ಬಸವಣ್ಣನವರು ವಿಶ್ವಮಾನವರು. ಅವರ ತತ್ತ್ವಗಳು ಜಗತ್ತಿನಾದ್ಯಂತ ಪ್ರಸಾರಗೊಳ್ಳುತ್ತಿವೆ. ಕೆಲ ಬಸವತತ್ತ್ವ ಆಧಾರಿತ ಮಠಗಳು, ಬಸವ ಸಂಘಟನೆಗಳು, ರಾಜ್ಯಸರ್ಕಾರ ಮತ್ತು ಕೇಂದ್ರಸರ್ಕಾರಗಳು ಬಸವ ಸಂದೇಶವನ್ನು ಜಾಗತಿಕ ಮಟ್ಟಕ್ಕೆ ತಲುಪಿಸುವ ಕಾರ್ಯವನ್ನು ಮುಂದುವರಿಸಿವೆ. ಹೀಗಿದ್ದರೂ, ಕೆಲವರು ಬಸವಣ್ಣನವರಿಗೆ ಅವಮಾನ ಆಗುವಂತಹ ರೀತಿಯಲ್ಲಿ ಅಪ್ರಸ್ತುತ ವಿಚಾರ ಮತ್ತು ಅಪ್ರಬುದ್ಧ ಆಚರಣೆಯಲ್ಲಿ ತೊಡಗಿರುವುದು ದುರದೃಷ್ಟಕರ. ಕರೊನಾ ಇಡೀ ಜಗತ್ತನ್ನು ಆವರಿಸಿಕೊಂಡಿದ್ದು, ಸಂತ್ರಸ್ತರಿಗೆ ತಮ್ಮ ಸಂಘ-ಸಂಸ್ಥೆಯಿಂದ ಮತ್ತು ಮಠ-ಪೀಠದಿಂದ ಯಾವರೀತಿ ಸಹಕರಿಸಬೇಕು ಎಂಬುದನ್ನು ಮರೆತು ತಮ್ಮ ಹಳೆಯ ಚಾಳಿಯಂತೆ ಸಮಾಜದ ಸ್ವಾಸ್ಥ್ಯ ಕದಡುತ್ತಿರುವುದು ಖಂಡನೀಯ. ಈ ಸಂದರ್ಭದಲ್ಲಿ ಸೈದ್ಧಾಂತಿಕ ಚರ್ಚೆಗಳಿಗೆ ವಿರಾಮ ಇಟ್ಟು, ಜನಸೇವೆಗೆ ನಮ್ಮನ್ನು ತೊಡಗಿಸಿಕೊಳ್ಳೋಣವೆಂಬ ಸಂದೇಶ ರವಾನಿಸಿದ್ದರೂ ಕೆಲವರು ಬುದ್ಧಿಪೂರ್ವಕವಾಗಿ ಬಸವಣ್ಣನವರನ್ನು ಅವಮಾನಿಸುವಂತಹ ಹೇಳಿಕೆಗಳನ್ನು ನೀಡುತ್ತಿರುವುದು ಸರಿಯಲ್ಲ.
