ಮಾಸ್ತಿಯವರು ಸಾಹಿತಿಗಳಾಗಿರುವಂತೆ ಪತ್ರಕರ್ತರೂ ಆಗಿದ್ದರು. ‘ಜೀವನ’ ಮಾಸಪತ್ರಿಕೆಯ ಸಂಪಾದಕರಾಗಿ ಅದನ್ನು 21 ವರ್ಷಗಳ ಕಾಲ ಯಶಸ್ವಿಯಾಗಿ ನಡೆಸಿದರು. ‘ಜೀವನ’ ಧಾರವಾಡದಲ್ಲಿ ಆರಂಭವಾಗಿ ಅನಿಯಮಿತವಾಗಿ ಪ್ರಕಟವಾಗುತ್ತಿತ್ತು. 1944ರಲ್ಲಿ ಮಾಸ್ತಿಯವರು ಪತ್ರಿಕೆಯನ್ನು ಬೆಂಗಳೂರಿಗೆ ತಂದು ಅದನ್ನು ನಿಯಮಿತವಾಗಿ 21 ವರ್ಷಗಳ ಕಾಲ ಪ್ರಕಟಿಸಿದರು. ತಮ್ಮ ಮನೆಯನ್ನೇ ‘ಜೀವನ’ ಪತ್ರಿಕೆಯ ಕಾರ್ಯಾಲಯವನ್ನಾಗಿಸಿದರು. ಆ ಕಾಲದ ಯುವ ಬರಹಗಾರರಾಗಿದ್ದ ಅನೇಕರನ್ನು ಪತ್ರಿಕೆಯ ಮೂಲಕ ಬೆಳಕಿಗೆ ತಂದರು. ಡಾ. ದ.ರಾ. ಬೇಂದ್ರೆ, ರಂಗನಾಥ ದಿವಾಕರ, ಎ.ಆರ್. ಕೃಷ್ಣಶಾಸ್ತ್ರೀ, ನವರತ್ನ ರಾಮರಾಯ, ವಿಶ್ವೇಶ್ವರಯ್ಯ ಮುಂತಾದವರ ಬಗ್ಗೆ ವಿಶೇಷ ಸಂಚಿಕೆಗಳನ್ನು ಹೊರತಂದು ಒಂದು ಹೊಸ ಸಂಪ್ರದಾಯವನ್ನೇ ಹಾಕಿದರು.
