ಆದರೂ ಆ ಕಲಾವಿದನಿಗೆ ಅದೇಕೋ ಸಮಾಧಾನವಾಗಲಿಲ್ಲ. ಏನೋ ಯೋಚಿಸುತ್ತ ಮುಂದಕ್ಕೆ ಹೊರಟ. ತುಸು ದೂರ ಹೋದ ಬಳಿಕ ಅವನ ಪರಿಚಯದ, ಅದೇ ತಾನೇ ವಿವಾಹವಾಗಿದ್ದ ತರುಣಿಯೊಬ್ಬಳು ಸಿಕ್ಕಳು. ಅವಳಿಗೂ ತನ್ನ ಪ್ರಶ್ನೆ ಕೇಳಿದ. ಆ ಹುಡುಗಿ ಥಟ್ಟನೇ- ‘ಪ್ರೇಮ, ಹೌದು, ಜಗತ್ತಿನಲ್ಲಿ ಪ್ರೇಮಕ್ಕಿಂತ ಸುಂದರವಾದದ್ದು ಮತ್ತೊಂದಿಲ್ಲ. ಅದು ಎಲ್ಲ ಸಮಸ್ಯೆ ನಿವಾರಿಸುತ್ತದೆ, ಜೀವನಕ್ಕೆ ಹೊಸ ಉತ್ಸಾಹ ತುಂಬುತ್ತದೆ. ಅಂತರಂಗದ ಸೌಂದರ್ಯ ಹೆಚ್ಚಿಸುತ್ತದೆ. ಪ್ರೇಮದಿಂದ ಜೀವಿಸಿದರೆ ಬಾಳು ಸಾರ್ಥಕ’ ಎಂದಳು. ಆ ತರುಣಿಯ ಉತ್ತರದಿಂದಲೂ ಇವನಿಗೆ ಸಮಾಧಾನವಾಗಲಿಲ್ಲ. ಆತ ಮತ್ತೂ ಮುಂದಕ್ಕೆ ಹೋದಾಗ ಎದುರಿಗೆ ಒಬ್ಬ ಸೇವಾ ನಿವೃತ್ತ ಸೈನಿಕ ಸಿಕ್ಕನು. ಚಿತ್ರಕಾರನ ಪ್ರಶ್ನೆಗೆ ಉತ್ತರವೀಯುತ್ತ ಆ ಸೈನಿಕ ಹೀಗೆ ಹೇಳಿದ, ‘ಸ್ವಾಮಿ ಎಲ್ಲಕ್ಕಿಂತಲೂ ಸುಂದರವಾದದ್ದೆಂದರೆ ಶಾಂತಿ. ಎಲ್ಲಕ್ಕಿಂತಲೂ ಕುರೂಪಿ ಯುದ್ಧ. ಶಾಂತಿಯಲ್ಲಿ ಸೌಂದರ್ಯವಿರುತ್ತದೆ. ಸಮಾಜದಲ್ಲಿ ಶಾಂತಿ ನೆಲೆಸಿದಾಗಲೇ ಅಭಿವೃದ್ಧಿಯ ಆಶಯಗಳು ಈಡೇರುತ್ತವೆ, ಉತ್ತಮ ಮೌಲ್ಯಗಳು ವಿಕಾಸವಾಗುತ್ತವೆ’ ಎಂದ.
