ಇದನ್ನು ನೋಡಿದ ಬಾಲಕನಿಗೆ ಇನ್ನಿಲ್ಲದ ದುಃಖವಾಯಿತು. ತಾಯಿಯ ಕೈ ಹಿಡಿದು ಜೋರಾಗಿ ಅಳತೊಡಗಿದ. ಆಗ ತಾಯಿ- ‘ಮಗೂ, ಈ ಗಾಳಿಪಟ ನಮ್ಮ ಬದುಕು ಕಣೋ! ಇದನ್ನು ಬೇಕಾಬಿಟ್ಟಿ ಹಾರಾಡಲು ಬಿಡಬಾರದು. ಅದಕ್ಕೊಂದು ಸೂತ್ರವಿರಬೇಕು. ಅದು ಸಂಸ್ಕಾರದ ಸೂತ್ರವಿರಬಹುದು, ಕುಟುಂಬ ಬಂಧನದ ಸೂತ್ರ, ಬಾಂಧವ್ಯ, ಕರ್ತವ್ಯವೆಂಬ ಸೂತ್ರ, ಸಮಾಜ, ಸಂಸ್ಕೃತಿ ಈ ಯಾವುದೇ ಸೂತ್ರವಿರಬಹುದು. ಒಟ್ಟಿನಲ್ಲಿ ಒಂದು ಸೂತ್ರವಂತೂ ಇರಲೇಬೇಕು. ಈ ಸೂತ್ರಗಳು ಮೇಲ್ನೋಟಕ್ಕೆ ಬದುಕಿನ ಬಂಧನಗಳು ಎನ್ನಿಸಬಹುದು, ಆದರೆ ಸುಸೂತ್ರವಾದ ಜೀವನಕ್ಕೆ ಈ ಬಂಧನಗಳು ಅನಿವಾರ್ಯವೂ ಹೌದು. ಯಾಕೆಂದರೆ ಈ ಬಂಧನಗಳೇ ಬದುಕಿಗೊಂದು ಬದ್ಧತೆಯನ್ನೂ, ಸ್ಥಿರತೆಯನ್ನೂ ನೀಡುತ್ತವೆ. ನಿತ್ಯ ಬದುಕಿನ ಧಾವಂತದಲ್ಲಿ ಆಸೆ ಆಮಿಷಗಳಿಗೆ ಬಲಿಯಾಗಿ ಸೂತ್ರ ಹರಿದು ದಾರಿ ತಪ್ಪಿ ಕೊನೆಗೊಂದು ದಿನ ಪರಿತಪಿಸುವುದನ್ನು ಈ ಬಂಧನಗಳೇ ತಡೆಯುತ್ತವೆ.
