ಮೂಲಾರ್ಥದಲ್ಲಿ ಶಿಕ್ಷಣ ಅಂದರೆ ಕಲಿಕೆ. ಒಬ್ಬ ರೈತನ ಮಗ ಓದು ಅಥವಾ ಅನುಭವದ ಮೂಲಕ ಕೃಷಿ ಕಲಿತು ಕೃಷಿಕನಾದರೆ ಅದು ಕೂಡ ಶಿಕ್ಷಣವಲ್ಲವೇ? ‘ನೈತಿಕ ಮೌಲ್ಯಗಳಿಲ್ಲದ ಶಿಕ್ಷಣ ಸಮಾಜಕ್ಕೆ ಅಪಾಯಕಾರಿ’ ಎಂದು ಹೇಳಿದ ಡಾ. ಬಾಬಾಸಾಹೇಬ್ ಅಂಬೇಡ್ಕರ್ ಅವರ ಮಾತು ಎಷ್ಟು ಅರ್ಥಪೂರ್ಣ ಅನಿಸುತ್ತದೆ. ಶಿಕ್ಷಣದ ಮೂಲಕ ವ್ಯಕ್ತಿಯ ಮನೋವಿಕಾಸವಾಗಿ, ತನ್ನ ಸುತ್ತಮುತ್ತಲಿನ ಪರಿಸರವನ್ನು ಅನುಕೂಲತೆಯೆಡೆಗೆ ಪರಿವರ್ತನೆ ಮಾಡಿ, ಸಮಾಜದ ಏಳಿಗೆಗೆ ಶ್ರಮಿಸುವಂತೆ ಮಾಡಬೇಕು. ಸಂಸ್ಕಾರವಂತರಾಗಿ, ಸಹನೆಯುಳ್ಳ ಉತ್ತಮ ನಾಗರಿಕರಾಗಬೇಕು. ಶಿಕ್ಷಣ ಪಡೆದ ವ್ಯಕ್ತಿಯಿಂದ ಸಾಮಾಜಿಕ, ಆರ್ಥಿಕ, ನೈತಿಕ ಬೆಳವಣಿಗೆ ಆಗಿ ಮಾನವೀಯತೆಯುಳ್ಳ ಉತ್ತಮ ಸಮಾಜ ನಿರ್ವಣವಾಗಬೇಕು. ಅದರಲ್ಲೇ ಇರುವುದು ಮನುಕುಲದ ಗೆಲುವು.
