ಶಿಕ್ಷಣ ಹಾಗೂ ತರಬೇತಿಯ ಗುಣಮಟ್ಟ ಸುಧಾರಣೆ ವಿಷಯದಲ್ಲಿ ದಾಖಲಾತಿ ಹಾಗೂ ಸಾಧನೆಯ ಮಟ್ಟಗಳನ್ನು ಹೆಚ್ಚಿಸುವುದು, ಶಾಲೆಯಿಂದ ಹೊರಗುಳಿದವರ ಕಡೆ ಗಮನ ನೀಡುವುದು, ತಡೆಗಟ್ಟುವುದು, ಶಿಕ್ಷಣ, ಉದ್ಯೋಗ ಅಥವಾ ತರಬೇತಿಯಲ್ಲಿ ಇಲ್ಲದಿರುವಂತಹ ಯುವ ಜನರನ್ನು ಬೆಂಬಲಿಸುವುದು. ಉದ್ಯೋಗ ಹಾಗೂ ಉದ್ಯಮಶೀಲತೆ ವಿಚಾರಕ್ಕೆ ಬಂದರೆ, ಔದ್ಯೋಗಿಕ ಕೌಶಲಗಳಲ್ಲಿರುವ ಕೊರತೆ ನಿವಾರಿಸುವುದು. ವೃತ್ತಿಗೆ ಸಂಬಂಧಿಸಿದ ಆಪ್ತ ಸಮಾಲೋಚನಾ ಸೇವೆಗಳನ್ನು ಸುಧಾರಿಸುವುದು. ಮಾರ್ಗದರ್ಶನಕ್ಕಾಗಿ ಸೂಕ್ತ ಮಾರ್ಗ ರಚಿಸುವುದು ಹಾಗೂ ಸ್ವ-ಉದ್ಯೋಗ ಮತ್ತು ಉದ್ಯಮಶೀಲತೆ ಬೆಂಬಲಿಸುವುದು. ಆರೋಗ್ಯ ಹಾಗೂ ಯೋಗಕ್ಷೇಮಕ್ಕೆ ಕ್ಷೇತ್ರಕ್ಕೆ ಸಂಬಂಧಿಸಿದಂತೆ, ಮಾನಸಿಕ ಆರೋಗ್ಯಗಳ ದೊರೆಯುವಿಕೆ ಸುಧಾರಿಸುವುದು, ಪೌಷ್ಟಿಕತೆ ಕೊರತೆ ನೀಗಿಸುವುದು, ಡಿಜಿಟಲ್ ಚಟಗಳ ಬಗ್ಗೆ ಅರಿವು ಮೂಡಿಸುವುದು ಹಾಗೂ ಮದ್ಯಪಾನ, ತಂಬಾಕು ಸೇವನೆ ಹಾಗೂ ಮಾದಕ ವಸ್ತು ಬಳಕೆ ಕಡಿಮೆಗೊಳಿಸುವುದು ಪ್ರಮುಖ ಸಂಗತಿ ಇವೆ. ಕ್ರೀಡೆಗಳು ಹಾಗೂ ಫಿಟ್ನೆಸ್ ವಿಚಾರದಲ್ಲಿ ರಾಜ್ಯ ನಿರ್ದಿಷ್ಟ ಕ್ರೀಡಾ ಕಾರ್ಯಕ್ರಮ ರಚನೆ, ಪ್ರತಿಭಾ ಅನ್ವೇಷಣಾ ಆಯೋಜನೆ ಜಾರಿ ಮಾಡುವುದು, ಕ್ರೀಡೆಗಳಲ್ಲಿ ವೈವಿಧ್ಯತೆ ಹೆಚ್ಚಿಸುವುದು, ದೇಸಿ ಆಟಗಳಿಗೆ ಪ್ರೋತ್ಸಾಹ ನೀಡುವುದು, ಸಾಂಸ್ಕೃತಿಕ ವಿಶ್ವಕೋಶ ಸೃಷ್ಟಿ ಮಾಡುವುದು ಮತ್ತು ಕಲೆ ಹಾಗೂ ಸಾಂಸ್ಕೃತಿಕ ಭಾಗವಹಿಸುವಿಕೆಗೆ ಪ್ರೋತ್ಸಾಹ ನೀಡಲು ಮತ್ತು ಯುವ ಮೇಳ ಆಯೋಜನೆಗೆ ಶಿಫಾರಸು ಮಾಡಲಾಗಿದೆ. ಮೌಲ್ಯಾಧಾರಿತ ನಾಯಕತ್ವ ಅಭಿವೃದ್ಧಿ ಇಂದಿನ ಅಗತ್ಯಗಳಲ್ಲೊಂದು. ಅದಕ್ಕೆ ಕೂಡ ಗಮನ ನೀಡಲಾಗಿದ್ದು, ನಾಗರಿಕ ಹಾಗೂ ರಾಜಕೀಯ ಭಾಗವಹಿಸುವಿಕೆ ಹೆಚ್ಚಿಸುವುದು, ಸ್ವಯಂಸೇವಾ ವ್ಯವಸ್ಥೆ ರಚನೆ, ನಾಯಕತ್ವ ಸಾಮರ್ಥ್ಯ ಅಭಿವೃದ್ಧಿ ಹಾಗೂ ಫೆಲೋಷಿಪ್ ಕಾರ್ಯಕ್ರಮಗಳ ಸ್ಥಾಪನೆ ಮಾಡಲು ಶಿಫಾರಸು ಮಾಡಲಾಗಿದೆ.
