ವರ್ಚುವಲ್ ಪರಿಸರದ ಪ್ರಪಂಚ ಈ ಮೆಟಾವರ್ಸ್. ವ್ಯಾಖ್ಯಾನಗಳನ್ನು ಗಮನಿಸುವುದಾದರೆ, ವರ್ಚುವಲ್ ಪರಿಸರವನ್ನು ಸಾಮೂಹಿಕವಾಗಿ ಹಂಚಿಕೊಂಡಿರುವ ವ್ಯವಸ್ಥೆ. ಇದನ್ನು ಭೌತಿಕ ಜಗತ್ತಿಗೆ ಸಾಮೀಪ್ಯವೆನಿಸುವಂತೆ ಸೃಷ್ಟಿಸಲಾಗಿದ್ದು, ವರ್ಚುವಲ್ ಜಗತ್ತು, ಆಗ್ಯುಮೆಂಟೆಡ್ ರಿಯಾಲಿಟಿ, ಇಂಟರ್ನೆಟ್ಗಳನ್ನು ಒಳಗೊಂಡಿದೆ ಎನ್ನುತ್ತದೆ ವಿಕಿಪೀಡಿಯಾ. ಮೆಟಾವರ್ಸ್ ಎಂಬುದು ವರ್ಚುವಲ್ ರಿಯಾಲಿಟಿ ಪ್ರಪಂಚವಾಗಿದ್ದು, ಇಲ್ಲಿ ಕಂಪ್ಯೂಟರ್ ಸೃಷ್ಟಿತ ಪರಿಸರದಲ್ಲಿ ಬಳಕೆದಾರರು ಇತರೆ ಬಳಕೆದಾರರೊಂದಿಗೆ ಸಂವಹನ, ಮಾತುಕತೆ ನಡೆಸುವುದು ಸಾಧ್ಯವಿದೆ ಎಂಬ ವ್ಯಾಖ್ಯಾನ ನೀಡುತ್ತದೆ ವರ್ಸ್ ಆಂಡ್ ಡೈಮೆನ್ಶನ್ಸ್ ವಿಕಿ. ಸರಳವಾಗಿ ಹೇಳುವುದಾದರೆ, ಮೆಟಾವರ್ಸ್ ಎಂಬುದು ಸೈಬರ್ ಪ್ರಪಂಚದ ಸೃಷ್ಟಿ. ಮೆಟಾ ಎಂದರೆ ವ್ಯಾಪ್ತಿ ಮೀರಿದ, ಊಹೆ, ಕಲ್ಪನೆ ಎಂಬಿತ್ಯಾದಿ ಅರ್ಥವೂ ಇದೆ. ವರ್ಸ್ ಎಂಬುದು ಯೂನಿವರ್ಸ್ ಎಂಬುದರ ಆಡುಮಾತಿನ ಬಳಕೆಯ ಸಂಕ್ಷಿಪ್ತ ರೂಪ. ಹೊರಗಿನವರಿಗೆ ಇದು ವರ್ಚುವಲ್ ರಿಯಾಲಿಟಿ (ವಿಆರ್)ನ ಮುಂದುವರಿದ ಭಾಗವೆಂಬಂತೆ ಭಾಸವಾದೀತು. ಆದರೆ, ಕೆಲವರ ಪ್ರಕಾರ ಇದು ಡಿಜಿಟಲ್ ಜಗತ್ತಿನ ಮುಂದುವರಿದ ಭಾಗ.
