದರ್ಭದಲ್ಲಿ ಯಾವುದಾದರೊಂದು ಪಾಯಿಂಟ್ಸ್ ನೆನಪಿಗೆ ಬರದೇ ಹೋದಲ್ಲಿ ಪುನಃ ನೀವು ಪುಸ್ತಕ ತೆರೆದು ನೋಡಬೇಕಾಗುತ್ತದೆ. ಅವೆಲ್ಲ ಪ್ರಕ್ರಿಯೆಗಳು ನಿಮಗೆ ಆ ವಿಷಯದ ಕಡೆ ಇನ್ನಷ್ಟು ಗಮನ ಹರಿಸುವಂತೆ ಮಾಡುತ್ತವೆ. ಅಲ್ಲಿಗೆ ಓದು ಕೂಡ ಆಯಿತು, ಬರವಣಿಗೆ ಕೂಡ ಆಯಿತು.
