ಅರ್ಥ ‘ಈ ಸ್ವರ್ಣಮಯೀ ಲಂಕಾ ನನ್ನನ್ನು ಆಕರ್ಷಿಸುತ್ತಿಲ್ಲ. ಹೆತ್ತ ತಾಯಿ ಮತ್ತು ಹೊತ್ತ ಭೂಮಿ ಸ್ವರ್ಗಕ್ಕಿಂತಲೂ ಮಿಗಿಲು’ ಇದು ರಾಷ್ಟ್ರಾಭಿಮಾನದ ಮಾತುಗಳು. ಈ ಹಿನ್ನೆಲೆಯಲ್ಲಿ ದೇವತಾರ್ಚನಗಿಂತ ದೇಶ ಅರ್ಚನೆ ಮೇಲು. ಕಾರಣ ದೇಶವಿದ್ದರೆ ತಾನೇ ದೇವರು. ಈ ಸತ್ಯವನ್ನೇ ಕವಿ ಹೀಗೆ ಬರೆದ-‘ದೇಶ ಒಂದಳಿಯ ಉಳಿದವರಾರು? ದೇಶವೊಂದುಳಿಯ ಅಳಿದವರಾರು?’ ಈ ಹಿನ್ನೆಲೆಯಲ್ಲಿ ಒಂದು ದೇಶದ ಸಂಪತ್ತನ್ನು ಅಲ್ಲಿರುವ, ಸೌಕರ್ಯ ಸೌಲಭ್ಯಗಳಿಂದಾಗಲಿ, ಭೌತಿಕ ಪ್ರಗತಿಯಿಂದಾಗಲಿ, ಆರ್ಥಿಕ ಸ್ಥಿತಿಗತಿಯಿಂದಾಗಲಿ ಅಳೆಯಲಾಗದು, ಅಳೆಯಬಾರದು. ಒಂದು ದೇಶದ ನಿಜವಾದ ಸಂಪತ್ತೆಂದರೆ ಆ ದೇಶದ ಸುಶಿಕ್ಷಿತ-ಸುಸಂಸ್ಕೃತ, ಸಭ್ಯ-ಸಂಭಾವಿತ, ಆರೋಗ್ಯವಂತ, ಗುಣವಂತ ರಾಷ್ಟ್ರಪ್ರೇಮಿ ಪ್ರಜೆಗಳು. ಇಂತಹವರ ಸಂತತಿ ಸಾವಿರವಾಗಲಿ!
