ಕಿವಿಗೆ ಇಂಪಾದ ಈ ಹಾಡು ಆದಿವಾಸಿಗಳ ಜೀವನ, ನೋವು-ನಲಿವು, ಪ್ರೀತಿ-ಪ್ರೇಮ, ಭಕ್ತಿ-ಭಾವ, ವ್ಯವಸ್ಥೆಯ ವಿರುದ್ಧ ಆಕ್ರೋಶವನ್ನು ಹೊರಹಾಕುತ್ತದೆ. ಅದೇ ರೀತಿ ತಮ್ಮ ಭೂಮಿಯ ಹಕ್ಕಿಗಾಗಿ ದಿಟ್ಟವಾಗಿ ಕೇಳುವ ದನಿಯೂ ಈ ಹಾಡಿನಲ್ಲಿ ಪ್ರತಿಧ್ವನಿಸುತ್ತಿದೆ. ಈ ಹಾಡನ್ನು ಹಾಡುವ ತಂಡ ಹೊರಗಿನವರದ್ದಲ್ಲ; ಆದಿವಾಸಿಗಳದ್ದೇ. ಹೀಗಾಗಿ ಅವರ ಅಭಿವ್ಯಕ್ತಿಯಲ್ಲಿ ಒಂದು ಮೊನಚು ಕೂಡ ಇದೆ. ಇದರಲ್ಲಿ ಗಾಯಕರ ತಂಡಕ್ಕೆ ಸಾಥ್ ನೀಡುವ ಹಿಮ್ಮೇಳದಲ್ಲಿರುವ ಸಲಕರಣೆಗಳನ್ನು ನೋಡಿದ್ರೆ ನೀವು ಹುಬ್ಬೇರಿಸೋದು ಗ್ಯಾರೆಂಟಿ. ಮರದ ಕೋಲು ಕೈಗೆ ಸಿಕ್ಕರೆ ನೀರಿನ ಡ್ರಮ್ ಇವರ ಪಾಲಿಗೆ ಡೋಲು, ಇಲ್ಲಾಂದ್ರೆ ತಬಲಾ. ಇವರ ಆರಾಧ್ಯ ದೇವರನ್ನೊಮ್ಮೆ ಗಮನಿಸಿದರೆ, ಅಲ್ಲಿ ಗೆಜ್ಜೇವರು, ನಡುಮನೆ ತಾಯಿ, ಮೂರಟ್ಟಿ ಕಕ್ಕೇರಿ, ಒಡ್ತೇರು, ಅಮ್ಮಾಳೆಮ್ಮ ಹೀಗೆ 101 ದೇವರ ಹೆಸರುಗಳು ಕೇಳಿಬರುತ್ತವೆ. ಆ ದೇವರುಗಳ ಹೆಸರಿನಲ್ಲಿ ಹಾಡುಕಟ್ಟಿ ಹಾಡು ತ್ತಾರೆ. ಕೋಲಾಟ, ಸುಗ್ಗಿ ಕುಣಿತಕ್ಕೂ ಬರವಿಲ್ಲ.
