ನಮ್ಮ ಬದುಕಿನ ಪಯಣವೂ ಒಂದು ಚಾರಣ ಇದ್ದಂತೆ. ಬೆಟ್ಟದ ತುದಿ ಸಮೀಪ ಇದೆ ಎಂದು ಭಾಸವಾಗುವಂತೆ, ಯಶಸ್ಸು ಸಮೀಪದಲ್ಲಿದೆ ಎಂದು ಭಾಸವಾಗುತ್ತಿರುತ್ತದೆ. ಚಾರಣದ ಹಾದಿಯಲ್ಲಿ ಆಯಾಸಗೊಂಡು ಹೆಜ್ಜೆಗಳು ನಿಧಾನವಾದಂತೆ, ಬದುಕಿನ ಹಾದಿಯಲ್ಲಿ ಪಯಣಿಸುವಾಗ ನೋವು, ನಿರಾಸೆ, ಕಷ್ಟಕಾರ್ಪಣ್ಯಗಳೆಂಬ ಅನೇಕ ಅಡೆತಡೆಗಳುಂಟಾಗುತ್ತವೆ. ಆಗ ಜೀವನದ ಪಯಣದ ಓಟ ಮಂದಗತಿಯಲ್ಲಿ ಸಾಗುತ್ತದೆ. ಗುರುಗಳು ಚಾರಣದ ನಡುವೆ ಶಿಷ್ಯಂದಿರಿಗೆ ಉತ್ಸಾಹ ತುಂಬಿದಂತೆ, ನಮಗೂ ನಮ್ಮ ಆತ್ಮೀಯರು ಕಷ್ಟಕಾಲದಲ್ಲಿ ನೀಡುವ ಸಣ್ಣಪುಟ್ಟ ಸಹಾಯ, ಸಲಹೆಗಳು ಕೂಡ ಹೊಸ ಉತ್ಸಾಹ ತುಂಬಿ ನಮ್ಮ ಗುರಿಯತ್ತ ಚಲಿಸುವಲ್ಲಿ ಪ್ರೇರಣಾದಾಯಕವಾಗುತ್ತವೆ. ‘ಮನುಷ್ಯನಿಗೆ ಜೀವನದಲ್ಲಿ ಬಹಳಷ್ಟು ಸಂಕಷ್ಟಗಳು ಬೇಕಾಗುತ್ತವೆ. ಏಕೆಂದರೆ ಯಶಸ್ಸನ್ನು ಸಂಭ್ರಮಿಸಲು ಅವು ಬೇಕಾಗುತ್ತವೆ’ ಎಂಬ ಎ.ಪಿ.ಜೆ.ಅಬ್ದುಲ್ ಕಲಾಂ ನುಡಿಯಂತೆ, ಯಶಸ್ವಿ ಬದುಕನ್ನು ನಮ್ಮದಾಗಿಸಿ ಕೊಳ್ಳುವ ಹಾದಿಯಲ್ಲಿ ಒಂದಿಷ್ಟು ಕಷ್ಟಗಳು, ಅಡೆತಡೆಗಳು ಬರುವುದು ಸಹಜ ಹಾಗೂ ಅವು ಅಗತ್ಯ ಕೂಡ. ಯಶಸ್ವಿ ಜೀವನಕ್ಕಾಗಿ ದೃಢ ಹೆಜ್ಜೆಗಳನ್ನಿಟ್ಟು ಸಾಗೋಣ.
