ಒಎನ್ಜಿಸಿ ಫೌಂಡೇಷನ್ ಸಾಥ್!: 2020ರ ಶೈಕ್ಷಣಿಕ ವರ್ಷದಲ್ಲಿ ಎಂಟು ಲಕ್ಷ ಮಕ್ಕಳಿಗೆ ನೋಟ್ಬುಕ್ಗಳನ್ನು ವಿತರಿಸುವ ಗುರಿ ವೈಎಫ್ಎಸ್ನದ್ದು. ಹಲವು ರಾಜ್ಯಗಳಲ್ಲಿ ಸಂಸ್ಥೆಯ ಕಾರ್ಯ ವಿಸ್ತರಣೆ ಆಗಿರುವುದರಿಂದ ಈ ವರ್ಷ ಬೆಂಗಳೂರು ಸೇರಿ ದೇಶದ 45 ಮಹಾನಗರಗಳಲ್ಲಿ ‘ಗಿವ್ ಪೇಪರ್ ಬ್ಯಾಕ್’ ಅಭಿಯಾನ ನಡೆಯಲಿದೆ. ಸರ್ಕಾರಿ ಸ್ವಾಮ್ಯದ ಒಎನ್ಜಿಸಿ ಫೌಂಡೇಷನ್ ಈ ಕಾರ್ಯಕ್ಕೆ ಯೂತ್ ಫಾರ್ ಸೇವಾಗೆ ಜತೆಯಾಗಿದೆ. ಈಗಾಗಲೇ ಈ ಕುರಿತು ಜನರಲ್ಲಿ ಮತ್ತು ಶೈಕ್ಷಣಿಕ ಸಂಸ್ಥೆಗಳಲ್ಲಿ ಅರಿವು ಮೂಡಿಸುವ ಕೆಲಸ ನಡೆದಿದೆ. ಮಕ್ಕಳ ವಾರ್ಷಿಕ ಪರೀಕ್ಷೆ ಮುಗಿಯುತ್ತಿದ್ದಂತೆ ನೋಟ್ಬುಕ್ಗಳ ಸಂಗ್ರಹ ಕಾರ್ಯಕ್ಕೆ ಚಾಲನೆ ದೊರೆಯಲಿದೆ. ಕರ್ನಾಟಕ, ದೆಹಲಿ, ಉತ್ತರಪ್ರದೇಶ, ಮಧ್ಯಪ್ರದೇಶ, ಆಂಧ್ರಪ್ರದೇಶ, ತೆಲಂಗಾಣ, ಮಹಾರಾಷ್ಟ್ರ, ಒಡಿಶಾ, ಅಸ್ಸಾಂ ಸೇರಿ ದೇಶದ ಹಲವು ರಾಜ್ಯಗಳಲ್ಲಿ ಇದನ್ನು ಜನಾಂದೋಲನದಂತೆ ನಡೆಸಲು ನಿರ್ಧರಿಸಲಾಗಿದೆ. ಹೆಚ್ಚೆಚ್ಚು ಮಕ್ಕಳಿಗೆ ಇದರ ಲಾಭ ದೊರೆಯಬೇಕು, ಹಾಳೆಗಳ ಮರುಬಳಕೆಗೆ ಉತ್ತೇಜನ ನೀಡಬೇಕು ಎಂಬ ಉದ್ದೇಶ ಇದರ ವಿಸ್ತರಣೆ ಹಿಂದಿದೆ. ಉಳಿದ ರಾಜ್ಯಗಳಲ್ಲೂ ಈ ಕುರಿತು ಉತ್ತಮ ಸ್ಪಂದನೆ ವ್ಯಕ್ತವಾಗುತ್ತಿರುವುದರಿಂದ ಎಂಟು ಲಕ್ಷ ಮಕ್ಕಳಿಗೆ ನೋಟ್ಬುಕ್ಗಳನ್ನು ವಿತರಿಸುವ ಗುರಿ ಹೊಂದಲಾಗಿದೆ ಎನ್ನುತ್ತಾರೆ ವೈಎಫ್ಎಸ್ನ ಶ್ರೀಕಾಂತ ಜೋಶಿ. ಹಾಗಾಗಿ, ಇನ್ನಿತರ ಸ್ವಯಂಸೇವಾ ಸಂಸ್ಥೆಗಳ ಸಹಕಾರವನ್ನೂ ಪಡೆಯಲಾಗುತ್ತಿದ್ದು, ಮುಖ್ಯವಾಗಿ ಒಎನ್ಜಿಸಿ ಫೌಂಡೇಷನ್ ನೆರವು ನೀಡಲಿದೆ. ರಾಷ್ಟ್ರವ್ಯಾಪಿ ಈ ಯೋಜನೆ ಕೈಗೆತ್ತಿಕೊಳ್ಳುವುದರಿಂದ ಜನರಲ್ಲಿ ಅರಿವು ಹೆಚ್ಚಲಿದೆ, ಹಾಳೆಗಳ ಹಾನಿ ತಪ್ಪಿ, ಅವುಗಳಿಗೆ ಮರುಜೀವ ಸಿಗಲಿದೆ ಎಂಬ ಆಶಾವಾದ.
