ಚಟಗಳಿರಲಿ, ಸಂಬಂಧಗಳಿರಲಿ, ಸಾಲವಿರಲಿ, ಯುದ್ಧವಿರಲಿ, ತಲುಪಬೇಕಾದ ಗಮ್ಯಗಳೇ ಇರಲಿ: ನುಗ್ಗುವ ಮುನ್ನ ಚಕ್ರವ್ಯೂಹಕ್ಕೊಂದು ಎಸ್ಕೇಪ್ ರೂಟ್ ಇದೆಯಾ ಅಂತ ಖಚಿತಪಡಿಸಿಕೊಳ್ಳಿ. ಈ ವಿಷಯದಲ್ಲಿ ಹುಂಬತನ ಬೇಡ. ಬಾವಿಗೆ ಧುಮುಕುವುದು ಸುಲಭ. ಆದರೆ ಮೆಟ್ಟಿಲಿಲ್ಲದ ಬಾವಿಯೊಳಗಿನಿಂದ ಹಗ್ಗದ ನೆರವೂ ಇಲ್ಲದೆ ಮೇಲಕ್ಕೆ ಹತ್ತಿ ಬರುವುದು ಅಸಾಧ್ಯ. ಒಂದು ವ್ಯಾಪಾರ ಯಶಸ್ವಿಯಾಯಿತು ಅಂದಕೂಡಲೆ ಏಕಕಾಲಕ್ಕೆ ಹತ್ತು ವ್ಯಾಪಾರಗಳನ್ನು ಆರಂಭಿಸಿಬಿಡೋದು, ಸಹಾಯಕರೇ ಇಲ್ಲದಂತೆ ಮಾಡಿಕೊಂಡು, ಎಲ್ಲವನ್ನೂ ನಾನೇ ಮಾಡುತ್ತೇನೆ ಅಂತ ಹೊರಟುಬಿಡೋದು, ಸಲಹೆ ಕೇಳುವುದಕ್ಕೂ ಒಬ್ಬ ಗೆಳೆಯನಿಲ್ಲದಂತೆ ಮಾಡಿಕೊಂಡುಬಿಡುವುದು, ಇವು ಜಾಣರ ವರ್ತನೆಗಳಲ್ಲ.
