ಪರೀಕ್ಷೆ ಹತ್ತಿರ ಬಂದೇ ಬಿಟ್ಟಿತಲ್ಲಪ್ಪಾ; ಗಣಿತದ ಭಯಕ್ಕೆ BYE ಹೇಳಿ

ನಿಮ್ಮಲ್ಲಿ ಅನೇಕರಿಗೆ ಗಣಿತ ವಿಷಯ ಎಂದರೆ ಭಯ ಅಲ್ಲವೆ? ಈ ವಿಷಯದಲ್ಲಿ ಫೇಲ್ ಆಗಿಬಿಟ್ಟರೆ ಎಂಬ ಆತಂಕವೆ? ಈ ಆತಂಕ ಬಿಟ್ಟಾಕಿ. ಗಣಿತ ಪರೀಕ್ಷೆಯಲ್ಲಿ ಏನೇನು ಮಾಡಬೇಕು ಎಂಬ ಬಗ್ಗೆ ಸರಳವಾದ ಕೆಲವೊಂದು ಟಿಪ್ಸ್ ಕೊಡಲಾಗಿದೆ. ಅದನ್ನು ಪಾಲಿಸಿ ಸಾಕು. 

‘ಪರೀಕ್ಷೆ ಹತ್ತಿರ ಬಂದೇ ಬಿಟ್ಟಿತಲ್ಲಪ್ಪಾ’ ಎಂದು ಭಯ ಪಟ್ಟುಕೊಳ್ಳುತ್ತಿದ್ದೀರಾ. ಭಯವನ್ನು ಮೊದಲು ಬಿಡಿ. ಯಾವುದೋ ಹಬ್ಬ ಹತ್ತಿರವಿದೆ ಎಂಬಂತೆ ಖುಷಿ ಪಡಿ. ಹಬ್ಬಕ್ಕೆ ನೀವು ಹೇಗೆ ಸಿದ್ಧತೆ ಮಾಡಿಕೊಳ್ಳುತ್ತೀರೋ, ಹಾಗೆಯೇ ಪರೀಕ್ಷಾ ಹಬ್ಬಕ್ಕೂ ಈಗಿನಿಂದಲೇ ಸಿದ್ಧತೆ ಮಾಡಿಕೊಳ್ಳಿ.

ನಿಮ್ಮಲ್ಲಿ ಹೆಚ್ಚಿನವರು ಗಣಿತ ಎಂದರೆ ಕಬ್ಬಿಣದ ಕಡಲೆ ಎಂದೇ ಅಂದುಕೊಂಡುಬಿಟ್ಟಿದ್ದೀರಿ ಅಲ್ಲವೆ? ಅದು ಶುದ್ಧ ತಪ್ಪು ಗೊತ್ತಾ? ಗಣಿತವು ಕಬ್ಬಿಣದ ಕಡಲೆಯಲ್ಲ, ಬದಲಾಗಿ ಅದೊಂದು ಮನರಂಜನಾತ್ಮಕ ವಿಷಯ ಎಂಬುದನ್ನು ಅರಿತುಕೊಳ್ಳಿ. ಆಡುತ್ತಲೇ ಮಾಡುವ ಮತ್ತು ಕಲಿಯುವ ವಿಷಯವೇನಾದರೂ ಇದ್ದರೆ ಅದು ಗಣಿತ ಮಾತ್ರ.

ಸಂಖ್ಯೆಗಳೊಂದಿಗಿನ ಆಟವೇ ಗಣಿತ ಆಗಿರುವುದರಿಂದ ಇದನ್ನು ಮನಸಾರೆ ಅನುಭವಿಸಿ, ಆನಂದಿಸಿ. ಹೆಚ್ಚಿನ ವಿದ್ಯಾರ್ಥಿಗಳದ್ದು ಒಂದೇ ಮಾತು, ‘ಉಳಿದ ವಿಷಯಗಳನ್ನು ಏನಾದರೂ ಮಾಡಿ ಪಾಸಾಗುತ್ತೇನೆ. ಆದರೆ ಗಣಿತ ನನ್ನ ತಲೆ ಕೊರೆಯುತ್ತಿದೆ. ಹೇಗೆ ಬಿಡಿಸಬೇಕೆಂಬುದೇ ಹೊಳೆಯುವುದಿಲ್ಲ. ಟೀಚರ್ ಹೇಳುವಾಗ ಸುಲಭವೆನ್ನಿಸುತ್ತದೆ. ಮನೆಗೆ ಬಂದು ಬಿಡಿಸಲು ನೋಡಿದಾಗ ಅದು ಪೆಡಂಭೂತವಾಗಿ ಕಾಡುತ್ತದೆ. ಹೀಗಾಗಿ ನನಗೆ ಗಣಿತವೆಂದರೆ ಭಯ ಮತ್ತು ಅಲರ್ಜಿ...’

ಹೀಗೆ ಅಂದುಕೊಂಡೇ ನೀವು ಗಣಿತದ ಬಗ್ಗೆ ಇನ್ನಷ್ಟು ಭಯ ಹುಟ್ಟಿಸಿಕೊಳ್ಳುತ್ತಿದ್ದೀರಿ. ಆದರೆ ನಿಜವಾಗಿ ನಿಮಗೆ ಗೊತ್ತಾ? ಗಣಿತ ಎನ್ನುವುದು ಪಾಪು ಇದ್ದ ಹಾಗೆ. ನೀವು ಯಾವುದೇ ಪಾಪು ನೋಡಿದಾಗ ಅದನ್ನು ಎತ್ತಿಕೊಳ್ಳುವ ಮನಸ್ಸಾಗುತ್ತದೆ. ಆದರೆ ಮೊದಲಿಗೆ ಆ ಪಾಪು ನೀವು ಕರೆದರೆ ಬರುವುದಿಲ್ಲ.

ಆದರೆ ಅದನ್ನು ರಮಿಸಿ ಕರೆದುಕೊಂಡು ಮುದ್ದಿಸಿದರೆ ನಿಮ್ಮನ್ನು ಬಿಟ್ಟೇ ಹೋಗುವುದಿಲ್ಲ ಅಲ್ಲವೆ? ಗಣಿತವೂ ಹಾಗೆಯೆ. ‘ಇದು ನನ್ನ ವಿಷಯ. ಇದನ್ನು ಪಾಸಾಗದೆ ಉಳಿದವೆಲ್ಲವನ್ನು ಪಾಸಾದರೂ ನನ್ನ ಫಲಿತಾಂಶಕ್ಕೆ ಏನೂ ಅರ್ಥವಿಲ್ಲ’ ಎಂಬುದನ್ನು ನಿರ್ಧರಿಸಿಕೊಳ್ಳಿ. ಅದರ ಬಗೆಗಿನ ಭಯಕ್ಕೆ ಗಟ್ಟಿ ಮನಸ್ಸು ಮಾಡಿ ಬೈ ಹೇಳಿಬಿಡಿ. ಮಗುವನ್ನು ಮುದ್ದಿಸುವಂತೆ ಇಂದಿನಿಂದ ಗಣಿತವನ್ನು ಪ್ರೀತಿಸಿ ಮುದ್ದಿಸಲು ಆರಂಭಿಸಿ. ಗಣಿತ ಅದ್ಹೇಗೆ ನಿಮ್ಮ ಕೈವಶ ಆಗುತ್ತದೆಯೋ ನೀವೇ ನೋಡಿ.

ನೀವು 10ನೇ ಕ್ಲಾಸಾ?

ಎಸ್​ಎಸ್​ಎಲ್​ಸಿ ಪರೀಕ್ಷೆ ಬರೆಯುತ್ತಿರುವ ಮಕ್ಕಳೇ, ಇಲ್ಲಿ ಕೇಳಿ. ಈ ಬಾರಿ ಗಣಿತ ಪ್ರಶ್ನೆ ಪತ್ರಿಕೆಯ ಸ್ವರೂಪವು ಬದಲಾಗಿದ್ದು, ವಿದ್ಯಾರ್ಥಿ ಸ್ನೇಹಿಯಾಗಿದೆ. ಕೇವಲ 38 ಪ್ರಶ್ನೆಗಳಲ್ಲಿ 80 ಅಂಕಗಳನ್ನು ಪಡೆಯುವ ಅನುಕೂಲತೆಯನ್ನು ಕರ್ನಾಟಕ ಪ್ರೌಢ ಶಿಕ್ಷಣ ಪರೀಕ್ಷಾ ಮಂಡಳಿ ಒದಗಿಸಿದೆ.

ಇದರಲ್ಲಿ 8 ಪ್ರಶ್ನೆಗಳು ಬಹು ಆಯ್ಕೆ ಪ್ರಶ್ನೆಗಳು, ಅಂಕಗಳು 8 (ಪ್ರತಿ ಪ್ರಶ್ನೆಗೆ 1 ಅಂಕ). ಅತಿ ಲಘು ಉತ್ತರದ ಪ್ರಶ್ನೆಗಳು 8, ಅಂಕಗಳು 8 (ಪ್ರತಿ ಪ್ರಶ್ನೆಗೆ 1 ಅಂಕ). ಲಘು ಉತ್ತರದ ಪ್ರಶ್ನೆಗಳು 8, ಅಂಕಗಳು 16 (ಪ್ರತಿ ಪ್ರಶ್ನೆಗೆ 2 ಅಂಕ). ದೀರ್ಘ ಉತ್ತರದ ಪ್ರಶ್ನೆಗಳು 9, ಅಂಕಗಳು 27 (ಪ್ರತಿ ಪ್ರಶ್ನೆಗೆ 3 ಅಂಕ). ದೀರ್ಘ ಉತ್ತರದ ಪ್ರಶ್ನೆಗಳು 4, ಅಂಕಗಳು 16 (ಪ್ರತಿ ಪ್ರಶ್ನೆಗೆ 4 ಅಂಕ) ಮತ್ತು ದೀರ್ಘ ಉತ್ತರದ ಪ್ರಶ್ನೆ 1, ಅಂಕಗಳು 5 (ಈ ಪ್ರಶ್ನೆಗೆ 5 ಅಂಕ) ಹೀಗೆ ಒಟ್ಟು 80 ಅಂಕಗಳನ್ನು 38 ಪ್ರಶ್ನೆಗಳಿಗೆ ನಿಗದಿಗೊಳಿಸಲಾಗಿದೆ. 38 ಪ್ರಶ್ನೆಗಳಿಗೆ ಉತ್ತರಿಸಲು ಸಾಕಷ್ಟು ಸಮಯವನ್ನೂ ಮಂಡಳಿ ನೀಡಿದೆ.

ಒಟ್ಟು 3 ಗಂಟೆ 15 ನಿಮಿಷಗಳ ದೀರ್ಘಾವಧಿಯನ್ನು ಪರೀಕ್ಷೆ ಬರೆಯಲು ನೀಡಲಾಗಿದ್ದು, ಇದರಲ್ಲಿ 15 ನಿಮಿಷಗಳನ್ನು ನೀವುಗಳು ಪ್ರಶ್ನೆ ಪತ್ರಿಕೆಯನ್ನು ಸರಿಯಾಗಿ ಓದಲು ಕಡ್ಡಾಯವಾಗಿ ಬಳಸಿಕೊಳ್ಳಲೇಬೇಕು. ಗಣಿತ ಪರೀಕ್ಷೆ ಕಬ್ಬಿಣದ ಕಡಲೆ ಎಂದುಕೊಂಡವರಿಗೆ ಸುಲಭವಾಗಿ ಉತ್ತರ ಬರೆದು ಪಾಸಾಗಲು, ಅದೂ 28 ಅಂಕಗಳನ್ನು ಅನಾಯಾಸವಾಗಿ ಪಡೆಯಬಹುದು.

ಇಲ್ಲಿದೆ ನೋಡಿ ಕೆಲವು ಸಲಹೆ

• ಗಣಿತ ಅಥವಾ ಆ ದಿನದ ಪರೀಕ್ಷೆ ತುಂಬಾ ಈಸಿ ಎಂದು ಮನಸ್ಸಿನಲ್ಲಿ ಅಂದುಕೊಳ್ಳಿ.
• ಇಂತಿಷ್ಟು ಅಂಕ ಪಡೆದೇ ಪಡೆಯುತ್ತೇನೆ ಎಂದು ನಿರ್ಧರಿಸಿ.
• ಪ್ರಶ್ನೆ ಪತ್ರಿಕೆ ಸಿಕ್ಕ ತಕ್ಷಣವೇ ಪೆನ್ಸಿಲ್ ತೆಗೆದುಕೊಳ್ಳಿ.
• ಪ್ರಶ್ನೆ ಪತ್ರಿಕೆಯನ್ನು ನಿಧಾನವಾಗಿ, ಅವಸರವಿಲ್ಲದಂತೆ, ಯಾವುದೇ ಉದ್ವೇಗಕ್ಕೆ ಒಳಗಾಗದೆ ಸಮರ್ಪಕವಾಗಿ ಓದಿ.
• ಪ್ರತಿ ಪ್ರಶ್ನೆಯನ್ನೂ ಓದಿದ ನಂತರ ಅದಕ್ಕೆ ನಿಮಗೆ ಸರಿಯಾದ ಉತ್ತರ ಗೊತ್ತಿದ್ದರೆ ಪೆನ್ಸಿಲ್​ನಿಂದ ಪ್ರಶ್ನೆ ಸಂಖ್ಯೆಯ ಹಿಂದೆ ರೈಟ್ ಗುರುತನ್ನು ಹಾಕಿ.
• ಪ್ರಶ್ನೆಗೆ ಉತ್ತರ ಗೊಂದಲ ಎನಿಸಿದರೆ ಅದನ್ನು ನಂತರ ಬರೆಯುವಿರಂತೆ, ಹಾಗೇ ಬಿಡಿ, ಅದರ ಬಗ್ಗೆ ಆಗಲೇ ಚಿಂತಿಸುತ್ತಾ ಕುಳಿತುಕೊಳ್ಳಬೇಡಿ.
• ಉತ್ತರ ಗೊತ್ತಿದೆ ಎಂಬ ಖುಷಿಯಲ್ಲಿ ಆತುರಾತುರವಾಗಿ ಉತ್ತರಿಸಲು ಹೋಗಬೇಡಿ. ಮುಂದಿನ ಪ್ರಶ್ನೆಗಳನ್ನೂ ನಿಧಾನವಾಗಿ ಓದಿ ಗುರುತಿಸಿಕೊಳ್ಳಿ.
• ಎಲ್ಲ ಪ್ರಶ್ನೆಗಳನ್ನೂ ಓದಿಕೊಂಡ ನಂತರ ಯಾವ ಪ್ರಶ್ನೆಯನ್ನು ಅತ್ಯಂತ ಸಮರ್ಪಕವಾಗಿ ಬರೆಯಲು ನೀವು ಸಿದ್ಧರಾಗಿದ್ದೀರಿ ಎಂಬುದನ್ನು ನೀವೇ ನಿರ್ಧರಿಸಿಕೊಂಡು ಅದನ್ನು ಬರೆಯಲು ಪ್ರಾರಂಭಿಸಿ.
• ಇದೇ ಪ್ರಶ್ನೆಗೆ ಮೊದಲು ಉತ್ತರ ಬರೆಯಬೇಕು ಅಥವಾ ಕ್ರಮಾನುಗತವಾಗಿ 1ರಿಂದ 38 ಪ್ರಶ್ನೆಗಳಿಗೆ ಉತ್ತರಿಸಬೇಕೆಂಬ ಯಾವ ನಿಯಮವೂ ನಿಮಗಿಲ್ಲ.
• ನಿಮಗೆ ಸ್ಪಷ್ಟವಾಗಿ ಉತ್ತರ ಗೊತ್ತಿರುವ ಪ್ರಶ್ನೆಯನ್ನೇ ಮೊದಲು ಆಯ್ದುಕೊಂಡು ಬರೆಯಲು ಶುರು ಮಾಡಿ. ಇದರಿಂದ ನಿಮ್ಮ ಆತ್ಮವಿಶ್ವಾಸ ವೃದ್ಧಿಯಾಗುತ್ತದೆ. ಒಮ್ಮೆ ಆತ್ಮವಿಶ್ವಾಸ ವೃದ್ಧಿಯಾದರೆ ನಿಮ್ಮನ್ನು ಹಿಡಿಯು ವವರೇ ಇಲ್ಲ.

ಎಸ್​ಎಸ್​ಎಲ್​ಸಿ ವಿದ್ಯಾರ್ಥಿಗಳಿಗೆ ಎಕ್ಸ್​ಟ್ರಾ ಟಿಪ್ಸ್

• ಪಕ್ಕದಲ್ಲಿ ತಿಳಿಸಿರುವ ಎಲ್ಲಾ ಟಿಪ್ಸ್​ಗಳ ಜತೆಗೆ 10ನೇ ಕ್ಲಾಸ್ ವಿದ್ಯಾರ್ಥಿಗಳಿಗೆ ಒಂದಿಷ್ಟು ಹೆಚ್ಚಿನ ಟಿಪ್ಸ್ ಇಲ್ಲಿದೆ ನೋಡಿ.
• ಹೆಚ್ಚಿನ ಪ್ರಶ್ನೆ ಪತ್ರಿಕೆಯಲ್ಲಿ ಶೆ.30ರಷ್ಟು ಸುಲಭ, ಶೇ.50ರಷ್ಟು ಸಾಧಾರಣ ಮತ್ತು ಶೇ.20ರಷ್ಟು ಕಠಿಣ ಭಾಗಗಳಿವೆ.
• ಗಣಿತ ಪರೀಕ್ಷೆ ಪಾಸಾಗಬಯಸುವ ವಿದ್ಯಾರ್ಥಿಗಳು ಮೊದಲ ಭಾಗ ಸುಲಭದಲ್ಲಿಯೇ 30 ಅಂಕಗಳನ್ನು ಸುಲಭವಾಗಿ ಗಳಿಸಬಹುದಾದ ಅವಕಾಶವಿದೆ.
• ಈ 30 ಅಂಕಗಳ ಗಳಿಕೆ ಹೇಗೆ ಎಂಬುದರ ಲೆಕ್ಕಾಚಾರ ನೋಡಿ. ಮೊದಲ ಬಹು ಆಯ್ಕೆಯ 8 ಪ್ರಶ್ನೆಗಳಲ್ಲಿ ನೀವು ನಾಲ್ಕನ್ನು ಉತ್ತರಿಸುತ್ತೀರಿ, ನಂತರದ ಅತಿ ಲಘು ಉತ್ತರದ ಪ್ರಶ್ನೆಗಳಲ್ಲಿ ನಾಲ್ಕನ್ನೇ ಉತ್ತರಿಸುತ್ತೀರಿ ಎಂದುಕೊಳ್ಳಿ. ಈಗ ನಿಮ್ಮ ಅಂಕ ಗಳಿಕೆ 8. 2 ಅಂಕಗಳ 8 ಪ್ರಶ್ನೆಗಳಲ್ಲಿ ನಾಲ್ಕನ್ನೇ ಉತ್ತರಿಸುತ್ತೀರಿ ಎಂದುಕೊಳ್ಳಿ. ಅದರಿಂದಲೂ ನಿಮಗೆ 8 ಅಂಕಗಳು ಬಂದವು.
• 3 ಅಂಕಗಳ 9 ಪ್ರಶ್ನೆಗಳಲ್ಲಿ ನೀವು ಕೇವಲ ಮೂರನ್ನೇ ಉತ್ತರಿಸುತ್ತೀರಿ ಎಂದುಕೊಳ್ಳಿ. ಅಲ್ಲಿನ ಅಂಕಗಳು 9.
• 4 ಅಂಕಗಳ 4 ಪ್ರಶ್ನೆಗಳಲ್ಲಿ ಎರಡನ್ನೇ ಉತ್ತರಿಸುತ್ತೀರಿ ಎಂದುಕೊಂಡರೆ ಅದರಲ್ಲಿನ 8 ಅಂಕಗಳನ್ನು ಸೇರಿಸಿದರೆ ಒಟ್ಟು ಅಂಕಗಳು 33 ಆಗುತ್ತವೆ.
• ನಿಮ್ಮ ಗುರಿಯಿರುವುದು 30 ಅಂಕಗಳಿಗೆ ಆದರೆ ನೀವೀಗ ಗಳಿಸಿರುವುದು 33 ಅಂಕಗಳನ್ನು! ಯಾರಿಗುಂಟು ಯಾರಿಗಿಲ್ಲ ಈ ಭಾಗ್ಯ!
• ಇದರಲ್ಲಿ ಐದು ಅಂಕಗಳ ಒಂದು ಪ್ರಶ್ನೆಯನ್ನು ಉತ್ತರಿಸುವ ಆಯ್ಕೆ ನಿಮಗೆ ಬಿಟ್ಟಿದ್ದು. ಹಾಗೇನಾದರೂ ನೀವು ಪ್ರಯತ್ನಿಸಿ. ಯಶಸ್ವಿಯಾದರೆ ಅಂಕಗಳು 38. ಅಂದರೆ ಗಣಿತ ಪರೀಕ್ಷೆ ಪಾಸಾಗಲು ಇಷ್ಟು ಸರಳವಾದ ದಾರಿಯಿದೆ.
• ಒಮ್ಮೆಲೆ ಇದನ್ನು ಸಾಧಿಸಲು ಸಾಧ್ಯವಾಗುತ್ತದೆ ಎಂದುಕೊಳ್ಳಬೇಡಿ. ನೀವು ಶಾಲೆಯಲ್ಲಿ ಶಿಕ್ಷಕರು ನೀಡುವ ಮಾದರಿ ಪ್ರಶ್ನೆ ಪತ್ರಿಕೆಗಳನ್ನು ಗಮನಿಸಿ, ಸರಿಯಾಗಿ ಅಭ್ಯಸಿಸಿ ಬಿಡಿಸಲು ಪ್ರಯತ್ನಿಸಿ. ಸೂತ್ರಗಳು, ರಚನೆಗಳು, ನಕ್ಷೆಗಳ ಬಗ್ಗೆ ವಿಶೇಷ ಗಮನ ಹರಿಸಿ. ಇವುಗಳು ನಿಮಗೆ ಹೆಚ್ಚಿನ ಅಂಕಗಳನ್ನು ನೀಡಲಿದ್ದು, ನೀವು ಸುಲಭವಾಗಿ ಪಾಸಾಗುವಂತೆ ಮಾಡುತ್ತವೆ.
• ಒಮ್ಮೆ ಪ್ರಶ್ನೆಯನ್ನು ಓದಿದ ನಂತರ ಇದು ನನಗೆ ಬಿಡಿಸಲು ಬರುವುದಿಲ್ಲ ಎಂಬ ನಿರ್ಧಾರಕ್ಕೆ ಬರಬೇಡಿ. ಅದರಲ್ಲಿ ಎಷ್ಟನ್ನು ಬಿಡಿಸಲು ನಿಮಗೆ ಸಾಧ್ಯವಾಗುತ್ತದೆ ಎಂಬುದನ್ನು ಯೋಚಿಸಿ, ಅರ್ಧದಷ್ಟನ್ನಾದರೂ ಬಿಡಿಸಲು ಯತ್ನಿಸಿ. ಬಿಡಿಸಿದ ಪ್ರತಿ ಹಂತಕ್ಕೂ ಮೌಲ್ಯಮಾಪನದಲ್ಲಿ ಅಂಕ ನೀಡಿಕೆಯಿರುತ್ತದೆ. ಆದ್ದರಿಂದ ಪ್ರಶ್ನೆಯನ್ನು ಹಾಗೇ ಬಿಟ್ಟು ಬರದೆ ಬಂದಷ್ಟನ್ನಾದರೂ ಬಿಡಿಸಿ ಸಿಕ್ಕಷ್ಟನ್ನು ಬಾಚಿಕೊಳ್ಳಿ.
• ಸಾಧ್ಯವಾದರೆ ಶಾಲೆಯಲ್ಲಿ ನಿಮ್ಮ ಗಣಿತ ಶಿಕ್ಷಕರಿಂದ ಕಳೆದ ವರ್ಷದ ಗಣಿತ ವಿಷಯದ ಮೌಲ್ಯಮಾಪನದ ಪ್ರತಿಯನ್ನು ಪಡೆಯಿತು. ಅದನ್ನು ನೋಡಿದರೆ ಪ್ರತಿ ಪ್ರಶ್ನೆಗೂ ಅಂಕಗಳ ಹಂಚಿಕೆ ಹೇಗಾಗುತ್ತದೆ ಎಂಬುದು ನಿಮ್ಮ ಗಮನಕ್ಕೆ ಬರುತ್ತದೆ. ಇದರಿಂದ ನೀವು ಎಷ್ಟು ಅಂಕಗಳನ್ನು ಗಳಿಸಬಹುದು ಎಂಬುದನ್ನು ನೀವೇ ನಿರ್ಧರಿಸಲು ಸಹಾಯವಾಗುತ್ತದೆ.
• ಪರೀಕ್ಷೆಯ ಹಿಂದಿನ ದಿನ ಬಹಳಷ್ಟು ನಿದ್ದೆಗೆಡಬೇಡಿ. ಬೇಗನೆ ಊಟ ಮಾಡಿ ಶಾಂತವಾಗಿ ಮಲಗಿ. ಬೆಳಗ್ಗೆ ಬೇಗನೆ ಎದ್ದು ಇನ್ನೊಮ್ಮೆ ಮುಖ್ಯಾಂಶಗಳ ಮೇಲೆ ಕಣ್ಣು ಹಾಯಿಸಿ.ನಿಗದಿತ ಸಮಯದಲ್ಲಿ ಪರೀಕ್ಷಾ ಕೇಂದ್ರವನ್ನು ತಲುಪಿ, ಚೆನ್ನಾಗಿ ಪರೀಕ್ಷೆಯನ್ನು ಬರೆಯಿರಿ.

| ಅರುಣ ಬಿ ಕುಲಕರ್ಣಿ (ಲೇಖಕರು ಗದಗದ ಶ್ರೀ ಸೋಮೇಶ್ವರ ಪ್ರೌಢಶಾಲೆ, ಕೋಟುಮಚಗಿಯ ಗಣಿತ ಶಿಕ್ಷಕರು)