ಮೊದಲೆಲ್ಲಾ ಮನೆ ಎದುರಲ್ಲಿ ಅಥವಾ ಹಿತ್ತಲಿನಲ್ಲಿ ಸಣ್ಣ ಕೈ ತೋಟ ಇರಲೇಬೇಕಿತ್ತು. ಮನೆಗೆ ಬೇಕಾದ ಸೊಪ್ಪು, ತರಕಾರಿ, ಪೂಜೆಗೆ ಬೇಕಾದ ಹೂವನ್ನು ಜನರು ತಾವೇ ಬೆಳೆದುಕೊಳ್ಳುತ್ತಿದ್ದರು. ಆದರೆ ಕಾಲ ಬದಲಾದಂತೆ ಕೈ ತೋಟ ಮಾಡಬೇಕು ಎನ್ನುವ ಆಸಕ್ತಿ ಇದ್ದರೂ ಜಾಗದ ಕೊರತೆ ಎದುರಾಯಿತು. ಅತಿಯಾದ ಜನದಟ್ಟಣೆಯಿಂದ ಮಹಾನಗರಗಳಲ್ಲಿ ಆಕಾಶದೆತ್ತರಕ್ಕೆ ಕಟ್ಟಡಗಳನ್ನು ಕಟ್ಟುವಂತಹ ಸ್ಥಿತಿ ನಿರ್ವಣವಾಯಿತು. ಇದೆಲ್ಲದರ ಪರಿಣಾಮ ಈಗ ಟೆರೇಸ್ ಗಾರ್ಡನ್ ಅಥವಾ ತಾರಸಿ ತೋಟದ ಪರಿಕಲ್ಪನೆ ಜೀವ ಪಡೆದುಕೊಂಡಿದೆ. ಮನೆಯ ಬಾಲ್ಕನಿ, ಟೆರೇಸ್ಗಳ ಮೇಲೆಯೇ ಕೈ ತೋಟ, ಕಿಚನ್ ಗಾರ್ಡನ್ಗಳು ಹುಟ್ಟಿಕೊಳ್ಳುತ್ತಿವೆ. ಟೆರೇಸ್ ಗಾರ್ಡನ್ ಹವ್ಯಾಸ ಎನ್ನುವುದರ ಜತೆಗೆ ಒಂದು ಉದ್ಯಮವಾಗಿಯೂ ರೂಪುಗೊಳ್ಳುತ್ತಿದೆ. ಕೆಲವರು ತಮಗೆ ಬೇಕಾದ ಹಣ್ಣು, ತರಕಾರಿ, ಹೂವುಗಳನ್ನು ಮನೆಯ ತಾರಸಿ ಮೇಲೆ ಬೆಳೆದುಕೊಂಡು ಸ್ವಾವಲಂಬಿ ಜೀವನ ನಡೆಸುತ್ತಿದ್ದರೆ ಮತ್ತೆ ಕೆಲವರು ಮನೆಯ ತಾರಸಿಯಲ್ಲಿ ಬೆಳೆದ ಸಾವಯವ ಪದಾರ್ಥಗಳನ್ನು ಮಾರಾಟ ಮಾಡಿ ಹಣ ಗಳಿಸುತ್ತಿದ್ದಾರೆ.
