ಅದೊಂದು ಶಾಲೆ, ಭಾನುವಾರ ಇಬ್ಬರು ಹುಡುಗರು ಶಾಲೆಯ ಮುಂದಿನಿಂದ ಹಾದು ಹೋಗುತ್ತಿದ್ದರು. ಅಲ್ಲಿ ಮೂರು ಕುರಿಗಳು ಮೇಯುತ್ತಿದ್ದವು. ಇದನ್ನು ನೋಡಿ ಅವರಲ್ಲೊಬ್ಬನಿಗೆ ಒಂದು ಉಪಾಯ ಹೊಳೆಯಿತು. ಮೂರು ಕುರಿಗಳನ್ನು ಹಿಡಿದು ಒಂದು ಕುರಿಯ ಮೇಲೆ 1 ಎಂದು, ಇನ್ನೊಂದು ಕುರಿಯ ಮೇಲೆ 2 ಎಂದು ಮತ್ತು ಮೂರನೆಯ ಕುರಿಯ ಮೇಲೆ 4 ಎಂದು ಬರೆದು ಶಾಲೆಯ ಆವರಣದೊಳಗೆ ಬಿಟ್ಟು ಗೇಟನ್ನು ಹಾಕಿದರು. ಮರುದಿನ ಶಾಲೆಯ ಸಿಬ್ಬಂದಿ ಬಂದು ನೋಡುತ್ತಾರೆ, ಮೂರು ಕುರಿಗಳು ಶಾಲೆಯ ತುಂಬೆಲ್ಲಾ ಓಡಾಡಿವೆ, ಅಲ್ಲಲ್ಲಿ ಹಿಕ್ಕೆ ಹಾಕಿ ಗಲಿಜು ಮಾಡಿವೆ. ತಕ್ಷಣ ಶಾಲೆಯ ಆಡಳಿತ ಮಂಡಳಿ ಕುರಿಗಳನ್ನು ಹಿಡಿಯುವಂತೆ ತಿಳಿಸಿತು. ಅದರಂತೆ ಹುಡುಕಿ ಮೂರು ಕುರಿಗಳನ್ನು ತಂದು ಕಟ್ಟಿದರು. ಆದರೆ ಆಡಳಿತ ಮಂಡಳಿಗೆ ಈಗ ತಲೆ ನೋವು ಪ್ರಾರಂಭವಾಯಿತು. ಒಂದು, ಎರಡು ಹಾಗೂ ನಾಲ್ಕನೆ ಸಂಖ್ಯೆ ಬರೆದ ಕುರಿಗಳು ಮಾತ್ರ ಸಿಕ್ಕಿವೆ. ಮೂರನೇ ಸಂಖ್ಯೆ ಬರೆದ ಕುರಿ ಕಾಣುತ್ತಿಲ್ಲ. ಮತ್ತೆ ಹುಡುಕಲು ತಿಳಿಸಿದರು. ಮೂರನೇ ಸಂಖ್ಯೆಯ ಕುರಿಯನ್ನು ಹುಡುಕುವುದರಲ್ಲಿಯೇ ದಿನವೆಲ್ಲ ಕಳೆದು ಹೋಯಿತು. ಕಾಲೇಜಿನ ಶಿಕ್ಷಕರು, ಹೆಡ್ ಮಾಸ್ತರ್, ಜವಾನ, ಕ್ಯಾಂಟಿನ್ ಸಿಬ್ಭಂದಿ, ಶಾಲೆಯ ಹುಡುಗರು ಎಲ್ಲರೂ ಹುಡುಕಿದ್ದೇ ಹುಡುಕಿದ್ದು, ಆದರೆ ಆ ಕುರಿ ಮಾತ್ರ ಸಿಗಲೇ ಇಲ್ಲ.
