ನೋಡುವ ರೀತಿ, ಯೋಚಿಸುವ ಮಾರ್ಗ ಸರಿಯಾಗಿದ್ದರೆ ಮಾತ್ರವೇ ಹುದುಗಿರುವ ಕೌಶಲ ಒದಗಿ ಬರಲಿಕ್ಕೆ ಸಾಧ್ಯ. ಅನೇಕರು ಪೂರ್ವಗ್ರಹ ಪೀಡಿತರಾಗಿ ತಾವಂದುಕೊಂಡಿದ್ದನ್ನೇ ಸರಿ ಎಂದು ಭಾವಿಸಿ, ಉಪಸಂಹಾರ ಬರೆದು ಬಿಡುತ್ತಾರೆ. ಅಜ್ಞಾನದಿಂದಲೋ, ಆತುರದಲ್ಲೋ ಸರಿಯಾಗಿ ದೃಷ್ಟಿ ಹರಿಸದಿದ್ದರೆ ಒಳ್ಳೆಯದನ್ನು ಕಳೆದುಕೊಳ್ಳಬೇಕಾಗುವುದು. ಅದರಿಂದಾಗುವ ನಷ್ಟ ಒಂದಿಡೀ ಸಮಾಜಕ್ಕೇ ತಟ್ಟಬಹುದು. ಪರಮಾತ್ಮನ ಸೃಷ್ಟಿಯಲ್ಲಿ ಯಾವುದೂ ನಿರುಪಯೋಗಿಯಲ್ಲ, ನಿರರ್ಥಕವಲ್ಲ. ಅದು ನಮಗೆ ಸಾರ್ಥಕವಾಗಿ ಗೋಚರವಾಗಬೇಕಾದರೆ, ನಮಗಿರುವ ಆಲೋಚನಾ ಶಕ್ತಿಯನ್ನು ಸರಿಯಾಗಿ ಬಳಸಿಕೊಳ್ಳಬೇಕಷ್ಟೆ. ಹಾಗೆ ಈ ಸೃಷ್ಟಿಯನ್ನು ಸಾರ್ಥಕವಾಗಿ ಕಾಣಬೇಕಾಗಿದ್ದು ಮನುಷ್ಯನ ಕರ್ತವ್ಯ ಕೂಡ.
