ಪಲ್ಲಕ್ಕಿಯಿಂದಾಚೆ ಇಣುಕಿ ನೋಡಿದ ಪಂಡಿತ ಅಸಮಾಧಾನದಿಂದ, ‘ಏಕೆ ನಿಲ್ಲಿಸಿದಿರಿ?’ ಎಂದು ಕೇಳಿದ. ಪಲ್ಲಕ್ಕಿ ಹೊತ್ತ ವ್ಯಕ್ತಿ, ‘ಪಂಡಿತರೇ, ಇಲ್ಲೊಬ್ಬ ಹುಡುಗ ನಮಗೆ ಉತ್ತರಿಸಲಾಗದ ಪ್ರಶ್ನೆಗಳನ್ನು ಕೇಳುತ್ತಿದ್ದಾನೆ’ ಎಂದ. ಗರ್ವದಿಂದ ಹೊರಬಂದ ಪಂಡಿತ, ‘ಪ್ರಶ್ನೆಯೇ, ಕೇಳು’ ಎಂದ. ಹುಡುಗ ಕೆಳಗೆ ಬಗ್ಗಿ ತನ್ನ ಕೈಯಲ್ಲಿರುವ ಕೋಲಿನಿಂದ ಕೆಲವು ಅಸಮವಾದ ರೇಖೆಗಳನ್ನು ಬರೆದು, ‘ಇದೇನು ಹೇಳಬಲ್ಲಿರಾ’ ಎಂದು ಕೇಳಿದ. ಪಂಡಿತ ತಲೆ ಕೆರೆದುಕೊಂಡ ಯೋಚಿಸಿದ. ಅದು ತಾನು ಕಲಿತ ಯಾವ ಅಕ್ಷರದಂತೆಯೂ ಇರಲಿಲ್ಲ. ಯಾವುದೋ ಚಿತ್ರವಿರಬಹುದೆಂದು ಕಂಡು ಹಿಡಿಯಲು ಯತ್ನಿಸಿದ. ಕೊನೆಗೆ ಬೇಸತ್ತು, ‘ಇದು ಯಾವ ಅಕ್ಷರವೂ ಅಲ್ಲ. ಚಿತ್ರದಂತೆಯೂ ಕಾಣುತ್ತಿಲ್ಲ’ ಎಂದ. ಹುಡುಗ, ‘ತಾವು ಎಲ್ಲ ತಿಳಿದವರು. ಇಷ್ಟು ಸರಳವಾದದ್ದು ಗೊತ್ತಾಗಲಿಲ್ಲವೇ?’ ಎಂದಾಗ ಪಂಡಿತ ಸೋಲನ್ನು ಒಪ್ಪಿ ‘ಈಗ ನೀನು ಉತ್ತರ ನೀಡು’ ಎಂದ. ‘ಇದು ನನ್ನ ಎತ್ತು ಮೂತ್ರ ಮಾಡುವ ರೀತಿ’ ಎಂದು ಹುಡುಗ ಉತ್ತರಿಸಿದ. ಯಾರೇ ಆಗಲಿ ತಮಗೆ ಎಲ್ಲ ತಿಳಿದಿದೆ ಎಂದು ಹೇಳಲಾಗದು. ಹುಡುಗನಿಗೆ ತನ್ನ ಪ್ರಾಣಿಗಳ ಬಗ್ಗೆ ತಿಳಿದಿತ್ತು. ಪಂಡಿತನಿಗೆ ಪುಸ್ತಕದಲ್ಲಿ ಓದಿದ್ದು, ಜೀವನವಿಡಿ ಇತರ ವಿದ್ವಾಂಸರಿಂದ ಕಲಿತಿದ್ದು ತಿಳಿದಿತ್ತು.
