ಪರಸ್ಪರ ಒಪ್ಪಿಗೆಯಿಂದ ಆಗಲಿ: ಇತ್ತೀಚೆಗೆ ಕೆಲವರು ಮದುವೆಯ ಜವಾಬ್ದಾರಿಯಿಂದ ನುಣುಚಿಕೊಳ್ಳಲೋ ಅಥವಾ ಸಂಸಾರದ ಜಂಜಾಟ ಬೇಡವೆಂದೋ, ಆರ್ಥಿಕವಾಗಿ ಸಾಕಷ್ಟು ಸಬಲರಾಗಿಲ್ಲವೆಂದೋ, ಮತ್ತಿನ್ನೇನೋ ಕಾರಣಕ್ಕೆ ಮದುವೆಯಿಂದ ತಪ್ಪಿಸಿಕೊಳ್ಳಲು ಯತ್ನಿಸುತ್ತಿದ್ದಾರೆ. ಕೆಲವರು ತಮ್ಮ ಸುತ್ತಮುತ್ತ ಗಂಡ- ಹೆಂಡಿರ ಜಗಳ, ವಿಚ್ಛೇದನ, ಆಸ್ತಿ ವಿವಾದ, ಮರುಮದುವೆ... ಇವೆಲ್ಲವನ್ನೂ ಗಮನಿಸಿ ಮದುವೆಯೇ ಬೇಡ ಎಂದು ಮದುವೆ ಮೇಲೆ ಮುನಿಸಿಕೊಂಡಿದ್ದಾರೆ. ಕೆಲ ಹೆಣ್ಣುಮಕ್ಕಳು ಓದಿ, ಸಾಧನೆ ಮಾಡಿ ಅಥವಾ ಸಾಧನೆಯ ಹಾದಿ ಕಂಡುಕೊಂಡ ಮೇಲೆ ಮದುವೆ ಮಾತು ಎಂದು ಮದುವೆಯನ್ನು ದೂರ ಮಾಡುತ್ತಿದ್ದಾರೆೆ, ಇನ್ನೂ ಕೆಲವರು ಬಹಿರಂಗಪಡಿ ಸಲಾಗದ ಸಮಸ್ಯೆಯಿಂದಲೂ ಮದುವೆ ಬೇಡ ಎಂಬ ನಿರ್ಧಾರಕ್ಕೆ ಬಂದಿದ್ದಾರೆ. ಹಾಗಾಗಿ ಮದುವೆ ಬಗ್ಗೆ ಗೊಂದಲ ಹೆಚ್ಚಾಗಿದ್ದು, ಮದುವೆ ಸಂಬಂಧವಾಗಿ ಕೌನ್ಸೆಲಿಂಗ್ ನೆರವು ಪಡೆಯುವವರು ಹೆಚ್ಚಾಗಿದ್ದಾರೆ. ಮದುವೆ ಎಂದರೆ ಗಂಡು- ಹೆಣ್ಣು ಜೀವನ ಪೂರ್ತಿ ಜತೆಯಾಗಿ ಸಾಮರಸ್ಯದಿಂದ ಬದುಕುವಂಥದ್ದು. ಇಂತಹ ಮಹತ್ವಪೂರ್ಣ ಮದುವೆ ಆತುರದಲ್ಲೋ, ಒತ್ತಡದಲ್ಲೋ, ಬೇರೆ ಒಂದು ಉದ್ದೇಶದ ಸಲುವಾಗಿಯೋ ಆಗದೇ, ಪ್ರೀತಿಯಿಂದ, ಪರಸ್ಪರ ಒಪ್ಪಿಗೆಯಿಂದ ಆಗುವುದಾದರೆ ಸಾರ್ಥಕ.
